Inkʼaʼ. Ebʼ laj testiiw re li Jehobʼa nekeʼxtaqe li Kriist, abʼan moko xeʼelk ta chaq rikʼinebʼ laj katoolk chi moko xeʼxjach ta ribʼ rikʼinebʼ.

Naabʼalebʼ li poyanam nekeʼxye naq ebʼ li iklees li nekeʼkʼabʼaʼiik protestante aʼanebʼ li inkʼaʼ nekeʼxkʼulubʼa li xkʼutum ebʼ laj katoolk re Roma ut xeʼxjach ribʼ rikʼinebʼ. Usta yaal naq ebʼ laj testiiw re li Jehobʼa inkʼaʼ nekeʼxkʼulubʼa naabʼal rehebʼ li xkʼutum ebʼ laj katoolk, moko xeʼelk ta chaq rikʼinebʼ chi moko xeʼxjach ta ribʼ rikʼinebʼ. Qilaq wiibʼ li naʼlebʼ kʼaʼut naqaye aʼin:

1. Naabʼal rehebʼ li xkʼutum ebʼ li iklees li xeʼxjach ribʼ rikʼinebʼ laj katoolk inkʼaʼ naxchap ribʼ rikʼin li naxkʼut li Santil Hu. Jun eetalil, li Santil Hu inkʼaʼ naxkʼut naq li Yos oxibʼ ru, naxye bʼan naq «jun ajwiʼ chi Yos» (1 Timoteo 2:5, Li Santil Hu, Sociedad Bíblica de Guatemala, SBG; Juan 14:28). Chi moko naxkʼut ta naq li Yos naxrahobʼtesihebʼ saʼ xaml li yiibʼebʼ ru xnaʼlebʼ, naxye bʼan naq teʼosoʼq chi junajwa (Salmo 37:9; 2 Tesalonicenses 1:9).

2. Ebʼ laj testiiw re li Jehobʼa inkʼaʼ yookebʼ xsikʼbʼal chanru xchaabʼilobʼresinkil li xkʼutumebʼ laj katoolk malaj junaq chik li paabʼal. Li rajomebʼ laj testiiw re li Jehobʼa aʼan xpuktesinkil li chaabʼil esilal chirix li Xʼawabʼejilal li Yos ut xwaklesinkilebʼ xchʼool ebʼ li qas qiitzʼin re naq teʼxpaabʼ li chaabʼil esil (Mateo 24:14; 28:19, 20). Ebʼ laj Testiiw inkʼaʼ yookebʼ xsikʼbʼal chanru xchaabʼilobʼresinkil junaq li paabʼal, nekeʼraj bʼan xkʼutbʼal li yaal chirix li Yos ut chirix li Santil Hu rehebʼ li nekeʼraj rabʼinkil (Colosenses 1:9, 10; 2 Timoteo 2:24, 25).