Li xMaria Lúcia, li wank aran Brasil, wank jun li xyajel li chalenaq rik’ineb’ li xna’ xyuwa’, síndrome de Usher xk’ab’a’. Li yajel a’in naxtz’ap xxikeb’ li kristi’aan ut wank sut ink’a’ chik neke’ab’ink chi junajwa, jo’kan ajwi’ timil timil neke’ok chi mutz’o’k. Tz’ap xxik naq kiyo’laak li xMaria Lúcia, jo’kan naq kixtzol li raatinob’aal li ink’a’ neke’ruuk chi aatinak ut ab’ink. Chirix chik a’an, naq wank 30 chihab’ re, x’ok chi mutz’irk. Usta yook xnumsinkil naab’al li ch’a’ajkilal xb’aan li xyajel, li xMaria Lúcia maajunwa kixnajtob’resi rib’ rik’ineb’ li hermaan. Anaqwan naq numenaq 70 chihab’ wank re sa sa’ xch’ool.

 Li xMaria Lúcia kixnaweb’ ru eb’ laj testiiw re li Jehob’a sa’ li chihab’ 1977, naq toj maaji’ na’ok chi mutz’o’k. A’an naxye: «Xintaw wi’ chik wib’ rik’in laj Adriano, li kiwank chaq cho’q wechtzolom li toje’ ki’ok jo’ aj Testiiw. Kixseeraq’i we chirix jun li xyeechi’om li Yos, naq tixch’ina’usa li Ruuchich’och’ ut naq maa’ani chik tyajerq. Sachso inch’ool xinkanaak naq xwab’i a’in, jo’kan naq xink’ulub’a xtzolb’al li Santil Hu. Moqon chik, xintikib’ xik sa’eb’ li ch’utam sa’ jun li ch’uut re Río de Janeiro. Sa’ li ch’uut a’in wank wiib’ oxib’ li ch’utam li neke’xnumsi sa’ li raatinob’aal li ink’a’ neke’ruuk chi aatinak ut ab’ink. Li Jehob’a xinxtenq’a re naq tk’iiq linpaab’al, jo’kan naq xkub’e’k inha’ sa’ julio re 1978».

 Moqon, li xMaria Lúcia kiq’axonk sa’ jun li ch’uut b’arwi’ maajun laj Testiiw naxnaw li raatinob’aal li ink’a’ neke’ruuk chi aatinak ut ab’ink. Sa’ xtiklajik kich’a’ajko’k chiru, xb’aan naq ink’a’ naxtaw ru li nayeemank sa’eb’ li ch’utam. Ab’an, wiib’ li hermaan ixq kitenq’ank re. Neke’chunlaak chixk’atq sa’ li ch’utam ut neke’xtz’iib’a li nayeemank. Li xMaria Lúcia naxseeraq’i: «Naq ninwulak sa’ wochoch, nink’e inq’e chi rilb’al li hu li xe’xtziib’a we toj reetal nintaw ru li xe’xye sa’ li ch’utam. Sa’ xnumikeb’ li kutan, eb’ li hermaan a’in xe’xtzol li raatinob’aal li ink’a’ neke’ruuk chi aatinak ut ab’ink ut xe’ruuk xnumsinkil we li ch’utam».

 Timil timil, li xMaria Lúcia ki’ok chi mutz’o’k, ut ink’a’ chik kiruuk rilb’aleb’ li ruq’ li hermaan li neke’tenq’ank re. Jo’kan naq kixtikib’ xchapb’aleb’ li ruq’ li neke’aatinak rik’in. Chanru nab’aanumank a’in? A’an naxch’olob’: «Ninchap li ruq’ li kristi’aan li neke’ok chi aatinak wik’in, re naq tink’e reetal chanru neke’rek’asi li ruq’ ut chi jo’ka’in nintaw ru li yookeb’ xyeeb’al».

 Oxloq’ chiru li xMaria Lúcia li tenq’ li nak’ehe’k re xb’aaneb’ li hermaan. A’an naxye: «A’aneb’ jun nimla maatan chalenaq rik’in li Jehob’a, xb’aan naq sa’ xk’ab’a’eb’ li xtenq’, nintaw ru li nayeemank sa’eb’ li ch’utam ut sa’eb’ li nimla ch’utam».

 Li qahermaan napuktesink ajwi’. Naraatinaheb’ li ink’a’ neke’ruuk chi ab’ink rik’in xchapb’aleb’ li ruq’. Nawulak chiruheb’ rilb’al chanru naxk’e xq’e re xwotzb’al li chaab’il esil rik’ineb’. K’aru xb’aanu chiru li nimla yajel COVID-19? Laj José Antônio, li ras, li ink’a’ ajwi’ naru chi ilok ut ab’ink, kixtenq’a re xtz’iib’ankil naab’al eb’ li esilhu cho’q reheb’ li ink’a’ neke’ruuk chi ab’ink. a

 Li xMaria Lúcia naxch’olob’ k’aru naxb’aanu re tz’iib’ak: «Nawoksi jun li regla re tz’iib’ak ut chi jo’kan tiik na’elk li nintz’iib’a. Seeb’ xk’a’uxl li was, jo’kan naq naab’al xtasal re li Santil Hu nachalk sa’ xch’ool, ut laa’in nintz’iib’a sa’eb’ li esilhu. Sa’ xk’ab’a’ naq nach’a’ajko’k ilok ru hu chiruheb’ li ink’a’ neke’ruuk chi ab’ink, sa’eb’ li esilhu nink’e inq’e chi xch’olob’ankil chi’us re naq ink’a’ tch’a’ajko’q chiruheb’ xtawb’al ru».

 Usta ink’a’ chik na’ilok li xMaria Lúcia, toj kaw nak’anjelak. Li xKaroline, jun reheb’ li natenq’ank re, naxye: «Li xMaria Lúcia junelik naxsaab’esi li rochoch ut moko nachachot ta li k’aru re. Nawulak chiru k’ub’ank ut junelik naxb’oqeb’ chi wa’ak li ramiiw».

 Laj Jefferson, a’an jun li cheekel winq li wank sa’ li ch’uut rik’in li xMaria Lúcia. A’an naxye: «Li xMaria Lúcia k’ajo’ naxra li Jehob’a ut eb’ li qas qiitz’in. Junelik naxk’oxlaheb’ ut naxtenq’aheb’ li junch’ol» (Filipenses 2:4).