Aajel ru li Yos saʼ laayuʼam
Joʼ xqil saʼ li xbʼeen tzolom, naabʼalebʼ nekeʼril li Santil Hu joʼ jun loqʼlaj hu. Naq nekeʼril xsaʼ ut nekeʼxyuʼami li naxye, nekeʼrekʼa naq nekeʼnachʼok rikʼin li Yos ut nachʼolaak chiruhebʼ kʼaru xyaalal li yuʼam.
Li Santil Hu naxye naq li poyanam li naxnaw naq aajel ru li Yos saʼ li xyuʼam junelik naxkawresi li xwanjik rikʼin li Yos, naroxloqʼi li naxkʼoxla ut naxyuʼami li naxye li xchaqʼrabʼ. Abʼan, li poyanam li naxyuʼami li naraj li tzʼejwalej naxbʼeresi ribʼ rikʼin li xkʼaʼuxl, li xnaʼlebʼ ut naxbʼaanu li narataw (Judas 18, 19; Efesios 5:1).
LI OYBʼENIHOM
LI NAʼLEBʼ LI NAXKʼE LI SANTIL HU: «Li sahil chʼoolej aʼan chanchan li bʼan nakʼehok kawilal; abʼan li rahil chʼoolej naʼoksink yajel» (Proverbios 17:22).
KʼARU NARAJ XYEEBʼAL. Li rahil chʼoolej naxmaqʼ li qametzʼew li naʼajmank re xnumsinkil wulaj wulaj ebʼ li qachʼaʼajkilal. Abʼanan, li oybʼenihom naxkʼe xkawubʼ qachʼool re naq tqakʼe qaqʼe, naxjultika chiqu naq wankebʼ li chʼaʼajkilal li yal numel ut naxbʼaanu naq tqataw rusilal ebʼ li qachʼaʼajkilal usta nimebʼ ru.
KʼARU TATRUUQ XBʼAANUNKIL. Kʼe aaqʼe chi xtawbʼal rusilal li kutan chalk re. Miʼelk aawara chi xkʼoxlankil naq naru taakʼul junaq li chʼaʼajkilal malaj roybʼeninkil joqʼe t-usaaq laayuʼam, kʼe bʼan aaqʼe chi xsikʼbʼal li tixkʼe xsahil aachʼool. Usta yaal naq naru nakaakʼul junaq li chʼaʼajkilal li moko nakaawoybʼeni ta (Eclesiastes 9:11, Wy). Abʼanan, wank sut chaabʼil naʼelk li yooko xkʼulbʼal chiru li naqoybʼeni. Qilaq li eetalil chirix li awk, li Santil Hu naxye: «Aw laawiyaj eqʼla, ut aw wiʼ chik ewu, xbʼaan naq inkʼaʼ nakanaw bʼarwan li taaʼelq chi us, ma li xawaw xbʼenwa malaj li moqon, malaj us taaʼelq xkabʼichal» (Eclesiastes 11:6).
TAW XSUMENKIL EBʼ LI PATZʼOM LI QʼAXAL WANK XWANKIL
LI NAʼLEBʼ LI NAXKʼE LI SANTIL HU: «Laawaatin aʼan li yaal» (Juan 17:17).
KʼARU NARAJ XYEEBʼAL. Li Santil Hu naxsume ebʼ li patzʼom li maare naqabʼaanu qe. Joʼebʼ li patzʼom:
-
Kʼaru xyaalalil li qayuʼam?
-
Kʼaʼut naqakʼul li rahilal?
-
Kʼaru naqakʼul naq nokookamk?
-
Kʼaru tkʼulmanq saʼ li kutan chalk re?
Chi miyon li qas qiitzʼin saʼ chixjunil li Ruuchichʼochʼ sahebʼ chik saʼ xchʼool anaqwan xbʼaan naq ak xeʼril chanru naxsume li Santil Hu ebʼ li patzʼom aʼin ut jalan chik ebʼ li patzʼom.
KʼARU TATRUUQ XBʼAANUNKIL. Naqaj naq taawil rikʼin xnaqʼ aawu li naxkʼut li Santil Hu. Ye re junaq laj Testiiw re li Jehobʼa naq tatxtenqʼa chi xtawbʼal ru. Naru taawil ajwiʼ li qanaʼaj saʼ Internet jw.org malaj tatwulaq saʼ jun rehebʼ li qachʼutam. Moko tojbʼil ta li ok chi moko napatzʼmank ta tumin.
XKOMON LI NAʼLEBʼ LI NAXKʼE LI SANTIL HU
Taawil saʼ jw.org li bʼideo Kʼaʼut us naq tattzoloq chirix li Santil Hu?, numenaq 880 li aatinobʼaal li natawmank wiʼ.
XNAWBʼAL NAQ AAJEL RU LI YOS SAʼ LAAYUʼAM
«Moko kaʼaj ta wiʼ rikʼin wa yoʼyooq li winq, rikʼin aj bʼan wiʼ chixjunil li aatin naʼelk chi xtzʼuumal re li Yos» (MATEO 4:4).
XNAWBʼAL RU CHIʼUS XYOSIL LI SANTIL HU
«Jilonqex chi xkʼatq li Yos, ut aʼan taajiloq chekʼatq» (SANTIAGO 4:8).
RILBʼAL LI SANTIL HU UT XKʼOXLANKIL RIX
«Us xaq rehebʼ li [...] nekeʼxtaw bʼan xsahilalebʼ xchʼool rikʼin xchaqʼrabʼ li Qaawaʼ, nekeʼxkʼoxla rix li raatin ut nekeʼxtzol chi qʼeq ut chi kutan! [...] Us nekeʼelk rikʼin chixjunil li nekeʼxbʼaanu» (SALMO 1:1-3).
Maare twulaq ajwiʼ chaawu
LAJ KʼAAKʼALEHOM
Ma truuq tawiʼ intenqʼankil li Santil Hu?
Taataw naabʼal li chaabʼil saʼ li hu aʼin.
