Inkʼaʼ, ebʼ laj testiiw re li Jehobʼa moko xeʼxjach ta ribʼ chi moko xeʼelk ta chaq saʼ jun chik li paabʼal. Joʼ aj paabʼanel nekeʼxkʼe xqʼe chi xkʼambʼal rehebʼ rikʼin li Jesús ut nekeʼxyuʼami li xkʼutum.

Wank jalan jalanq li naʼlebʼ li nekeʼxye ebʼ li qas qiitzʼin chirix aʼin. Qilaq wiibʼ li naʼlebʼ ut qilaq ajwiʼ kʼaʼut nayeemank naq ebʼ laj Testiiw moko xeʼxjach ta ribʼ chi moko xeʼelk ta chaq saʼ jalan chik li paabʼal.

• Wankebʼ nekeʼxye naq li paabʼal li naxjach ribʼ malaj naʼelk chaq saʼ jalan chik li paabʼal aʼan jun li akʼ paabʼal li narisi ribʼ xjunes. Ebʼ laj testiiw re li Jehobʼa inkʼaʼ nekeʼxtikibʼ junaq li akʼ paabʼal. Nekeʼxkʼam bʼan rehebʼ rikʼin li xbʼeen aj paabʼanel ut rikʼinebʼ li xkʼutum, li wank saʼ li Santil Hu (2 Timoteo 3:16, 17). Chʼolchʼo chiruhebʼ naq saʼ li Santil Hu natawmank resil chanru xloqʼoninkil chi tzʼaqal re ru li Yos.

• Wankebʼ nekeʼxye naq li paabʼal li naxjach ribʼ malaj li naʼelk saʼ jalan chik li paabʼal, jwal xuwajel ru ut winq nekeʼxtaqe. Ebʼ laj testiiw re li Jehobʼa inkʼaʼ nekeʼxtaqe junaq winq malaj ixq, nekeʼxpaabʼ bʼan li kixye li Jesús rehebʼ li xtzolom: «Jun ajwiʼ laj Kʼamol eebʼe, aʼan li Kriist» (Mateo 23:10, Li Santil Hu, Sociedad Bíblica de Guatemala).

Moko xuwajel ta li xpaabʼalebʼ, naxtenqʼahebʼ bʼan laj Testiiw ut ebʼ li poyanam li wankebʼ chi xsutam. Jun eetalil, li chaabʼil esil li naqapuktesi ak xtenqʼa naabʼalebʼ li qas qiitzʼin re naq teʼxkanabʼ ukʼaʼk ut roksinkil li bʼan li nakanobʼresink u. Ut moko kaʼaj tawiʼ nekeʼxkʼut li yaal chirix li Santil Hu, nekeʼxkʼut ajwiʼ ilok ru hu chiruhebʼ li qas qiitzʼin. Saʼ xkʼabʼaʼ aʼin chi miyon ebʼ li poyanam re chixjunil li Ruuchichʼochʼ ak xeʼxtzol ilok ru hu ut tzʼiibʼak. Nekeʼxik ajwiʼ chi tenqʼank bʼarwiʼ xwank li rahilal maare xbʼaan li habʼ, li iqʼ malaj li nimla hiik. Nekeʼxkʼe xqʼe chi xtenqʼankil ebʼ li ras riitzʼin, joʼ kixkʼut chaq li Jesús (Mateo 5:13-16).