Ebʼ laj testiiw re li Jehobʼa nekeʼxpaabʼ naq li naʼlebʼ ut li chaqʼrabʼ li wank saʼ li Santil Hu nokooxtenqʼa re xbʼaanunkil li nawulak chiru li Yos ut re naq us tooʼelq saʼ li qayuʼam (Isaías 48:17, 18). Moko yal ta naqayoobʼ ebʼ li naʼlebʼ aʼin. Abʼan naqayuʼami. Qilaq junjunq rehebʼ aʼin li naxchap ribʼ rikʼinebʼ li yookebʼ xnawbʼal ribʼ re sumlaak. a

•   Li sumlaak moko yal ta re wiibʼ oxibʼ chihabʼ (Mateo 19:6). Joʼ aj testiiw re li Jehobʼa naqakʼoxla naq wi jun li sumal yookebʼ xnawbʼal ribʼ aʼan re naq teʼsumlaaq. Joʼkan naq aʼan jun li naʼlebʼ li qʼaxal wank xwankil choʼq qe.

•   Wi toj saajat, moko us ta naq taanaw ru junaq re sumlaak. Kaʼajwiʼ teʼruuq chi sumlaak li moko mas saajebʼ ta chik, li naraj xyeebʼal naq xeʼxqʼax li xqʼehil bʼarwiʼ li tibʼelej narataw wank rikʼin anihaq (1 Corintios 7:36).

•   Re xnawbʼal ru junaq tento naq maakʼaʼ tramoq chaawu sumlaak. Usta junaq kixraq li xsumlajik moko naraj ta xyeebʼal naq li Yos naxkʼulubʼa naq tsumlaaq wiʼ chik. Kaʼajwiʼ wi junaq kixmux li xsumlajik naru teʼxraq li xsumlajik (Mateo 19:9).

•   Ebʼ laj paabʼanel li teʼraj sumlaak tento teʼxbʼaanu rikʼin li rechpaabʼanelil (1 Corintios 7:39). Aʼin naraj xyeebʼal naq joʼ aj Testiiw tento naq toosumlaaq rikʼin junaq li kikubʼeek xhaʼ joʼ aj Testiiw ut inkʼaʼ yal rikʼin junaq li naxkʼulubʼa li naqapaabʼ (2 Corintios 6:14). Li Yos junelik naxpatzʼ rehebʼ laj kʼanjel chiru naq teʼsumlaaq rikʼin li rechpaabʼanelil (Génesis 24:3; Malaquías 2:11). Joʼkan ajwiʼ li wankebʼ xnawom nekeʼxye naq wank xwankil xbʼaanunkil aʼin. b

•   Ebʼ li alal kʼajolbʼej tento teʼabʼinq chiru li xnaʼ xyuwaʼ (Proverbios 1:8; Colosenses 3:20). Li toj wankebʼ saʼ rochoch li xnaʼ xyuwaʼ tento teʼxpaabʼ li chaqʼrabʼ li nekeʼxkʼe chirix xnawbʼal ru junaq re sumlaak. Aʼin naxchap ribʼ rikʼin jarubʼ chihabʼ wank rehebʼ naq teʼxnaw ru junaq ut kʼaru teʼruuq xbʼaanunkil.

•   Li Santil Hu naxye naq «li junjunq tixkʼam li riiq» (Gálatas 6:5). Joʼkan naq rikʼin xtenqʼ li Santil Hu yaal chik qe ma tqaj xnawbʼal ru anihaq. Usta joʼkan naabʼalebʼ nekeʼxpatzʼ xnaʼlebʼ rikʼinebʼ laj Testiiw li kawebʼ xpaabʼal, li nekeʼraj li us choʼq rehebʼ (Proverbios 1:5).

•   Naabʼal li naʼlebʼ li nekeʼxbʼaanu anaqwan ebʼ li qas qiitzʼin naq yookebʼ xnawbʼal ru junaq re sumlaak nimla maak. Li Santil Hu naxye qe naq inkʼaʼ tqamux qibʼ. Aʼin moko kaʼaj tawiʼ naraj ta xyeebʼal naq jun li winq ut jun li ixq xeʼwank saʼ wiibʼal ut moko sumsukebʼ ta, naraj ajwiʼ xyeebʼal xchʼeʼbʼal malaj xbʼatzʼunlenkil li xtzʼejwal junaq chik, xchʼikbʼal xtzʼejwal saʼ re junaq chik li kristiʼaan, saʼ rit malaj jalan chik (1 Corintios 6:9-11). Joʼkan ajwiʼ, wi jun li sumal nekeʼxtzʼubʼ ribʼ ut nekeʼxchʼeʼ ribʼ toj reetal teʼraj wank saʼ wiibʼal, aʼan jun li tzʼaj aj naʼlebʼ chiru li Yos usta maare moko xeʼxmux ta ribʼebʼ (Gálatas 5:19-21). Li Santil Hu naxtzʼeqtaana ajwiʼ li yibʼ aj aatin (Colosenses 3:8).

•   Li qachʼool malaj li qaanm naru nokooxbʼalaqʼi (Jeremías 17:9). Naru naxbʼaanu naq junaq li kristiʼaan tixbʼaanu li yibʼru aj naʼlebʼ. Re naq inkʼaʼ teʼbʼalaqʼiiq xbʼaan li xchʼoolebʼ, li sumal li yookebʼ xnawbʼal ribʼ inkʼaʼ nekeʼkanaak xjunesebʼ re naq inkʼaʼ teʼtʼaneʼq saʼ li aaleek. Naru naq teʼxkol ribʼebʼ chiru li chʼaʼajkilal wi nekeʼxik saʼ chʼuutal malaj rochbʼeen junaq laj paabʼanel li kaw xpaabʼal (Proverbios 28:26). Laj paabʼanel li naraj sumlaak naxnaw naq xiwxiw wi tixsikʼ xnawbʼal ru junaq saʼ internet xbʼaan naq moko naxnaw ta ru (Salmo 26:4).