Xinyo’laak sa’ li tenamit Calgary, aran Alberta (Canadá). Naq toj kach’inin chaq, linna’ inyuwa’ xe’xraq li xsumlajik, ut linna’ ut laa’in xooq’axonk rik’ineb’ linna’chin ut linyuwa’chin. A’aneb’ k’ajo’ nokoo’e’xra, ut sa chaq linch’ool rik’ineb’. Nawulak chiwu xjultikankil eb’ li chihab’ a’an naq wanko chaq sa’ tuqtuukilal.

 Naq wank chaq wuqub’ chihab’ we, xjalaak linyu’am. Linna’ xsumlaak wi’ chik rik’in linyuwa’ ut xooq’axonk aran San Luis, Misuri (Estados Unidos). Toj aran xink’e reetal naq linyuwa’ jwal yib’ru xna’leb’. Jun eetalil, naq xb’een sut xinwulak sa’ li tzoleb’aal ut xinsutq’iik sa’ wochoch, xk’e reetal naq junch’ol eb’ li kok’al xine’xtawasi ut naq laa’in maak’a’ xinb’aanu reheb’. K’ajo’ naq kijosq’o’k ut xinixtawasi wi’ chik chi’us. Xintzol rik’in ut xintikib’ pleetik rik’in jalaneb’ chik li kok’al.

 Li xyib’al ru xna’leb’ linyuwa’ naxk’e xjosq’il linna’, ut naab’al sut neke’xchoqi rib’ ut neke’pleetik. Xin’ok roksinkil li b’an li nakanob’resink u ut li ha’ li nakaltesink naq wank 11 chihab’ we. Q’axal josq’in ut rajlal ninpleetik chaq. Naq xink’ul wib’ sa’ li tzoleb’aal, li raaxiik’ ak xxe’ink sa’ linch’ool.

 Naq wank 18 chihab’ we, xin’ok chi tz’aqonk sa’ xyanqeb’ laj puub’ sa’ li Infantería de Marina re Estados Unidos. Ak ninyu’ami li raaxiik’, ab’an aran xintzol li kamsink. Naq ak xnume’k oob’ chihab’, xinkanab’ wank jo’ aj puub’ ut xin’ok sa’ li nimla tzoleb’aal xb’aan naq kiwaj raj k’anjelak sa’ xyanqeb’ li polisiiy li neke’k’ab’a’iik FBI. Xintikib’ tzolok aran Estados Unidos ut moqon xintiq ru lintzolb’al aran Canadá.

 Sa’ li nimla tzoleb’aal xch’inaak inch’ool sa’ xk’ab’a’ eb’ li poyanam li ka’ajwi’ xjunes neke’xk’oxla rib’. Nink’oxla chaq naq maak’a’ wank xyaalal ut naq maak’a’ ttuqub’anq ru eb’ li ch’a’ajkilal sa’ li ruuchich’och’. Maak’a’ chik woyb’enihom.

 Naq xink’e reetal naq linyu’am maak’a’ xyaalal, xintz’a wib’ sa’ li b’an li nakanob’resink u ut li ha’ li nakaltesink, ut ka’ajwi’ chirix li tumin ut li muxuk ib’ nink’oxlak. Junes sa’eb’ li ninq’e ninwank ut rik’in jalan jalanq eb’ li ixq. Sa’ xk’ab’a’ naq xinwank chaq jo’ aj puub nink’oxla naq maa’ani tq’axoq wu, jo’kan naq rajlal ninpleetik. Ninpleetik rik’in li yook rahob’tesinkil eb’ li junch’ol, nink’oxla naq chi kama’an yookin chi okenk chirix li tiikilal. Ab’an, li xyaalalil naq li raaxiik’ yook chaq chi taqlank sa’ inb’een.

 Sa’ jun kutan naq wankin rik’in jun li wamiiw sa’ wochoch, numtajenaq li b’an li nakanob’resink u xqaket ut yooko xlanb’al li marihuan re xk’ayinkil sa’ muqmu, li wamiiw kixpatz’ we wi ninpaab’ naq wank li Yos. Xinye re: «Wi li Yos wank re naq naab’al li rahilal wank sa’ ruuchich’och’, maak’a’ nawaj xnawb’al chirix!». Chi wulajaq, sa’ li xb’een kutan naq xin’ok sa’ jun li ak’ k’anjel, jun li wechk’anjel aj testiiw re li Jehob’a kixpatz’ we: «Ma nakaak’oxla naq li Yos wank re naq wank li rahilal sa’ ruuchich’och’?». Kisach inch’ool naq kixpatz’ we a’in xb’aan naq toja’ xin’aatinak chirix a’in ut xwaj raj xnawb’al. Jo’kan naq chiru waqib’ po naab’al sut xoo’aatinak, ut a’an kixsume rik’in li Santil Hu jalan jalanq li xninqal ru patz’om li nink’oxla chaq chirix li yu’am.

 Li ixqa’al rik’in li wankin chaq sa’eb’ li kutan a’an, ink’a’ naraj naq tinseeraq’i re li yookin chaq xtzolb’al. Sa’ jun domingo xinye re naq xinb’oq eb’ laj Testiiw sa’ qochoch re naq te’xk’e qatzolb’al chirix li Santil Hu. Chi wulajaq, naq xinsutq’iik chaq sa’ link’anjel, xink’e reetal naq ak xk’am chik li xk’aru re ut xinxkanab’. Xin’elk chirix kab’l ut xin’ok chi yaab’ak, xintz’aama chiru li Yos naq tinxtenq’a. A’an li xb’een sut naq xwoksi li xk’ab’a’ li Yos, Jehob’a, sa’ lintij (Salmo 83:18, TNM).

