Inkʼaʼ. Ebʼ laj testiiw re li Jehobʼa nekeʼxpaabʼ naq li Yos kiyobʼtesink re chixjunil. Abʼan inkʼaʼ nekeʼxpaabʼ naq li Ruuchichʼochʼ kiyiibʼamank chiru waqibʼ kutan re kaahibʼ xkakʼaal hoonal (24 hoor). Kʼaʼut inkʼaʼ nekeʼxpaabʼ? Xbʼaan naq wank ebʼ li naʼlebʼ chirix aʼin li inkʼaʼ naxchap ribʼ rikʼin li Santil Hu. Qatzʼilaq rix wiibʼ rehebʼ aʼin.

1. Nayeemank naq chiru waqibʼ kutan kiyobʼtesimank chixjunil. Wankebʼ nekeʼxkʼut naq chiru waqibʼ kutan re 24 hoor kiyobʼtesimank chixjunil. Naq li Santil Hu kiroksi li aatin «kutan» moko yook ta chi aatinak chirixebʼ li kutan li naqanaw ru laaʼo, yook bʼan chi aatinak chirix naabʼal chihabʼ (Génesis 2:4, Li Santil Hu, Wycliffe Bible Translators, Wy. Akʼ tzʼiibʼ; Salmo 90:4, Wy).

2. Nayeemank naq moko junxil ta xyiibʼamank li Ruuchichʼochʼ. Wankebʼ nekeʼxkʼut naq moko naabʼal mil chihabʼ ta xyiibʼankil li Ruuchichʼochʼ. Abʼanan, li Santil Hu naxye naq li Ruuchichʼochʼ ut li choxachʼochʼ ak wank chaq rubʼelaj li waqibʼ kutan li kiyobʼtesimank wi’ chixjunil (Génesis 1:1, Wy). Joʼkan bʼiʼ, naq ebʼ laj chamalnawom nekeʼxye naq ak naabʼal mil miyon chihabʼ tana xyiibʼankil li Ruuchichʼochʼ, ebʼ laj testiiw re li Jehobʼa inkʼaʼ nekeʼxtzʼeqtaana li naʼlebʼ aʼin.

Usta ebʼ laj testiiw re li Jehobʼa nekeʼxpaabʼ naq wank ani kiyobʼtesink re chixjunil, inkʼaʼ nekeʼxtzʼeqtaana li naʼlebʼ li nekeʼxtzʼil rix ebʼ laj chamalnawom. Ut nekeʼxpaabʼ naq li Santil Hu ut li nekeʼxye ebʼ laj chamalnawom naxchap ribʼ.