Aʼin li kixye jun chʼuut li qas qiitzʼin li naxtzʼil rix li xjalajik ru xtiqwal li kutan, li chʼuut chi qas qiitzʼin aʼin chalenaq saʼ jalan jalanq li tenamit. Wi nakaakʼoxla naq wank jun laj Yobʼtesinel ut naq naxkʼe xchʼool chiqix, maare nakatxkʼe chi kʼoxlak li nekeʼxye li wankebʼ xnawom chirix li jalan jalanq chi naʼlebʼ li kiroksi li Yos naq kixyiibʼ li ruuchichʼochʼ re naq tixxok ribʼ xjunes.

Li ruuchichʼochʼ inkʼaʼ chik naru xxokbʼal ribʼ xjunes xbʼaan naq li winq kipoʼok re. Usta joʼkan, kʼaʼut chʼolchʼo chiqu naq li Yos tixbʼaanu li naʼajmank re naq twanq li ruuchichʼochʼ ut li yuʼam li wank chisaʼ?

Ebʼ li xraqal li Santil Hu li wank saʼ li kaaxukuut naxkʼutbʼesi naq li Ruuchichʼochʼ maajunwa tsachq ut junelik wanq li yuʼam.

• Li Yos kixyiibʼ li ruuchichʼochʼ. «Saʼ xtiklajik li Dios kixyiibʼ chaq li choxa ut li ruchichʼochʼ» (Génesis 1:​1, Wy).

• Li Yos aʼan aj echal re li ruuchichʼochʼ. «Li Qaawaʼ, aʼan laj eechal re li ruchichʼochʼ [ . . . ] joʼ ajwiʼ chixjunil» (Salmo 24:​1, Wy).

• Li Yos kixyiibʼ li ruuchichʼochʼ re naq twanq chi junelik. «Kayiibʼ li ruchichʼochʼ saʼ xnaʼaj ut inkʼaʼ taaʼekʼaanq» (Salmo 104:​5, Wy).

• Li Yos naxye naq junelik twanq li yuʼam saʼ li ruuchichʼochʼ. «Li Qaawaʼ [ . . . ] li kikʼuubʼank ut kiyiibʼank re li ruuchichʼochʼ, [ . . . ] moko kixyiibʼ ta chi maakʼaʼ xyaalal, re bʼan naq taatenamitoʼq» (Isaías 45:18).

• Li Yos naxye naq li ruuchichʼochʼ aʼanaq xnaʼajebʼ li qas qiitzʼin chi junelik. «Kaʼajwiʼ li tiikebʼ xchʼool teʼwanq saʼ li chʼochʼ aʼin, ut teʼkanaaq arin chi junelik» (Proverbios 2:21).

Saʼ xkʼabʼaʼ naq li Yos kixkʼe chixjunil li naʼajmank, li ruuchichʼochʼ naru nakʼanjelak chi tzʼaqal re ru wi ebʼ li qas qiitzʼin inkʼaʼ teʼxpoʼ chixjunil li wank chisaʼ. Joʼ naxye ebʼ li propesiiy li wank saʼ li Santil Hu, li Jehobʼa a Yos ak xxaqabʼ li hoonal re xsachbʼal li yookebʼ chi naʼlebʼak saʼ maaʼusilal ut yookebʼ xsikʼbʼal li us kaʼajwiʼ choʼq rehebʼ xjunes naq nekeʼxpoʼ li ruuchichʼochʼ (Apocalipsis 11:18).

Naq ak xnumeʼk chixjunil aʼin, li Santil Hu naxye naq li Yos tixbʼaanu naq tchaabʼiloʼq wiʼ chik li ruuchichʼochʼ, tixkanabʼ joʼ chʼinaʼusil naʼaj li nujenaq chi uutzʼuʼuj ut tixyeʼ li ruqʼ re xkʼojobʼankilebʼ «xchʼool chixjunilebʼ» li wankebʼ xyuʼam (Salmo 145:16).