Inkʼaʼ. Ebʼ laj testiiw re li Jehobʼa inkʼaʼ nekeʼxkʼe xlajeetqil li kʼaru rehebʼ. Li xtuminal li kʼanjel li nekeʼxbʼaanu chirix li Yos, nachalk rikʼin li tenqʼ tumin li nekeʼxkʼe ebʼ li qas qiitzʼin ut li junjunq yal re joʼnimal tixkʼe. Abʼanan, bʼar nachalk li naʼlebʼ chirix xkʼebʼal li xlajeetqil li kʼaʼaq re ru, ut kʼaʼut ebʼ laj testiiw re li Jehobʼa inkʼaʼ nekeʼxbʼaanu?

Saʼ li Chaqʼrabʼ li kikʼemank rehebʼ laj Israel wank li taql chirix xkʼebʼal li xlajeetqil li kʼaru rehebʼ re laj tij. Li Santil Hu naxye chi chʼolchʼo ru naq ebʼ laj paabʼanel li nekeʼtaqenk re li Kriist inkʼaʼ teʼxyuʼami li chaqʼrabʼ aʼin. Joʼkan bʼiʼ, sahebʼ li qakutan, maaʼani chik minbʼil ru chi xkʼebʼal li xlajeetqil li kʼaru re (Hebreos 7:5, 18; Colosenses 2:13, 14).

Choʼq reqaj li xlajeetqil li kʼaru rehebʼ malaj junaq chik li mayej, ebʼ laj testiiw re li Jehobʼa nekeʼxkʼam rehebʼ rikʼinebʼ li xbʼeen aj paabʼanel. Ebʼ aʼan keʼxtenqʼa chaq li chʼuut rikʼin xkʼebʼal li xtenqʼ tumin aʼ yaal joʼnimal naʼalaak saʼ xchʼoolebʼ ut rikʼin li puktesink ut xkʼutbʼal li yaal rehebʼ li qas qiitzʼin chi sibʼil.

Aʼin naxchap ribʼ rikʼin li naxkʼut li Santil Hu: «Li junjunq chixkʼehaq joʼnimal naʼalaak saʼ xchʼool, inkʼaʼ chi kaʼbʼrix xchʼool chi moko chi minbʼilaq ru, xbʼaan naq li Yos naxra li nasihok chi sa saʼ xchʼool» (2 Corintios 9:7, Li Santil Hu, Sociedad Bíblica de Guatemala).