 Wiib’ kutan chik chirix a’an, xin’ok xtzolb’al li Santil Hu rik’in jun li sumal aj testiiw re li Jehob’a. Naq xe’koheb’, xin’ok rilb’al li tasal hu Usted puede vivir para siempre en el paraíso en la Tierra, li neke’roksi re k’utuk. Chiru jun q’oqyink xinchoy rilb’al. a Li xintzol chirix li Jehob’a ut li Jesukriist, li Ralal, xtoch’ inch’ool. Xintaw ru naq li Jehob’a naruxtaana qu ut naq ra narek’a naq naqak’ul li rahilal (Isaías 63:9). Jun li na’leb’ li q’axal kiwulak sa’ linch’ool a’an xnawb’al naq li Yos nikinxra ut naq li Ralal kikamk sa’ ink’ab’a’ (1 Juan 4:10). Xink’e reetal naq li Jehob’a kiwank xkuyum wik’in xb’aan naq «ink’a’ naraj naq taasachq junaq, naraj b’an naq chixjunileb’ te’yot’e’q xch’ool ut te’xjal xk’a’uxl» (2 Pedro 3:9, SBG). Xwek’a naq li Jehob’a naraj naq tinjiloq chixk’atq (Juan 6:44).

 Sa’ ajwi’ li xamaan a’an xintikib’ chi wulak sa’eb’ li ch’utam. Eb’ li kristi’aan neke’xuwak naq nikine’ril, cham chaq li wismal ut wank inka’xik, ab’an eb’ laj Testiiw xine’xk’ul chi sa sa’ xch’ool chanchan tawi’ naq laa’in jun reheb’ li xjunkab’al li junxil chik ink’a’ neke’ril ru. Xe’na’leb’ak jo’ tz’aqal aj paab’anel. Sa xwek’a wib’ aran, chanchan naq wankin chaq rik’ineb’ linyuwa’chin, ab’an jwal ch’ina’us wi’ chik a’in.

 Li yookin xtzolb’al sa’ li Santil Hu kixjal inna’leb’, moko xinb’ayk ta chi xb’aanunkil. Xinset li wismal, xinkanab’ li kalaak, roksinkil li b’an li nakanob’resink u ut li muxuk ib’ (1 Corintios 6:9, 10; 11:14). Xwaj naq li Jehob’a sahaq sa’ xch’ool wik’in. Jo’kan naq, naq nintzol naq jun li na’leb’ moko us ta, moko ninsik’ ta xyaalal. Naraho’k b’an sa’ inch’ool, jo’kan naq nink’oxla: «Moko tinb’aanu ta chik a’in». Ut sa’ junpaat nin’ok xjalb’al link’a’uxl ut linna’leb’. Sa’ xk’ab’a’ a’in, xin’ok xtawb’al rusilal naq ninb’aanu li naraj li Jehob’a. Ut sa’ li 29 re julio 1989, waqib’ po chik chirix naq xin’ok xtzolb’al li Santil Hu, xinsub’ wib’ sa’ ha’ ut xin’ok jo’ aj testiiw re li Jehob’a.

 Li Santil Hu xinxtenq’a chi xjalb’al linna’leb’. Junxil naq neke’xchiq’ linjosq’il, ink’a’ ninkuy wib’. Ab’an anaqwan ninb’aanu chixjunil li wank sa’ wuq’ re wank «sa’ usilal rik’ineb’ chixjunil» (Romanos 12:18, SBG). Moko laa’in ta ninb’aanunk re a’in. Li Jehob’a b’an kitenq’ank we, xb’aan naq li Raatin ut li xsantil musiq’ej wank xwankil re xjalb’al li qayu’am (Gálatas 5:22, 23; Hebreos 4:12).

 Anaqwan li b’an li nakanob’resink u, li raaxiik’ ut li muxuk ib’ ink’a’ chik neke’taqlank sa’ inb’een, ninyal b’an inq’e chi xsahob’resinkil xch’ool li Jehob’a ut xk’eb’al re li q’axal chaab’il. Ut arin na’okenk xtenq’ankileb’ jalaneb’ chik chi xnawb’al ru. Wiib’ oxib’ chihab’ naq ak xinsub’ wib’ sa’ ha’, xinkohin sa’ jun chik tenamit b’arwi’ na’ajmank aj puktesinel. Sa’ xnumikeb’ li chihab’ xinruuk xtzolb’aleb’ naab’al li kristi’aan ut rilb’al chanru xjalaak li xna’leb’. Ut jun chik li naxk’e xsahil inch’ool a’an naq linna’ kiril naq kichaab’ilo’k linyu’am, x’ok ajwi’ jo’ aj testiiw re li Jehob’a.

 Sa’ 1999 sa’ li tenamit El Salvador xink’ul wib’ sa’ jun li tzolok li nawb’il ru anaqwan jo’ Tzolok chirix li X’awab’ejilal li Yos. Aran xine’xkawresi re wank jo’ chaab’il aj puktesinel, ut re k’utuk ut tenq’ank sa’ li ch’uut. Moqon, sa’ ajwi’ li chihab’ a’an, xinsumlaak rik’in li x’Eugenia. Anaqwan sa’ wiib’al naqak’e chixjunil li qahoonal sa’ li puktesink aran Guatemala.

 Ink’a’ chik nawek’a naq maak’a’ rusilal linyu’am; wank b’an xyaalal linyu’am ut sa tz’aqal sa’ linch’ool. Xb’aanunkil li naxk’ut li Santil Hu xinxkol, li raaxiik’ ut li muxuk ib’ ink’a’ chik nataqlank sa’ inb’een. Ut sa’ xk’ab’a’ a’in, anaqwan wankin sa’ tuqtuukilal ut xintaw li tz’aqal rahok.