Li tzolok li nachalk saʼ li Santil Hu wank xwankil re xchaabʼilobʼresinkil li xyuʼam ebʼ li qas qiitzʼin. Qilaq chanru kixtenqʼa laj Ricardo ut laj Andres.

RICARDO. Oʼlaju chihabʼ wank we naq xinʼok saʼ xyanqebʼ li maaʼusebʼ xnaʼlebʼ. Saʼ xkʼabʼaʼ naq saajin chiʼus ninbʼaanu li nekeʼxye ebʼ li wamiiw. Joʼkan naq, xinkʼe inqʼe re wank lajeebʼ chihabʼ saʼ tzʼalam. Maare toontil naʼlebʼ aʼin, abʼan saʼ linteep oxloqʼinbʼilebʼ li ak xeʼwank saʼ tzʼalam. Ut laaʼin xwaj xkʼambʼal we rikʼinebʼ.

Yookin chaq xmuxbʼal wibʼ, xwoksi li bʼan li nakanobʼresink u ut laaʼin aj sakʼonel. Saʼ jun qʼoqyink xoopuubʼak ut xooʼeʼxpuubʼa. Xinkʼoxla naq tineʼxkamsi, abʼan xinʼelelik. Tojaʼ naq, xinʼok xkʼoxlankil chirix linyuʼam ut li nawaj xtawbʼal. Xinkʼoxla xjalbʼal linyuʼam, abʼan, chanru tixbʼaanu? Ani ttenqʼanq we?

Li xkʼihalil ebʼ linkomon wankebʼ xchʼaʼajkilal ut moko sahebʼ ta saʼ xchʼool, abʼan li xjunkabʼal jun rehebʼ li wikan jalanebʼ. Chʼolchʼo chiwu naq chaabʼilebʼ xnaʼlebʼ ut nekeʼxyuʼami li naxkʼut li Santil Hu. Aʼanebʼ xeʼyehok we naq li xkʼabʼaʼ li Yos aʼan Jehobʼa. Moko ak junxil ta xnumik li puubʼak, naq xintijok chiru li Jehobʼa, xwoksi li xkʼabʼaʼ ut xintzʼaama chiru naq tinxtenqʼa. Xsachk inchʼool naq wulajaq chik jun laj Testiiw re li Jehobʼa xtʼok li wochoch. Ut rikʼin xinʼok xtzolbʼal li Santil Hu.

Saʼ junpaat xintaw jun li nimla chʼaʼajkilal. Ebʼ li najter wamiiw, nikineʼxbʼoq saʼ selular re naq tinxik chirixebʼ. Usta kichʼaʼajkoʼk chiwu, xinye rehebʼ naq inkʼaʼ. Ak chʼolchʼo chiwu naq maajunwa tinkanabʼ xtzolbʼal li Santil Hu, ut nasahoʼk saʼ linchʼool naq joʼkan xinbʼaanu. Relik chi yaal naq xjalaak linyuʼam ut anaqwan sa chik linchʼool.

Xinrahi ru wank lajeebʼ chihabʼ saʼ tzʼalam re naq ebʼ li saaj li maaʼusebʼ xnaʼlebʼ tineʼroxloqʼi. Joʼkan naq, xintzʼaama re li Yos naq tixkʼe we lajeebʼ chihabʼ re xtenqʼankilebʼ li qas qiitzʼin chirix li Santil Hu, joʼ chanru xinxtenqʼa laaʼin. Li Yos kixsume lintij xbʼaan naq ak wuqlaju chihabʼ wokik saʼ li kʼanjel aʼin. Ut, nawaj ajwiʼ xyeebʼal naq, maajunwa xinwank saʼ tzʼalam.

