Li xMarta, jun aj testiiw re li Jehobʼa li wank Guatemala, yook xtzolbʼal li aatinobʼaal qʼeqchiʼ re aatinak chirix li Santil Hu rikʼinebʼ laj qʼeqchiʼ. Saʼ jun kutan kiril naq jun li qawaʼchin yook chi elk saʼ li bʼanlebʼaal. Saʼ xkʼabʼaʼ chanru tiqto, kixkʼoxla naq aʼan aj qʼeqchiʼ li nachalk saʼ jun li kʼalebʼaal bʼarwiʼ joqʼeqil nekeʼpuktesink ebʼ laj testiiw re li Jehobʼa. Kijilok chixkʼatq ut kiraatina saʼ qʼeqchiʼ usta inkʼaʼ naxnaw chiʼus li aatinobʼaal aʼan.

 Li xMarta kixyeechiʼi xtzolbʼal chirix li Santil Hu ut li qawaʼchin chi sa saʼ xchʼool kixkʼulubʼa, abʼan kixye naq maakʼaʼ xtumin re xtojbʼal. Joʼkan naq li xMarta kixye re, naq ebʼ laj testiiw re li Jehobʼa nekeʼxtzol ebʼ li kristiʼaan chi sibʼil. Kixye ajwiʼ re, naq wi naraj, naru ttzoleʼq saʼ selular ut naq naru ttzʼaqonq li xjunkabʼal. Aʼan kixkʼulubʼa, joʼkan naq li xMarta kixkʼe re li tasal hu Kʼaru tzʼaqal naxchʼolobʼ li Santil Hu?, li hu aʼin naʼoksimank re tzolok. Ut saʼ xkʼabʼaʼ naq li qawaʼchin naxtaw ajwiʼ ru li kaxlan aatin, li xMarta kixkʼe re li Santil Hu: Traducción del Nuevo Mundo. Jun xamaan chirix aʼan, li qawaʼchin, li rixaqil ut li wiibʼ chi ralal xeʼok xtzolbʼal li Santil Hu saʼ selular rikʼin li xMarta. Kaʼsut nekeʼtzolok chiru li xamaan. Li xMarta naxye: «Saʼ xkʼabʼaʼ naq moko mas ta ninnaw li qʼeqchiʼ, nokootzolok saʼ kastiiy, abʼan aʼin moko chʼaʼajkilal ta, xbʼaan naq ebʼ li kokʼal nekeʼxtaw ru ut li bʼeelomej naxnumsi saʼ qʼeqchiʼ chiru li rixaqil».

 Pastor peʼ li winq aʼan ut kiʼok xkʼutbʼal chiru li naxjolomihebʼ li yook xtzolbʼal saʼ li Santil Hu. Makachʼin naq kiwulak chiruhebʼ li xeʼrabʼi, joʼkan naq xeʼxpatzʼ re bʼar yook chaq chi risinkil li akʼ naʼlebʼ aʼan. Naq kixseeraqʼi rehebʼ naq yook xtzolbʼal li Santil Hu, li junjunq kiraj tzʼaqonk, ut chi chʼinqil xeʼkʼihank li nekeʼochbʼenink re. Moqon, rajlal xamaan oʼlaju chik nekeʼxtzol li Santil Hu rikʼin li xMarta saʼ selular. Joʼkan bʼiʼ, re naq chixjunilebʼ teʼruuq rabʼinkil li naxye li xMarta, xeʼxkʼe jun li kʼanjelobʼaal chixkʼatq li selular.

 Naq li xMarta kixseeraqʼi rehebʼ li cheekel winq re li xchʼuut chirixebʼ li kristiʼaan aʼin li yookebʼ xtzolbʼal li Santil Hu, jun rehebʼ li cheekel winq xkoho chi rulaʼaninkil li kʼalebʼaal aʼan. Kixbʼoqebʼ chi rabʼinkil jun li seeraqʼ li tixkʼe li cheekel winq li naʼulaʼanink chʼuut a saʼ jalan chik kʼalebʼaal. Re wulak saʼ li kʼalebʼaal aʼan, tento raj teʼbʼihajiq jun hoor saʼ kaar ut wiibʼ hoor chi roqebʼ. Ut, wuqlaju xeʼwulak chi rabʼinkil li seeraqʼ aʼan.

 Wiibʼ oxibʼ xamaan chirix aʼan, li cheekel winq li naʼulaʼanink chʼuut ut jalanebʼ chik aj testiiw re li Jehobʼa xeʼxnumsi kaahibʼ kutan rikʼinebʼ li yookebʼ chi tzolok. Eqʼla nekeʼril ebʼ li bʼideo chirix li Santil Hu li natawmank saʼ jw.org saʼ qʼeqchiʼ ut nekeʼxtzol li hu Anihebʼ yookebʼ xbʼaanunkil li rajom li Jehobʼa saʼebʼ li qakutan? Ut ewu, nekeʼril li JW Broadcasting. Li cheekel winq li naʼulaʼanink chʼuut kixbʼaanu ajwiʼ naq li junjunq chi kristiʼaan ttzoleʼq xbʼaan junaq li hermaan chirix li Santil Hu.

 Chiru li kaahibʼ chi kutan aʼan, ebʼ laj Testiiw xeʼaatinak chirix li Santil Hu rikʼinebʼ li wankebʼ saʼebʼ li kʼalebʼaal li wankebʼ chixkʼatq li naʼaj aʼin li nekeʼaatinak ajwiʼ saʼ qʼeqchiʼ, ut xeʼxbʼoqebʼ saʼ jun li chʼutam. Saʼ li chʼutam aʼan xeʼwulak 47 li qas qiitzʼin ut xeʼyeechiʼiik xtzolbʼal chixjunqalebʼ chirix li Santil Hu. Junlaju li junkabʼal xeʼxkʼulubʼa.

 Wiibʼ oxibʼ po chirix aʼan, ebʼ li cheekel winq xeʼxkʼubʼ naq saʼ xraqik li junjunq chi xamaan t-uxmanq junaq li chʼutam saʼ li kʼalebʼaal bʼarwiʼ yal jun xtikibʼank re. Anaqwan nekeʼwulak 40 li qas qiitzʼin. Ut re xnimankil li xkamik li Kriist, xeʼwulak 91. Kʼajoʼ xchaqʼalil ru!

 Naq li xMarta naxjultika chanru kitiklaak li naʼlebʼ aʼin ut li kikʼulmank moqon, aʼan naxye: «Kʼajoʼ ninbʼanyoxi re li Jehobʼa. Wank sut nawekʼa naq moko kʼi ta ninbʼaanu, abʼan li Yos nokooroksi chi xbʼaanunkil li xkʼanjel. Li Jehobʼa naxnaw kʼaru wank saʼ xchʼoolebʼ li qas qiitzʼin aʼan, ut kixkʼamebʼ chaq saʼ li xtenamit. Chʼolchʼo naq li Jehobʼa qʼaxal naxrahebʼ!».