«Najter yookin royb’eninkil naq tinxb’oq»
Laj Ed ut li xJennie xe’xyal xtikibʼankil puktesink saʼ teléfono saʼ li chihabʼ 2010. a Li xJennie naxye: «Inkʼaʼ bʼayaq kiwulak chiwu, xinye re linbʼeelom naq maajunwa chik tinbʼaanu». Joʼkan ajwiʼ kirekʼa ribʼ laj Ed, aʼan kixye: «Inkʼa nawulak chiwu naq nikineʼxbʼoq yal re loq’ok, joʼkan naq inkʼaʼ sa nawekʼa wibʼ chi puktesink saʼ teléfono».
Naq kitiklaak li nimla yajel COVID-19, ebʼ laj testiiw re li Jehob’a keʼxkanabʼ puktesink chirekabʼlal. Abʼan, saʼ xkʼabʼaʼ naq ebʼ aʼan nekeʼxpaabʼ li chaqʼrabʼ li kixye li Jesús re aatinak chirix li chaabʼil esil, joʼkan naq yookebʼ chi puktesink rikʼin esilhu ut saʼ teléfono (Mateo 24:14; 28:19, 20). Joʼkan ajwiʼ chixjunil ebʼ li chʼutam kiʼok chi uxmank saʼ Zoom joʼ ajwiʼ li chʼutam re puktesink. Saʼ jun rehebʼ li chʼutam re puktesink laj Ed kixkawresi xchʼool chi puktesink wiʼ chik saʼ teléfono. Chanru xrekʼa ribʼ naq ok raj re chi bʼoqok? Aʼan naxye: «Kʼajoʼ inxiw, joʼkan naq kin’ok chi tijok chiru li Jehobʼa re naq tinxtenqʼa. Chirix a’an, xinbʼoqok ut saʼ li hoonal aʼan xinnaw ru laj Tyrone». b
Laj Tyrone ut li rixaqil li x’Edith wankebʼ saʼ jun li kʼalebʼaal re Kentucky (Estados Unidos). A’an wank 83 chihabʼ re ut inkʼaʼ chik sa naʼilok. Usta joʼkan kixkʼulubʼa li xtzolom chirix li Santil Hu li kixyeechi’i re laj Ed. Laj Tyrone naril li tasal hu rikʼin jun li lupa ut kiʼok xtzolbʼal li Santil Hu rikʼin laj Ed saʼ teléfono.
Maare ak numenaq jun po chik naq laj Tyrone ut li x’Edith xe’xtikibʼ tzʼaqonk sa’ebʼ li chʼutam rikʼin li chʼuut li wank saʼ li xteep. Abʼan, saʼ xkʼabʼaʼ naq maakʼa’ li x’internet, yal nekeʼrabʼi li chʼutam saʼ teléfono. Kʼaʼut kiwulak chiru li x’Edith li yook xtzolbʼal li xbʼeelom?
Naq yookebʼ chi tzolok rikʼin laj Tyrone, laj Ed ut li xJennie nekeʼrabʼi chi najt naq li x’Edith naxtenqʼa laj Tyrone chi xtawbʼal li xsumenkil ebʼ li patzʼom ut xsikʼbʼal xraqal li Santil Hu. Abʼan kaʼajwiʼ aʼan naxbʼaanu, ut inkʼa natzʼaqonk chi sumenk. Li xJennie naxye: «Naʼabʼimank rikʼin li xyaabʼ xkux naq jwal ra chaq saʼ xchʼool naq naʼaatinak, abʼan inkʼa’ naqataw ru kʼa’ut».
Laj Ed ut li xJennie yookeb’ chi puktesink sa’ teléfono.
Saʼ jun kutan, li xJennie kiraj aatinak rikʼin li x’Edith. Ut, naq kixkʼe ribʼ chiru, kixye re laj Ed naq tixtoʼoni re li teléfono ut kixye: «Tyrone nawabʼi xyaabʼ xkux laawixaqil chi najt, nawaj xpatzʼbʼal jun usilal re, naq tixyaabʼasi jun li xraqal li Santil Hu malaj tixye junaq li sumenk».
Li x’Edith chʼanchʼo kikanaak jun kʼamok, ut moqon sa’ q’unil kiʼaatinak ut kixye: «Nawaj raj ajwiʼ aatinak eerikʼin. Laaʼin ajwiʼ aj testiiw re li Jehobʼa abʼan numenaq 40 chihabʼ ink’a’ chik nintzʼaqonk».
Li xJennie kixye: «Laaʼat inhermaan!». Sachso xchʼool kikanaak, ut saʼ wiibʼal xeʼyotʼeʼk xchʼool ut xe’ok chi yaabʼak.
Saʼ xnumikebʼ li kutan, laj Ed kixkʼe re li x’Edith li hu li naxkʼabʼaʼi Jehová desea que vuelva, ut chirix chik aʼan laj Ed ut li xJennie xeʼxkʼe reetal naq xʼok chi jalaak li xnaʼlebʼ li x’Edith. Laj Ed naxye: «Naq xqatikibʼ li tzolok, naʼabʼimank saʼ li xyaabʼ xkux li x’Edith naq ra xchʼool. Abʼan anaqwan naʼabʼimank naq jwal sa saʼ li xchʼool». Li x’Edith timil timil xʼok xkawresinkil li xpaabʼal, ut anaqwan sa saʼ xchʼool xbʼaan naq xʼok wiʼ chik chi tzʼaqonk joʼ aj puktesinel. Saʼ Julio 2022 kikubʼeek xhaʼ li xbʼeelom li x’Edith ut anaqwan wank joʼ aj testiiw re li Jehobʼa.
Naq laj Ed naxk’oxla chanru naril li puktesink saʼ teléfono junxil, najultiko’k re naq ki’aatinak rikʼin laj Tyrone. Naq kixyaabʼasi Juan 6:44, kixchʼolobʼ chiru naq li Jehobʼa naxbʼoqebʼ li kristi’aan re te’tzʼaqonk chi xloqʼoninkil ru. Laj Tyrone kixye re naq tzʼaqal yaal li yook xyeebʼal. Ut kixye ajwiʼ: «Najter yookin roybʼeninkil naq tinxbʼoq». Nasaho’k ajwi’ saʼ xchʼool li xJennie xbʼaan naq xe’ruuk ajwiʼ puktesink saʼ teléfono rochbʼen li xbʼeelom. Aʼan naxye: «Li Jehobʼa nokoorosob’tesi naq naqayal qaqʼe chiru».