Kʼaʼut ebʼ laj testiiw re li Jehobʼa inkʼaʼ nekeʼxnima li Domingo re Paswa?
Li nayeemank ut li yaal
Li nayeemank: Ebʼ laj testiiw re li Jehobʼa inkʼaʼ nekeʼxnima li Domingo re Paswa malaj li xwaklijik chi yoʼyo li Jesús, xbʼaan naq inkʼaʼ nekeʼxtaqe li Kriist.
Li yaal: Nekeʼxpaabʼ naq li Jesukriist aʼan laj Kolonel ut nekeʼxkʼe xqʼe re xkʼambʼal rehebʼ rikʼin (1 Pedro 2:21; Lucas 2:11).
Li nayeemank: Inkʼaʼ nekeʼxpaabʼ naq li Jesús kiwakliik chi yoʼyo.
Li yaal: Moko kaʼaj tawiʼ nekeʼxpaabʼ naq li Jesús kiwakliik chi yoʼyo, chʼolchʼo bʼan chiruhebʼ naq aʼan rubʼelankil li xpaabʼalebʼ li nekeʼxtaqe li Kriist. Ut aʼin jun rehebʼ li naʼlebʼ li wank xwankil chirix li esil li nekeʼxpuktesi (1 Corintios 15:3, 4, 12-15).
Li nayeemank: Nekeʼxram chiruhebʼ li xkokʼal rilbʼal xsahil ebʼ li ninqʼe.
Li yaal: Nekeʼxra ebʼ li xkokʼal ut nekeʼxkʼe xchʼool chi xtzolbʼalebʼ ut nekeʼxsikʼ chanru teʼxsahobʼresi xchʼoolebʼ (Tito 2:4).
Kʼaʼut ebʼ laj Testiiw inkʼaʼ nekeʼxnima li Domingo re Paswa?
Ebʼ li naʼlebʼ li naxchap ribʼ rikʼin li Domingo re Paswa li nekeʼxbʼaanu saʼ wiibʼ oxibʼ li tenamit moko chalenaq ta saʼ li Santil Hu.
Li Jesús kixye naq tjultikamanq li xkamik, inkʼaʼ li xwaklijik chi yoʼyo. Rajlal chihabʼ, ebʼ laj testiiw re li Jehobʼa nekeʼxnima li xkamik li Jesús saʼ li kutan naq kikamk joʼ naxye li ajlebʼaal kutan rehebʼ laj judiiy (Lucas 22:19, 20).
Naqataw ru naq naabʼal rehebʼ li naʼlebʼ li naxchap ribʼ rikʼin li Domingo re Paswa moko naxkʼulubʼa ta li Yos xbʼaan naq nachalk saʼebʼ li najteril naʼlebʼ chirix li xyosil li alank malaj li muxuk ibʼ. Li Yos naxye naq kaʼajwiʼ aʼan tloqʼoniiq ru ut wi naqayuʼami li xkʼutum ebʼ li paabʼal li inkʼaʼ nawulak chiru trahoʼq xchʼool (Éxodo 20:5; 1 Reyes 18:21).
Saʼ xkʼabʼaʼ naq chʼolchʼo chiqu li naxkʼut li Santil Hu inkʼaʼ naqanima li Domingo re Paswa. Ut li Santil Hu naxye qe naq tqoksi «li naʼlebʼ li qʼaxal nakʼanjelak ut li seebʼal kʼaʼuxl» chiru naq tqataqe saʼ mutzʼil li najteril naʼlebʼ (Proverbios 3:21, La Biblia. Traducción del Nuevo Mundo, 2019 saʼ español; Mateo 15:3). Ut naqachʼolobʼ saʼ tuulanil chiruhebʼ li nekeʼpatzʼok qe chirix li naqapaabʼ ut chʼolchʼo chiqu naq li junjunq yaal re li tixbʼaanu (1 Pedro 3:15).