CHOʼQ REHEBʼ LI SUMSUKEBʼ
2. Kʼanjelak saʼ junajil
KʼARU NARAJ XYEEBʼAL?
Ebʼ li sumsukebʼ li nekeʼkʼanjelak saʼ junajil chanchanebʼ li nabʼeresink re li soʼsolchʼiichʼ ut li natenqʼank re saʼ kabʼichal nekeʼxnaw kʼaru teʼxbʼaanu. Inkʼaʼ nekeʼxkʼoxla ribʼ xjunes nekeʼxkʼoxla bʼan kʼaru us choʼq re li rochbʼen. Qʼaxal wiʼ chik naq nachalk jun li chʼaʼajkilal.
LI NAʼLEBʼ LI NAXKʼE LI SANTIL HU: «Moko wiibʼebʼ ta chik, junajebʼ aj bʼan chik chi tzʼejwalej» (Mateo 19:6).
«Li bʼeelomej ut li ixaqilbʼej tento teʼkʼanjelaq saʼ komonil re naq us teʼelq saʼ li xsumlajik» (Christopher).
KʼAʼUT WANK XWANKIL?
Wi ebʼ li sumsukebʼ inkʼaʼ nekeʼkʼanjelak saʼ junajil naq tchalq junaq li chʼaʼajkilal naru teʼxchoqi ribʼebʼ ut inkʼaʼ nekeʼxtuqubʼ ru li chʼaʼajkilal nekeʼxnimobʼresi bʼan ru.
«Ebʼ li sumsukebʼ aajel ru naq teʼkʼanjelaq saʼ junajil. Wi linbʼeelom ut laaʼin inkʼaʼ naqabʼaanu aʼin chanchanaqo wiibʼ li kristiʼaan li yal nekeʼrochbʼeni ribʼ chi wank saʼ jun li ochoch, abʼan inkʼaʼ nekeʼxkʼe ribʼ saʼ aatin rikʼin li aajel ru xbʼaanunkil saʼebʼ li xyuʼam» (Alexandra).
KʼARU TATRUUQ XBʼAANUNKIL?
KʼOXLA RIX AʼIN
-
Ma kaʼajwiʼ choʼq we li tumin li ninkʼanjela?
-
Re naq tinhilanq chiʼus ma aajel ru naq maaʼanihaq linsumʼaatin chinkʼatq?
-
Ma ninnajtobʼresi wibʼ rikʼin li xjunkabʼal linsumʼaatin usta aʼanebʼ wankebʼ saʼ junajil?
AATINAN RIKʼIN LAASUMʼAATIN
-
Kʼaru li kʼanjel us naʼelk chiqu naq nokookʼanjelak saʼ junajil?
-
Kʼaru li naʼlebʼ tooruuq xchaabʼilobʼresinkil?
-
Kʼaru tooruuq xbʼaanunkil re naq us tookʼanjelaq saʼ junajil?
LI TATRUUQ XBʼAANUNKIL
-
Kʼoxla naq li sumlajik chanchan bʼatzʼunk peloot. Kʼaru tatruuq xbʼaanunkil re naq laaʼat ut laasumʼaatin texruuq chi bʼatzʼunk saʼ junajil?
-
Maakʼoxla chanru tat-elq chiʼubʼej, kʼoxla bʼan chanru texruuq qʼaxok u saʼ wiibʼal.
«Maakʼaʼ naxye ani wank re, li aajel ru aʼan naq wanq li tuqtuukilal ut li junajil saʼ leesumlajik» (Ethan).
LI NAʼLEBʼ LI NAXKʼE LI SANTIL HU: «Maaʼani chixsikʼ li us kaʼajwiʼ choʼq re xjunes, chixsikʼaq aj bʼan wiʼ choʼq rehebʼ li ras riitzʼin» (Filipenses 2:3, 4).
