Li nayeemank: Ebʼ laj testiiw re li Jehobʼa inkʼaʼ nekeʼxik rikʼin laj bʼanonel xbʼaan naq inkʼaʼ nekeʼxpaabʼ naq li bʼan nakʼanjelak.

 Li yaal: Ebʼ laj testiiw re li Jehobʼa nekeʼxkʼe xchʼool chi xik rikʼin laj bʼanonel li naxnaw kʼanjelak chiʼus. Naq jun qe malaj jun rehebʼ li qajunkabʼal nayajerk malaj tento tchoʼeʼq naqasikʼ laj bʼanonel li inkʼaʼ naroksi li kikʼ re choʼok. Ut oxloqʼ chiqu naq ak wank naabʼal li naʼlebʼ chirix aʼin. Saʼ naabʼal li tenamit yookebʼ xchoʼbʼal ebʼ li qas qiitzʼin joʼ chanru nekeʼchoʼeʼk ebʼ laj Testiiw xbʼaan naq aʼanebʼ inkʼaʼ nekeʼroksi li kikʼ. Saʼebʼ li qakutan yalaq ani naru naxpatzʼ li choʼeʼk aʼin re naq inkʼaʼ tixtaw li yajel li nachalk saʼ li kikʼ, inkʼaʼ tixkʼe saʼ chʼaʼajkilal li nakolok re li xjunxaqalil chi moko tixkʼe ribʼ saʼ chʼaʼajkilal wi teʼpaltoʼq laj bʼanonel.

 Li nayeemank: Ebʼ laj Testiiw nekeʼxye naq li paabʼal naxbʼanebʼ li qas qiitzʼin.

 Li yaal: Ebʼ laj Testiiw inkʼaʼ nekeʼxpaabʼ naq li paabʼal nabʼanok.

 Li nayeemank: Ebʼ laj Testiiw inkʼaʼ nekeʼxkʼulubʼa li kikʼ naq nekeʼchoʼeʼk xbʼaan naq terto xtzʼaq.

 Li yaal: Inkʼaʼ nekeʼxkʼulubʼa li kikʼ maawaʼ yal saʼ xkʼabʼaʼ ta naq terto xtzʼaq, nekeʼxbʼaanu bʼan xbʼaan naq nekeʼkʼiraak saʼ junpaat. a

 Li nayeemank: Rajlal chihabʼ, naabʼalebʼ laj Testiiw, joʼ kokʼal, yookebʼ chi kamk xbʼaan naq inkʼaʼ nekeʼxkʼulubʼa naq teʼchoʼeʼq rikʼin kikʼ.

 Li yaal: Maakʼaʼ reetalil naq yaal aʼin. Saʼebʼ li qakutan, ebʼ laj bʼanonel inkʼaʼ yookebʼ roksinkil li kikʼ naq nekeʼxchoʼ li bʼaqel malaj li aanmej chi moko naq nekeʼxkʼe reqaj junaq li chaʼalej, jwal chʼaʼaj xbʼaanunkil aʼin. b Ebʼ li yaj li inkʼaʼ nekeʼxkʼulubʼa li kikʼ naq nekeʼchoʼeʼk juntaqʼeet nekeʼkawuuk malaj jwal us wiʼ chik chiruhebʼ li nekeʼxkʼulubʼa li kikʼ, joʼkan ajwiʼ nakʼulmank rikʼinebʼ li kokʼal. c Joʼkan bʼiʼ, maaʼani naru naxye naq junaq li yaj, tkamq, wi inkʼaʼ naxkʼul li kikʼ malaj inkʼaʼ tkamq wi tixkʼul li kikʼ.

 Nekeʼxbʼaanu aʼin saʼ xkʼabʼaʼ li nekeʼxpaabʼ, maawaʼ xbʼaan li bʼaneʼk. Saʼ li Najter Chaqʼrabʼ ut saʼ li Akʼ Chaqʼrabʼ naxye qe naq inkʼaʼ tqoksi li kikʼ (Génesis 9:4; Levítico 17:10; Deuteronomio 12:23; Hechos 15:28, 29). Ut choʼq re li Yos, li kikʼ aʼan reetalil li yuʼam (Levítico 17:14, Li Santil Hu, Wycliffe Bible Translators). Joʼkan naq, ebʼ laj Testiiw nekeʼxpaabʼ li taql li wank saʼ li Santil Hu bʼarwiʼ naxye naq inkʼaʼ t-oksimanq li kikʼ xbʼaan naq nekeʼroxloqʼi li Yos, li kikʼehok re li qayuʼam.

 Kiwank xqʼehil naq ebʼ laj bʼanonel keʼxkʼoxla naq xiwxiw roksinkil ebʼ li naʼlebʼ re choʼok bʼarwiʼ inkʼaʼ naʼoksimank li kikʼ ut keʼxye ajwiʼ naq ebʼ li yaj li inkʼaʼ nekeʼxkʼulubʼa li kikʼ yal nekeʼxkamsi ribʼ xjunes. Abʼan, li kʼaʼuxej aʼin ak xjalaak saʼ xnumikebʼ li chihabʼ. Jun eetalil, saʼ li 2004 kiʼelk jun li tasal hu chirix li bʼan li naxye: «Naabʼal rehebʼ li naʼlebʼ li naʼoksimank re xbʼanbʼalebʼ laj Testiiw aʼan li t-oksimanq chiruhebʼ li chihabʼ li xeʼchalk chiqu». d Ut saʼ li 2010, li tasal hu Medicina transfusional kixye naq saʼ xkʼabʼaʼ ebʼ li chaabʼil naʼlebʼ aʼin «tooruuq chik chi choʼok chi inkʼaʼ tqoksi li kikʼ ut xbʼaanunkil wulaj wulaj».

 Saʼ chixjunil li Ruuchichʼochʼ, chi mil ebʼ laj bʼanonel inkʼaʼ nekeʼroksi li kikʼ naq nekeʼchoʼok ut nekeʼroksi ebʼ li akʼ naʼlebʼ li natenqʼank re naq inkʼaʼ tjoyeʼq naabʼal li kikʼ. Li choʼok aʼin jwal chʼaʼaj. Li chaabʼil naʼlebʼ aʼin naru nekeʼxbʼaanu saʼebʼ li tenamit li qʼaxal nebʼaʼebʼ, ut naabʼalebʼ li poyanam li maawaʼebʼ aj Testiiw nekeʼxpatzʼ ajwiʼ li choʼeʼk joʼ aʼin.