CHOʼQ REHEBʼ LI SAAJ
12. Kʼoxla li taawaj xbʼaanunkil
KʼARU NARAJ XYEEBʼAL?
Xtawbʼal li nakaawaj moko matkʼek ta malaj yal xkʼoxlankil. Aajel ru naq taakʼubʼ chiʼus, taasikʼ jalan jalanq li naʼlebʼ ut tatkʼanjelaq chi kaw re xtawbʼal.
Xbʼaanunkil li nakaawaj naru naxkʼam wiibʼ oxibʼaq kutan, po malaj chihabʼ. Wi li nakaawaj xbʼaanunkil tixkʼam naabʼal chihabʼ aajel ru naq taabʼaanu jalan jalanq li naʼlebʼ li tatxtenqʼa chi xtawbʼal.
KʼAʼUT WANK XWANKIL?
Naq taataw li nakaawaj taakʼe reetal naq nakatruuk xbʼaanunkil, tixkawubʼresi laaʼamiiwil rikʼinebʼ li junchʼol ut tixkʼe xsahil laachʼool.
Inkʼaʼ chik tatxiwaq. Wi nakatruuk xbʼaanunkil li naʼlebʼ li naxkʼam wiibʼ oxibʼ po inkʼaʼ chik tatxiwaq xbʼaanunkil junaq li naʼlebʼ usta tixkʼam naabʼal chihabʼ. Inkʼaʼ ajwiʼ tatxiwaq chi xqʼaxbʼal ru li chʼaʼajkilal li nakaataw rajlal kutan, joʼ li minok u.
Kawubʼresi laaʼamiiwil. Naabʼalebʼ nekeʼwulak chiru rochbʼeninkilebʼ li kristiʼaan li nekeʼxnaw kʼaru nekeʼraj saʼ li xyuʼam ut nekeʼxkʼe xqʼe chi xtawbʼal. Joʼkan ajwiʼ kʼanjelak chirix jun li kʼanjel saʼ komonil naxkawubʼresi li amiiwil.
Qʼaxal sahaq saʼ laachʼool. Naq nakatkʼanjelak chi kaw chirix li nakaawaj xbʼaanunkil sa nakaawekʼa aawibʼ.
«Kʼajoʼ nawulak chiwu xkʼubʼankil li nawaj xbʼaanunkil xbʼaan naq aʼin naxbʼaanu naq laatzʼaq wu ut wank xyaalal naq ninkʼe inqʼe. Kʼajoʼ xchʼinaʼusal rilbʼal chixjunil li xinbʼaanu chaq ut xyeebʼal: «Xinruuk xbʼaanunkil» (Christopher).
LI NAʼLEBʼ LI NAXKʼE LI SANTIL HU: «Li ani yo xkʼaʼuxl chirix li iqʼ, inkʼaʼ taaʼawq, ut li nakaʼyank choql, inkʼaʼ taaqʼoloq» (Eclesiastés 11:4).
KʼARU TATRUUQ XBʼAANUNKIL?
Re xbʼaanunkil li nakaawaj bʼaanu aʼin.
Sikʼ li taawaj xbʼaanunkil. Kʼoxla ut moqon tus ru joʼ chanru nakaawaj xtawbʼal.
Kʼubʼ ru chiʼus. Bʼaanu aʼin:
-
Kʼe xkutankil joqʼe raj taaraq laakʼanjel.
-
Tzʼiibʼa wiibʼ oxibʼ li naʼlebʼ chanru taabʼaanu.
-
Kʼoxla rix li chʼaʼajkilal li naru taakʼul ut chanru taaqʼax ru.
Tikibʼ xbʼaanunkil. Moko aajel ta ru naq taaxaqabʼ chanru xbʼaanunkil chixjunil. Kʼoxla xbʼeenwa li taawaj xbʼaanunkil ut bʼaanu. Naq ak xaachoy junaq li kʼanjel tzʼil rix chanru yookat chi elk.
LI NAʼLEBʼ LI NAXKʼE LI SANTIL HU: «Li kʼaru kʼoxlanbʼil rix chi chaabʼil, qʼaxal us naʼelk» (Proverbios 21:5).
Maare twulaq ajwiʼ chaawu
LI NEKEʼXYE WIIBʼ OXIBʼ LI SAAJ
Maakʼaʼ junaq chik li chaabʼil yuʼam
Ma taawaj naq chaabʼilaq laayuʼam? Kʼe reetal chanru li xCameron kixtaw li sahil chʼoolejil saʼ jun li naʼaj li inkʼaʼ naroybʼeni.
