Li xBrooke a’an jun aj testiiw re li Jehob’a li wank sa’ Estados Unidos. Chiru li nimla yajel COVID-19, kipuktesink rik’in xtz’iib’ankil eb’ li esilhu. Rajlal xamaan naab’al li esilhu kixtz’iib’a, ab’anan naq ak xnume’k kach’in chik ma wiib’ chihab’ kich’ina xch’ool, xb’aan naq, chalen naq kixtikib’, jun ajwi’ li poyanam kixsume chiru…, re xyeeb’al re naq maajunwa chik tixtz’iib’a. Li xBrooke kixk’oxla naq maak’a’ aj e naq naxyal xq’e chi xtz’iib’ankil eb’ li esilhu.

 Ab’an, sa’ xnumikeb’ li kutan li xKim jun chik aj testiiw ut rechk’anjel sa’ li banco, kixye re li xBrooke naq ki’aatinak rik’in jun li winq sa’ li xk’anjel. Li winq a’in kixye re li xKim naq kixk’ul jun li esilhu li tz’iib’anbil chi uq’ej xb’aan jun aj testiiw re li Jehob’a. Ut li esilhu a’in tz’iib’anb’il xb’aan li xBrooke! Jun xamaan xnumik li winq kisutq’iik wi’ chik sa’ li banco ut kixpatz’ re li xKim ma truuq chi tz’aqonk sa’ li qach’utam, li toj na’uxmank chaq sa’ b’ideoconfereens.

 Wiib’ oxib’ kutan chirix a’an, laj David, jun chik aj Testiiw, kixye re li xBrooke naq jun li rechk’anjel, kixk’ul jun reheb’ li x’esilhu; sachso tz’aqal xch’ool kikanaak naq kiril li esilhu tz’iib’anb’il chi uq’ej. Kixye: «Us raj naq naab’aleb’ li poyanam te’xk’e raj xch’ool chirixeb’ li junch’ol». Laj David kixk’e xkomon li esil chiru ut kixpatz’ re ma twulaq raj chiru junaq li tasalhu chirix li Santil Hu. Li rechk’anjel kixk’ulub’a chi anchal xch’ool ut kixb’anyoxi.

 Ch’olch’o chiruheb’ laj testiiw re li Jehob’a naq moko junelik ta neke’xk’e reetal joq’e namoq jun li ch’ina iyaj sa’ li puktesink (Eclesiastés 11:5, 6). Ab’an li kixk’ul li xBrook, kixk’ut chiru naq wank xyaalal chixjunil li naxb’aanu chirix li puktesink (1 Corintios 3:6).