Heeheʼ. Ebʼ laj testiiw re li Jehobʼa rajlal nekeʼxtenqʼa ebʼ li nekeʼxkʼul li rahilal xbʼaan li habʼ, li iqʼ malaj li nimla hiik. Nekeʼxtenqʼa ebʼ li rechpaabʼanel ut jalanebʼ chik li qas qiitzʼin. Li Santil Hu naxye: «Qabʼaanuhaq li usilal rehebʼ chixjunil, abʼanan qʼaxal chik tqabʼaanu rehebʼ li qech aj paabʼanelil» (Gálatas 6:10, Li Santil Hu, Sociedad Bíblica de Guatemala). Joʼkan ajwiʼ, nekeʼkʼojobʼank chʼool ut nekeʼxkawresi li xpaabʼalebʼ xbʼaan naq aʼin li naʼajmank saʼ xhoonalil li rahilal (2 Corintios 1:3, 4).

Naq nakʼulmank li rahilal, ebʼ li cheekel winq re li teep aʼan nekeʼxyal xsikʼbʼal chixjunil li rechpaabʼanel re xnawbʼal chanru wankebʼ ut li naʼajmank chiruhebʼ. Tojaʼ naq nekeʼxye re li xmolam li Jehobʼa chanru wank li chʼaʼajkilal ut li ak xbʼaanumank re xtenqʼankilebʼ.

Wi ebʼ li chʼuut li wankebʼ chi nachʼ inkʼaʼ nekeʼruuk xtenqʼankilebʼ li ra xeʼxkʼul, Li Nekeʼjolomink re Xmolam li Jehobʼa nekeʼxkʼubʼ li kʼanjel re tenqʼank. Li qamolam naxxaqabʼ ebʼ li chʼuut re xbʼeresinkil li kʼanjel, ut ebʼ laj Testiiw re jalan chik li naʼaj nekeʼxkʼe li xhoonal ut li xtumin (Proverbios 17:17). Saʼ xkutankilebʼ li apóstol, kibʼaanumank ajwiʼ aʼin naq kiwank li weʼej saʼ xyanqebʼ laj paabʼanel (1 Corintios 16:1-4).

Jun jachal re li kubʼsiil li nataqlamank saʼ xmolam ebʼ laj testiiw re li Jehobʼa naʼoksimank re xtenqʼankilebʼ li ra xeʼxkʼul xbʼaan li habʼ, li iqʼ malaj li nimla hiik (Hechos 11:27-30; 2 Corintios 8:13-15). Ut saʼ xkʼabʼaʼ naq moko tojbʼilebʼ ta ebʼ laj paabʼanel li nekeʼtenqʼank, chixjunil li kubʼsiil naʼoksimank choʼq re li kʼanjel re tenqʼank. Joʼkan ajwiʼ, naqaj xjultikankil naq chixjunil li kubʼsiil naʼoksimank chiʼus (2 Corintios 8:20).