LI NAʼLEBʼ LI NAXKʼE LI SANTIL HU: «Qʼaxal us naq wanq aakuyum chiru li xkawilal aawibʼ» (Proverbios 16:32).

KʼARU NARAJ XYEEBʼAL. Us naq tqatzol xkuybʼal li naqekʼa. Wank sut, wank xyaalal naq yooq qajosqʼil, abʼan wi inkʼaʼ naqakuy qibʼ, naru nokooxkʼe saʼ nimla rahilal. Ak ilbʼil, naq junaq li qas qiitzʼin naxkanabʼ chi elk li xjosqʼil, naxbʼaanu ut naxye li moko yeheʼk ta naraj, ut moqon chik, naxkʼoxla naq inkʼaʼ raj kixye.

KʼARU TATRUUQ XBʼAANUNKIL. Tzol xkuybʼal laajosqʼil, wi inkʼaʼ nakaabʼaanu, aʼan tnumtaaq saʼ aabʼeen. Wankebʼ nekeʼxkʼoxla naq rikʼin xkʼebʼal chi naweʼk li xjosqʼilebʼ nekeʼxkʼutbʼesi naq kawebʼ ribʼ, abʼan aʼin memil naʼlebʼ. Li Santil Hu naxye: «Li winq li inkʼaʼ naxkuy ribʼ [...] chanchan junaq tenamit maakʼaʼ xsuttzʼakil re xkolbʼal ribʼ» (Proverbios 25:28). Xnawbʼal chi tzʼaqal re ru li xkʼulmank tatxtenqʼa chi xkuybʼal laajosqʼil. Li Santil Hu naxye: «Li wank xkʼaʼuxl naxkuy li xjosqʼil» (Proverbios 19:11). Rabʼinkilebʼ li xeʼxkʼe ribʼ saʼ chʼaʼajkilal aʼin ttenqʼanq aawe chi xtawbʼal ru chiʼus li xkʼulmank ut tuqtuuq ru laachʼool.

LI NAʼLEBʼ LI NAXKʼE LI SANTIL HU: «Chexyoxinq» (Colosenses 3:15).

KʼARU NARAJ XYEEBʼAL. Wankebʼ nekeʼxye naq kaʼajwiʼ li nekeʼbʼanyoxink naru nekeʼxtaw li sahil chʼoolejil. Ut joʼkan ajwiʼ nekeʼxkʼoxla li xeʼxsach naabʼal li kʼaru re. Nekeʼxye naq xeʼxbʼanyoxi li kʼaru rehebʼ ut naq inkʼaʼ xeʼxkʼe saʼ xchʼool li xeʼxsach aʼan kitenqʼank rehebʼ chi xqʼaxbʼal ru li rekʼahomebʼ li moko chaabʼil ta.

KʼARU TATRUUQ XBʼAANUNKIL. Wulaj wulaj taatzʼiibʼa chixjunil li oxloqʼ chaawu. Moko aajel ta ru naq nimaq re naq taabʼanyoxi, maare li nakaawil wulaj wulaj, joʼ relik li Saqʼe, aatinak rikʼin laawech-alal li nakaara malaj xbʼaan jun kutan  chik laayuʼam. Wi nakaakʼe aaqʼe chi xyuʼaminkil aʼin, t-usaaq xkawilal laachʼool.

Jun rehebʼ li naʼlebʼ li qʼaxal tatxtenqʼa aʼan xbʼanyoxinkil rehebʼ laakomon ut ebʼ laawamiiw. Kʼoxla li oxloqʼ chaawu chirixebʼ ut chirix chik aʼan taaye rehebʼ malaj taatzʼiibʼa junaq xhuhebʼ, jun xkorreo malaj taataqla li esil saʼebʼ li xselular. Chi joʼkan, taakawresi laawanjik ut taawekʼa li sahil chʼoolejil li naxkʼam chaq xbʼaanunkil li us rehebʼ li junchʼol (Hechos 20:35).

ELEN CHI JUNPAAT

«Xyoobʼankil li raaxiikʼ, aʼan joʼ xteebʼal li tzʼakanbʼil haʼ: qʼaxal us li elk chi junpaat chiru naq taanimanq li xikʼil uuchink» (PROVERBIOS 17:14).

MIʼOK AAKʼAʼUXL CHI MAAKʼAʼ XYAALAL

«Mixik bʼiʼ eechʼool chi kʼoxlak chirix li kutan wulaj, xbʼaan naq li kutan wulaj taawanq ajwiʼ xkʼoxlankil rix. Tzʼaqalaq li chʼaʼajkilal re li junjunq chi kutan» (MATEO 6:34).

XBʼEENWA TATKʼOXLAQ TOJAʼ NAQ TATNAʼLEBʼAQ

«Li seebʼal kʼaʼuxl ut li chaabʼil nawok tatxkʼaakʼale ut tatxkol» (PROVERBIOS 2:11).