Li nayeemank: Ebʼ laj testiiw re li Jehobʼa inkʼaʼ nekeʼxnima li Ralankil malaj li paas xbʼaan naq inkʼaʼ nekeʼxpaabʼ li Jesús.

Li yaal: Nekeʼxpaabʼ li Kriist ut chʼolchʼo chiruhebʼ naq kaʼajwiʼ saʼ xkʼabʼaʼ li Kriist natawmank li kolbʼa ibʼ (Hechos 4:12).

Li nayeemank: Nekeʼxjach ebʼ li junkabʼal naq nekeʼxkʼut chiruhebʼ li poyanam naq moko us ta xnimankil li Ralankil.

Li yaal: Wank bʼan xwankil li junkabʼal choʼq rehebʼ joʼkan naq nekeʼxkʼut li chaabʼil naʼlebʼ li wank saʼ li Santil Hu re naq teʼxkawresi li xwanjikebʼ.

Li nayeemank: Inkʼaʼ nekeʼxtaw «xsahil li Ralankil» joʼ li wotzok, li tuqtuukilal ut li junajil li naʼilmank chiruhebʼ li kutan aʼan.

Li yaal: Nekeʼxkʼe xqʼe chi wank saʼ tuqtuukilal ut nekeʼsiʼink wulaj wulaj chiru li chihabʼ (Proverbios 11:25; Romanos 12:18). Jun eetalil, inkʼaʼ nekeʼpatzʼok tumin saʼebʼ li xchʼutam chi moko naq nekeʼpuktesink, nekeʼxpaabʼ bʼan li xtaql li Jesús: «Chi maatan xekʼul, ut chi maatan [...] teekʼe» (Mateo 10:8, Li Santil Hu, Sociedad Bíblica de Guatemala). Ut nekeʼxpuktesi li Xnimajwal Awabʼejilal li Yos li tixkʼam chaq li tuqtuukilal (Mateo 10:7).

• Li Jesús kixye naq tjultikamanq li xkamik, inkʼaʼ li xyoʼlajik (Lucas 22:19, 20).

• Chi moko ebʼ li xʼapóstol li Jesús chi moko ebʼ li xbʼeen aj paabʼanel keʼxnima chaq li Ralankil. Joʼ naxye li Diccionario del cristianismo, li ninqʼe aʼin «kitiklaak saʼ Roma saʼ li chihabʼ 330» re li qakutan, naq ak xnumeʼk wiibʼ siʼeent chihabʼ xkamikebʼ li apóstol.

• Maakʼaʼ reetalil naq li Jesús kiyoʼlaak saʼ li 25 re diciembre joʼkan naq li Santil Hu inkʼaʼ naxye xkutankil li xyoʼlajik.

• Chʼolchʼo chiruhebʼ laj Testiiw naq li Yos inkʼaʼ naxkʼulubʼa li Ralankil xbʼaan naq chalenaq saʼ li najteril naʼlebʼ ut saʼ li bʼalaqʼil paabʼal (2 Corintios 6:17).

Usta nekeʼxnaw naq li Ralankil inkʼaʼ naxchap ribʼ rikʼin li Santil Hu ut naq chalenaq saʼ li bʼalaqʼil paabʼal, naabʼalebʼ nekeʼxnima xbʼaan naq nekeʼxkʼoxla naq moko maak ta xbʼaanunkil ut inkʼaʼ nekeʼraj wechʼiik.

Li Santil Hu naxye qe naq tqoksi li xseebʼal qakʼaʼuxl re naq chiqajunqal tqanaw kʼaru tqabʼaanu (Romanos 12:1, 2). Naxkʼut ajwiʼ chiqu roxloqʼinkil li yaal (Juan 4:23, 24). Aʼin moko naraj ta xyeebʼal naq maakʼaʼ naqaj re li teʼxkʼoxla chiqix chi moko tqaqʼet qibʼ chiru li naʼlebʼ li naxkʼe li Santil Hu yal re naq inkʼaʼ tooʼeʼxwechʼ.

Usta laaʼo ak xqakʼubʼ saʼ qachʼool naq inkʼaʼ tqanima li Ralankil, inkʼaʼ naqaram chiruhebʼ li junchʼol xnimankil xbʼaan naq li junjunq yaal re li tixbʼaanu.