«Li Jehob’a kixkol li qayu’am»
Sa’ 2005, li xSowbhagya li wank chaq aran India kikamk li xb’eelom. Naq toj yo’yo chaq, chaab’il kixch’olani li rixaqil ut li xMeghana li xrab’in li wank oxib’ chihab’ re. Ab’an anaqwan q’axal nach’a’ajkoʼk chiru li xSowbhagya xtawb’al xtumin re xnumsinkil li kutan.
Ut q’axal ra wiʼ chik kixk’ul xSowbhagya xb’aan naq kitz’eqtaanaak xb’aaneb’ li junch’ol. Moko sa ta neke’ile’k xb’aaneb’ li rechalal xb’aan naq neb’a’eb’ ut chanchaneb’ jun li iiq cho’q reheb’. Na’ajmank chiru li xSowbhagya naq tk’ojob’aaq xch’ool, jo’kan naq kixtikib’ xik sa’ jun li iklees li nach’ wank chixk’atq, ab’an aran xe’xtz’eqtaana ajwi’ xb’aan naq neb’a’. Jo’kan ajwi’ x’ok xsik’b’al junaq xk’anjel ab’an maab’ar naxtaw.
A’an naxye: «Q’axal yook chaq ink’a’uxl jo’kan naq xink’oxla xkamsinkil wib’. Sa’ xk’ab’aʼ naq numtajenaq ajwi’ li ch’a’ajkilal tixk’ul linko’ naq maa’aniqin chik, xink’oxla xkamsinkil qib’ sa’ wiib’al». Chi numtajenaq xrahil xch’ool ut chi maak’a’ royb’enihom, li xSowbhagya xkoho xloq’b’al li b’eneen.
Naq ak wank chik sa’ li tren re sutq’iik sa’ rochoch, li x’Elizabeth, jun aj testiiw re li Jehob’a kijilok chixk’atq ut ki’ok chi raatinankil. Li xSowbhagya kixye re naq ink’a’ naru xtawb’al b’ar tk’anjelaq, ut li x’Elizabeth kixye re naq tixtenq’a chi xtawb’al junaq li xk’anjel. Kixye ajwi’ re naq yook chi xik chi k’ehok tzolom chirix li Santil Hu. Kisach xch’ool xSowbhagya xb’aan naq, usta naab’al li iklees kirula’ani, maajun sut kirab’i naq neke’xk’e li tzolom chirix li Santil Hu. Jo’kan naq li x’Elizabeth kixye re naq naru trula’ani wi naraj xnawb’al xkomon.
Naq xwulak sa’ rochoch, li xSowbhagya toj yook xk’oxlankil xkamsinkil rib’. Ab’anan, jun li rech’alal kixk’am li xMeghana chi b’eek. Jo’kan naq kixk’oxla naq toj troyb’eni naq tsutq’iiq re xb’aanunkil li naraj.
Jo’kan naq xkoho chi rula’aninkil li x’Elizabeth, ut a’an kixk’ul chi sa sa’ xch’ool ut rik’in rahok. Kixk’ut chiru li tasal hu K’aru tz’aqal naxch’olob’ li Santil Hu? Li xSowbhagya kiwulak chiru li tzolom «B’ar wankeb’ li kamenaq?», xb’aan naq toje’ kikamk li xb’eelom. Sa’ ajwi’ li kutan a’an ki’ok xtzolb’al li Santil Hu.
Jo’kan ajwi’, li x’Elizabeth kixb’oq re naq txik chirix sa’ jun li nimla ch’utam li twanq sa’ li jun chik xamaan. K’ajo’ naq kiwulak chiru ut kixtoch’ xch’ool li kirab’i aran, jo’kan naq kixk’oxla naq naraj wank cho’q aj testiiw re li Jehob’a. Ut naq kisutq’iik sa’ rochoch, ke’xyechi’i jun xk’anjel.
Li xSowbhagya kixk’e xch’ool chi xtzolb’al li Santil Hu ut kixjal li xk’a’uxl, ink’a’ chik naraj xkamsinkil rib’ xb’aan naq kixtaw xyaalal li xyu’am. Sa’ xnumikeb’ li kutan, li xSowbhagya kixsub’ rib’ sa’ ha’ ut moqon chik li xMeghana li xko’. Anaqwan xkab’ichaleb’ neke’k’anjelak jo’ aj k’amolb’e sa’ li puktesink li neke’xb’aanu 50 hoor, ut li xMeghana natenq’ank ajwi’ sa’ jun reheb’ li ofisiin re jalok aatin re India.
xSowbhagya ut xMeghana sa’ li qakutan
Li xSowbhagya ut li xMeghana k’ajo’ neke’xb’anyoxi re li x’Elizabeth naq kijilok chixk’atq xSowbhagya sa’ li tren, kixk’e xch’ool chirix ut ki’aatinak rik’in chirix li yaal. Ab’an q’axal wi’ chik neke’xb’anyoxi chiru li Jehob’a. Li xMeghana naxye: «Junxil raj chik nokookamk wi ink’a’ raj xqanaw li yaal sa’ li kutan a’an. Ab’an anaqwan k’ajo’ xsahil qach’ool. Linna’ ut laa’in naqaj tz’aqal xq’alunkil linyuwa’, xseeraq’inkil re chirix li Jehob’a ut chanru kixkol li qayu’am».