Li xkawilal laajunxaqalil
Li Santil Hu maawaʼ xhuhil li bʼanok, abʼan naxye kʼaru tento tqabʼaanu re naq kawaq li qajunxaqalil. Qatzʼilaq wiibʼ oxibʼ li xnaʼlebʼ li Santil Hu li naru naxkawresi li qajunxaqalil.
QACHʼOLANIQ QIBʼ CHIʼUS
LI NAʼLEBʼ LI NAXKʼE LI SANTIL HU: «Maajun wa junaq xikʼ kiril li xtzʼejwal, naxchʼoolani bʼan ut naxra» (Efesios 5:29).
KʼARU NARAJ XYEEBʼAL. Li naʼlebʼ aʼin naxye naq tento tqakʼe qaqʼe chi xchʼolaninkil li qajunxaqalil. Naq kitzʼilmank rix, kitawmank naq naabʼal rehebʼ li yajel nachalk xbʼaan naq inkʼaʼ naqachʼolani qibʼ chiʼus. Joʼkan bʼiʼ, wi naqachʼolani qibʼ chiʼus t-usaaq li qajunxaqalil.
KʼARU TATRUUQ XBʼAANUNKIL
-
Kʼe reetal li nakaatzaka. Kʼe aaqʼe chi xwaʼbʼal li tzakahemq li tixtenqʼa laajunxaqalil ut rukʼbʼal naabʼal li haʼ.
-
Anilan malaj piskʼon. Maakʼaʼ naxye jarubʼ chihabʼ wank aawe, li ekʼasink tibʼelej naru naxbʼaanu naq t-usaaq laajunxaqalil, usta wank xpaltil laajunxaqalil malaj xxeʼink junaq laayajel. Jun laakomon malaj junaq laj bʼanonel naru nakatxtenqʼa chi xyuʼbʼal aawibʼ, abʼan laaʼat chik yaal aawe ma taabʼaanu.
-
Warin chiʼus. Naabʼalebʼ nekeʼwark wiibʼ oxibʼ hoor ajwiʼ xbʼaan naq nekeʼroksi xkʼihalil li xhoonal re xbʼaanunkil jalan chik li kʼanjel. Saʼ xkʼabʼaʼ aʼin naru nekeʼxtaw li nimla yajel. Joʼkan naq, wark waqxaqibʼ hoonal tixbʼaanu naq sa taawekʼa aawibʼ.
KANABʼ LI NAXTZʼAJNI LAAJUNXAQALIL
LI NAʼLEBʼ LI NAXKʼE LI SANTIL HU: «Qachʼajobʼresiiq qibʼ, qisihaq chixjunil li tzʼajnil wank chiqix ut li xtzʼajnil li musiqʼej» (2 Corintios 7:1).
KʼARU NARAJ XYEEBʼAL. Kawaq aawibʼ wi inkʼaʼ nakaawoksi li naxtzʼajni laajunxaqalil joʼ li may, aʼin jun rehebʼ li xyaalal kʼaʼut nachalk li yajel ut li kamk.
KʼARU TATRUUQ XBʼAANUNKIL. Xaaqabʼ xkutankil joqʼe taakanabʼ mayibʼk, tzʼiibʼa chiru li ajlebʼaal kutan ut ye rehebʼ li nakaanaw naq tateʼxtenqʼa. Naq wiibʼ oxibʼ kutan chik ma nawulak xkutankil, taatzʼeq chixjunil li may, xnaʼaj li cha, li nakaaloch wiʼ laamay malaj junaq chik. Matnumeʼk bʼarwiʼ nekeʼmayibʼk.
XKOMON LI NAʼLEBʼ LI NAXKʼE LI SANTIL HU
Wi taawaj junaq li Santil Hu, aatinan rikʼin jun laj Testiiw re li Jehobʼa li wank saʼ laateep.
KʼOXLAN RUBʼELAJ
«Naq taakabʼla junaq akʼil ochoch, tento naq taakʼe li ramlebʼ saʼ xmu aran taqeʼq. Chi joʼkan inkʼaʼ taatenebʼ saʼ xbʼeen laajunkabʼal li xkamik li ani taatʼaneʼq chaq aran» (DEUTERONOMIO 22:8).
TUQTUUQ LAACHʼOOL
«Li wank xnaʼlebʼ inkʼaʼ najosqʼoʼk saʼ junpaat; li maakʼaʼ xkuyum naxkʼut li xmemil» (PROVERBIOS 14:29).
MATNUMWAʼAK
«Maajunaji aawibʼ rikʼinebʼ [...] li nekeʼxten xsaʼebʼ chi waʼak» (PROVERBIOS 23:20).