Naabʼal rehebʼ, li xeʼwank choʼq wamiiw, toj teʼwanq naabʼal chihabʼ saʼ tzʼalam, ut wankebʼ ak xeʼkamk. Qʼaxal ninbʼanyoxi rehebʼ li wech-alal li wankebʼ choʼq aj Testiiw naq jalanebʼ ut nekeʼxyuʼami li naxkʼut li Santil Hu. Qʼaxal oxloqʼebʼ chiwu, chiruhebʼ li xeʼwank choʼq wamiiw. Abʼan, chiru li Yos tzʼaqal ninbʼanyoxink xbʼaan naq xkʼut chiwu chanru tinbʼeresi chiʼus linyuʼam.

 ANDRES. Xinyoʼlaak ut xinkʼiik saʼ jun li teep bʼarwiʼ yalaq bʼar wank li bʼan li nakanobʼresink u, li kamsink, li elqʼak ut li kʼayink ribʼ. Linyuwaʼ aj kalajenaq ut inkʼaʼ naxkanabʼ li kokaʼina. Linnaʼ ut linyuwaʼ junelik nekeʼxchoqi ut nekeʼxsakʼi ribʼebʼ.

Toj saajin chiʼus naq xinʼok chi kalaak ut roksinkil li bʼan li nakanobʼresink u. Junes saʼ bʼe chik ninwank, ninʼelqʼak ut ninkʼayi li welqʼ. Saʼ xnumikebʼ ru li chihabʼ, linyuwaʼ xinxsikʼ abʼan maawaʼ re intenqʼankil, re bʼaan xkʼutbʼal chiwu chanru xnumsinkil li bʼan li nakanobʼresink u ut li kʼaʼaq re ru, li wank xtzʼalamil saʼ li tenamit ut chirix chik aʼan tinkʼayi. Saʼ junpaat xintaw naabʼal intumin. Saʼ jun kutan, ebʼ laj puubʼ xeʼwulak saʼ wochoch. Xineʼxchap ut xineʼxkʼe oobʼ chihabʼ saʼ tzʼalam xbʼaan naq kachʼin chik ma xinkamsi jun li qas qiitzʼin.

Saʼ jun eqʼla, xoobʼoqeʼk joʼ aj preex chi rabʼinkil jun li seeraqʼ li teʼxkʼe ebʼ laj Testiiw re li Jehobʼa. Wank xyaalal li xeʼxye, joʼkan naq xinkʼulubʼa xtzolbʼal li Santil Hu rikʼinebʼ. Ebʼ laj Testiiw inkʼaʼ xeʼxsikʼ ru li raatin re xqʼuntesinkil li naxye li Santil Hu, xeʼxkʼut bʼaan chiwu li xchamal ru li naʼlebʼ li naraj li Yos naq tqayuʼami.

Saʼ junpaat xinkʼe reetal naq twaj aj tenqʼahom we re naq tinjal inyuʼam. Ut ebʼ li wechpreexil xeʼok ajwiʼ inchʼiʼchʼiʼinkil xbʼaan naq inkʼaʼ nekeʼraj naq tintzol li Santil Hu. Xinpatzʼ innaʼlebʼ ut inmetzʼew re li Jehobʼa. Saʼ xkʼabʼaʼ aʼin, xinruuk xqʼaxbʼal li chʼaʼajkilal rikʼin xyeebʼal rehebʼ li yookin xtzolbʼal.

Naq xinʼelk saʼ tzʼalam, xwaj kanaak bʼayaq chik xbʼaan naq kʼajoʼ inxiw. Naq yookin chi elk, wankebʼ laj preex xeʼxkʼut ruqʼ chiwu re inchaqʼrabʼinkil. Ut wankebʼ chi anchalebʼ xchʼool xeʼxye we: «Chaawil awibʼ, at chʼina kʼutunel!».

Naxkʼe inxiw yal xkʼoxlankil chan raj ru linyuʼam wi inkʼaʼ raj xinkʼulubʼa naq tinxtzol li Yos. Ninbʼanyoxi re, naq xinxra ut inkʼaʼ kixkʼoxla naq maajunwa tinjal innaʼlebʼ. *