Chaabʼil chaq xyuʼamebʼ laj Madián ut li xMarcela li wankebʼ Medellín (Colombia). Laj Madián chaabʼil natojeʼk saʼ li xkʼanjel joʼkan naq chaabʼil li rochochebʼ. Wank kʼaru kikʼulmank li kixbʼaanu naq teʼxkʼoxla kʼaru yookebʼ xbʼaanunkil rikʼin li xyuʼam. Xbʼaan naq aʼanebʼ aj testiiw re li Jehobʼa saʼ li chihabʼ 2006 xeʼwulak saʼ jun li nimla chʼutam re jun kutan li naxkʼabʼaʼi «Mantengamos el ojo sencillo». Aʼanebʼ nekeʼxye: «Kachʼin chik ma chixjunil ebʼ li seeraqʼ xeʼaatinak chirix naq inkʼaʼ tqasikʼ li bʼihomal re naq tooruuq chi kʼanjelak chiru li Yos. Naq xraqeʼk li nimla chʼutam xqakʼe reetal naq moko aʼan ta yooko xbʼaanunkil. Nawulak chiqu loqʼok ut naabʼal qakʼas».

 Li nimla chʼutam kixbʼaanu naq laj Madián ut li xMarcela teʼxkʼe reetal kʼaru tento teʼxjal saʼebʼ li xyuʼam. Aʼanebʼ nekeʼxye: «Xqakʼos li qasachomq, xqajal li qochoch, xqakʼayi li qakaar ut xqaloqʼ jun li moot». Xeʼxkanabʼ ajwiʼ xik saʼebʼ li xninqal ru kʼayil re naq inkʼaʼ teʼxloqʼ li inkʼaʼ naʼajmank chiruhebʼ. Xeʼxkʼe bʼan xchʼool chi aatinak chirix li Santil Hu rikʼinebʼ li qas qiitzʼin. Ut xeʼok saʼ amiiwil rikʼinebʼ laj kʼamolbʼe li nekeʼxbʼaanu 130 hoor saʼ li puktesink. a

 Moqon laj Madián ut li xMarcela xeʼxkʼoxla qʼaxonk saʼ jun li chʼina chʼuut saʼ jun li kʼalebʼaal bʼarwiʼ naʼajmank li tenqʼ. Abʼan re xbʼaanunkil aʼin laj Madián kixkanabʼ li xkʼanjel. Li xpatron inkʼaʼ naxtaw ru kʼaʼut naq traj xkanabʼankil li xkʼanjel. Laj Madián kixye re: «Wank naabʼal laatumin, abʼan ma sa saʼ laachʼool?». Aʼan kixye naq inkʼaʼ xbʼaan naq wank naabʼal li xchʼaʼajkilal li inkʼaʼ naru xtuqubʼankil ru. Tojaʼ naq laj Madián kixye: «Li wank xwankil maawaʼ xsikʼbʼal li bʼihomal aʼan bʼan li naxkʼe xsahil laachʼool. Rochbʼen li wixaqil li naxkʼe xsahil qachʼool aʼan aatinak rikʼinebʼ li qas qiitzʼin chirix li Yos. Joʼkan naq naqaj roksinkil li qahoonal re xbʼaanunkil aʼin».

 Laj Madián ut li xMarcela qʼaxal sahebʼ saʼ xchʼool xbʼaan naq li wank xwankil chiruhebʼ aʼan kʼanjelak chiru li Jehobʼa. Ak xnumeʼk 13 chihabʼ rokikebʼ chi tenqʼank saʼebʼ li chʼuut bʼarwiʼ naʼajmank li tenqʼ saʼ li tenamit Colombia ut aʼanebʼ chik aj kʼamolbʼe saʼ li puktesink li nekeʼxbʼaanu 130 hoor.