LI NAʼLEBʼ LI NAXKʼE LI SANTIL HU: «Li ani nekeʼxkʼoxla chi us li kʼaʼru nekeʼxbʼaanu, us nekeʼel [...]. Abʼanan li ani inkʼaʼ nekeʼxkʼoxla chi us li kʼaʼru nekeʼxbʼaanu, ebʼ aʼan inkʼaʼ us nekeʼel» (Proverbios 21:5, Wy).

KʼARU NARAJ XYEEBʼAL. Re naq us tat-elq, qʼaxal aajel ru naq taatzʼiibʼa li taaloqʼ ut li taasach ut taabʼaanu joʼ chanru tzʼiibʼanbʼil. Jultikoʼq aawe naq maare inkʼaʼ tatruuq xloqʼbʼal chixjunil li nakaawaj. Joʼkan naq, kʼoxla chiʼus chanru taasach laatumin.

KʼARU TATRUUQ XBʼAANUNKIL

• Bʼaanu joʼ xaatzʼiibʼa. Tzʼiibʼa laasachomq ut kʼe chi chʼuut. Chirix chik aʼan, kʼoxla joʼnimal li tumin taawoksi choʼq re li junjunq. Wi toj naʼajmank aatumin, chap xtuminal li jun chik chʼuut re xloqʼbʼal li ak kʼubʼkʼu aabʼan. Jun eetalil, wi naabʼal xaasach choʼq re li gasoliin, oksi li tumin li xokxo aabʼan re xik chi waʼak saʼ bʼe.

• Matkʼasok chi maakʼaʼ xyaalal. Maakʼe aawibʼ saʼ kʼas chi maakʼaʼ rajbʼal. Re xloqʼbʼal li nakaawaj, xbʼeenwa chʼutubʼ xtuminal. Wi nakaawoksi li tarjeta re credito, toj laakʼas rajlal po re naq inkʼaʼ teʼxpatzʼ aawe li xraltumin. Ut, wi ak wank aakʼas, tzʼiibʼa chanru tat-oq xtojbʼal ut bʼaanu joʼ chanru tzʼiibʼanbʼil.

  Naq kitzʼilmank rix, kitawmank naq naabʼal tumin nasachmank naq naʼoksimank li tarjeta re credito. Joʼkan naq, weent taabʼaanu naq taawoksi.

LI NAʼLEBʼ LI NAXKʼE LI SANTIL HU: «Laj qʼem inkʼaʼ naʼawk saʼ xqʼehil li awk; ut saʼ xqʼehil li qʼolok, nasikʼok, abʼan maakʼaʼ naxtaw» (Proverbios 20:4).

KʼARU NARAJ XYEEBʼAL. Li qʼemkunil naru nakʼamok saʼ nebʼaʼil. Joʼkan naq, kʼe aaqʼe re kʼanjelak  chiʼus ut roksinkil chiʼus laatumin re naq wanq kʼaru aawe saʼ junaq kutan.

KʼARU TATRUUQ XBʼAANUNKIL

• Kʼanjelan. Wi us nakatkʼanjelak ut paabʼajel aawaatin, moko saʼ junpaat ta tateʼrisi saʼ laakʼanjel. Oxloqʼ chiruhebʼ li patron naq ebʼ li moos nekeʼxnaw kʼanjelak.

• Mattikʼtiʼik chi moko tat-elqʼaq. Wi nakat-elqʼak malaj nakattikʼtiʼik saʼ laakʼanjel, naru nakaatzʼajni laakʼabʼaʼ ut tchʼaʼajkoʼq chaawu xtawbʼal junaq chik laakʼanjel.

• Mixik aachʼool chirix li tumin. Wi naxik aachʼool chirix li tumin, naru naʼok aayajel ut taasach laawanjik rikʼinebʼ li junchʼol. Jultikoʼq aawe: li tumin moko aʼan ta li wank tzʼaqal xwankil saʼ laayuʼam.

MAASACH SAʼ JOʼMAAJOʼIL LAAHOONAL UT LAATUMIN

«Li kalaak ut li numwaʼak nakʼehok saʼ nebʼaʼil, ut ebʼ laj qʼem teʼsuqʼoʼq rixebʼ» (PROVERBIOS 23:21).

MIXIK AACHʼOOL CHI KʼOXLAK

«Mixik eechʼool chi kʼoxlak chirix leeyuʼam kʼaru teetzeka, chi moko chirix leetzʼejwal kʼaru teetiqibʼ wiʼ eeribʼ» (MATEO 6:25).

MATKAQALIK

«Bʼar nawank li kaqalik ut wechʼink, aran wank li poʼok ibʼ ut yalaq kʼaʼ chik chi maaʼusilal» (SANTIAGO 3:16).