Li xDaiane a’an jun aj testiiw re li Jehob’a re Brasil li nak’anjelak jo’ aj k’amolb’e sa’ li puktesink. Sa’ jun kutan naq yook chi xk’ebal resil li yaal sa’ selular, ki’aatinak rik’in jun li sumal li toj saajeb’. Li sumal a’in kiraj xnawb’al li yaal chirix li Santil Hu. Ab’an ke’xye naq te’q’axonq sa’ jun li k’aleb’aal najt chire li tenamit, ut aran maak’a’ luz chi moko internet. Aran maajun aj testiiw re li Jehob’a. Jo’kan naq li sumal a’in kixk’e re li xDaiane li xnumril li teléfono re li k’aleb’aal ut xe’xxaqab’ li xkutankil ut xhoonalil re naq te’ruuq chi tzolok chirix li Santil Hu.

 Li xDaiane kib’oqok sa’ li número li kik’ehe’k re, sa’ li hoonal li xyeemank re ut li sumal a’in ke’chaq’b’enk chaq. Oxib’ sut xe’aatinak chiru wiib’ xamaan.

 Ab’anan, naq xnume’k li wiib’ xamaan a’in, li sumal ink’a’ chik ke’chaq’b’enk chaq. Li xDaiane ink’a’ kich’ina xch’ool ut junelik kixb’oqeb’ oxib’ sut chiru li xamaan. Chi jo’kan ki’ok chi aatinak chirix li Santil Hu rik’in yalaq ani li tchaq’b’enq re li teléfono. Li xDaiane ki’ok xtzolb’al wiib’ oxib’ li qas qiitz’in rik’in li Santil Hu.

 Sa’ jun kutan, naq li xDaiane ut li xb’eelom yookeb’ xk’eb’al xtzolb’al jun li saaj re li k’aleb’aal a’in, jun aj k’amolb’e sa’ li paab’al kirab’i li yookeb’ xyeeb’al ut kijilok chixk’atq li saaj re naq sa t-ab’inq. Ut li qawa’chin a’in kixye naq traj aatinak rik’in li xDaiane ut li xb’eelom re xyeeb’al reheb’ naq q’axal kiwulak chiru li kirab’i ut naq naraj ajwi’ xtzolb’al li Santil Hu.

 Sa’ xnumikeb’ li kutan, li xDaiane ut li xb’eelom xe’ok xk’eb’al xtzolb’al waqib’ li qas qiitz’in li wankeb’ sa’ li najtil k’aleb’aal a’in, sa’ xyanqeb’ wank laj k’amolb’e sa’ li paab’al. Wankeb’ ak xe’rab’i li ch’utam sa’ li telefono li neke’roksi sa’ li k’aleb’aal. Jun reheb’ li tzolom kixyiib’ jun li tem re naq chixjunileb’ te’chunlaaq naq yooqeb’ xk’ulb’al li xtzolb’al chirix li Santil Hu.

 Saheb’ sa’ xch’ool li xDaiane rochb’een li xb’eelom naq xe’ruuk xk’amb’al li esil chirix li X’awab’ejilal li Yos sa’ jun najtil k’aleb’aal. A’an naxye: «Li Jehová naxb’aanu naq chixjunileb’ te’rab’i li chaab’il esil, jo’ ajwi’ li wankeb’ sa’eb’ li najtil na’ajej jo’ a’in».