Ebʼ laj Testiiw inkʼaʼ nekeʼxninqʼehi xkutankil li yoʼlajik, xbʼaan naq inkʼaʼ nawulak chiru li Jehobʼa. Usta li Santil Hu inkʼaʼ naxchʼolobʼ chi tzʼaqal re ru naq inkʼaʼ tqaninqʼehi li ninqʼe aʼin, abʼan nokooxtenqʼa re xnawbʼal kʼaru naxkʼoxla li Jehobʼa. Qilaq kaahibʼ li naʼlebʼ ut kʼaru naxye li Santil Hu chirix.

1.   Xninqʼehinkil li xkutankil li yoʼlajik chalenaq saʼ li bʼalaqʼil paabʼal. Jun li hu naxye naq kitiklaak li ninqʼe aʼin xbʼaan naq nekeʼxpaabʼ naq «ebʼ li maaʼus aj musiqʼej naru naxrahobʼtesi li yook xninqʼehinkil li xkutankil li xyoʼlajik» abʼan «naq nekeʼwulak li ramiiw naru nekeʼxkol rix» (Funk & Wagnalls Standard Dictionary of Folklore, Mythology, and Legend). Jun chik li hu naxye naq junxil naq nekeʼxtzʼiibʼa li xkutankil li yoʼlajik «aʼan re xyeebʼal kʼaru aasuʼeert», «naq nekeʼxtzʼil rix li chahim». Li hu aʼin naxye ajwiʼ naq ebʼ li kristiʼaan nekeʼxpaabʼ naq «li kandeel li nekeʼroksi saʼ li ninqʼe aʼin, naru naxbʼaanu naq teʼxtaw li teʼraj» (The Lore of Birthdays).

    Abʼan, li Santil Hu naxtenebʼ maak saʼ xbʼeen li natuulak, li naqʼehink, li naril saʼ uqʼej malaj junaq chik li naʼlebʼ joʼ aʼan (Deuteronomio 18:14; Galátas 5:​19-21). Jun rehebʼ li xyaalal kʼaʼut li Jehobʼa kixsach li tenamit Babilonia aʼan xbʼaan naq nekeʼqʼehink (Isaías 47:11-15). Joʼ aj Testiiw inkʼaʼ naqakʼe xwankil bʼar chalenaq li junjunq chi ninqʼe; naqakʼe bʼan qachʼool chi xpaabʼankil li naxye li Santil Hu chirix li naʼlebʼ aʼin.

2.   Ebʼ li xbʼeen aj paabʼanel inkʼaʼ xeʼxninqʼehi li xkutankil li yoʼlajik. Jun li hu naxye naq ebʼ li xbʼeen aj paabʼanel «nekeʼxpaabʼ naq xninqʼehinkil li kutan aʼin chalenaq saʼ li bʼalaqʼil paabʼal» (The World Book Encyclopedia). Joʼkan naq li Santil Hu naxye naq ebʼ li apóstol ut ebʼ li junchʼol li xeʼtzoleʼk xbʼaan li Jesús, nekeʼxkanabʼ jun chaabʼil eetalil choʼq qe (2 Tesalonicénses 3:6).

3.   Kaʼajwiʼ li xkamik li Jesús naru naqaninqʼehi ru (Lucas 22:17-20). Yaal aʼin, xbʼaan naq li Santil Hu naxye naq «jwal us li xkutankil li kamik chiru li xkutankil li yoʼlaak» (Eclesiastés 7:1, Li Santil Hu, Sociedad Bíblica de Guatemala). Li wank xwankil chiru li Jesús aʼan xkutankil li xkamik ut maawaʼ li xyoʼlajik (Hebreos 1:4).

4.   Maajunwa naxye li Santil Hu naq jun aj kʼanjel chiru li Jehobʼa kixninqʼehi li xkutankil li xyoʼlajik. Aʼin moko jun ta li paltil li xeʼxbʼaanu li xeʼtzʼiibʼank re li Santil Hu, xbʼaan naq chisaʼ natawmank resil wiibʼ li winq li xeʼxninqʼehi li xkutankil naq xeʼyoʼlaak, abʼan moko chaabʼil naʼaatinak chirixebʼ (Génesis 40:20-22; Marcos 6:​21-29).

 Ebʼ laj Testiiw, nekeʼxra ebʼ li xkokʼal ut chiru li chihabʼ nekeʼxkʼe ebʼ li xmaatan ut nekeʼninqʼehik re naq sahaqebʼ ajwiʼ saʼ xchʼool. Joʼkan naq nekeʼxyal xqʼe xkʼambʼal re rikʼin li Yos xbʼaan naq aʼan nakʼehok chi anchal xchʼool (Mateo 7:​11). Joʼkan naq, ebʼ li xkokʼal ebʼ laj Testiiw moko rahebʼ ta saʼ xchʼool ut aʼin nekeʼxye junjunq rehebʼ:

•   «Mas us wiʼ chik naq teʼxkʼe aamaatan naq inkʼaʼ nakaawoybʼeni» (Tammy, 12 chihabʼ).

•   «Linnaʼ linyuwaʼ inkʼaʼ nekeʼxkʼe inmaatan saʼ xkutankil naq xinyoʼlaak, nekeʼxkʼe saʼ junaq chik li kutan. Ut aʼin jwal nawulak chiwu» (Gregory, 11 chihabʼ).

•   «Inkʼaʼ nawulak chiwu ebʼ li ninqʼe bʼarwiʼ ebʼ li kokʼal kaʼajwiʼ nekeʼwaʼak ut nekeʼbʼichank. Li naqabʼaanu saʼ li wochoch jwal chʼinaʼus chik chiru aʼan!» (Eric, 6 chihabʼ).