3 Kʼaʼut nekeʼxkʼul li rahilal li chaabʼilebʼ xnaʼlebʼ?
Kʼaʼut wank xwankil xnawbʼal li xsumenkil?
Nimla maak naq li chaabʼilebʼ xnaʼlebʼ teʼxkʼul li rahilal. Wi junaq li qas qiitzʼin tril aʼin, maare tixkʼoxla naq maakʼaʼ aj e li naʼlebʼak chiʼus.
Kʼoxla aʼin
Wankebʼ nekeʼxpaabʼ naq ebʼ li poyanam nekeʼyoʼlaak ut nekeʼkamk naabʼal sut. Nekeʼxkʼoxla naq, wi yooko xbʼaanunkil li us saʼ li yuʼam aʼin, chaabʼilaq chik li qayuʼam naq tooyoʼlaaq wiʼ chik, abʼanan, wi yooko xbʼaanunkil li maaʼusilal, naabʼalaq qachʼaʼajkilal. Nekeʼxpaabʼ naq li chaabʼilebʼ xnaʼlebʼ, nekeʼxkʼul li rahilal wi xeʼxbʼaanu li maaʼusilal saʼ li xnajter yuʼam. Abʼan, kʼoxla li patzʼom aʼin:
-
Ma wank tawiʼ xyaalal naq tqakʼul li rahilal anaqwan saʼ xkʼabʼaʼ li xqabʼaanu saʼ li qanajter yuʼam ut inkʼaʼ chik jultik qe?
-
Wi li xsahilal li qayuʼam nachalk saʼ xkʼabʼaʼ li xqabʼaanu saʼ li qanajter yuʼam, kʼaru aj e naq tqakʼe qachʼool chirix li qakawilal ut naq inkʼaʼ tqakʼul li raxkamk?
RE XNAWBʼAL XKOMON
Sikʼ jw.org ut il li bʼideo Kʼaʼut naq li Yos inkʼaʼ narisi li rahilal?
Li naxye li Santil Hu
Li Yos inkʼaʼ nokooxkʼe chi xtojbʼal rix qamaak rikʼin rahilal
Wank sut nakʼulmank junaq li rahilal naq inkʼaʼ naʼoybʼenimank, wanko saʼ li naʼaj ut saʼ li hoonal naq nakʼulmank.
«Li qʼaxal seebʼebʼ li nekeʼechanink re li maatan saʼ li aalinak, chi moko ebʼ li kawebʼ ribʼ li nekeʼnumtaak saʼ li pleet. Ut ebʼ li wankebʼ xnaʼlebʼ inkʼaʼ nekeʼxtaw xtzakahemqebʼ yal xbʼaan naq wankebʼ xnaʼlebʼ. Ut ebʼ li seebʼebʼ xchʼool inkʼaʼ nekeʼbʼihomoʼk yal xbʼaan naq seebʼebʼ xchʼool. Ut ebʼ li tzolbʼilebʼ moko rajlal ta nekeʼkʼuleʼk saʼ usilal. Chixjunil aʼin moko nekeʼxnaw ta joqʼe teʼxkʼul li chʼaʼajkilal» (ECLESIASTÉS 9:11, Wy. AKʼ TZʼIIBʼ).
Naqakʼul li rahilal xbʼaan naq laaʼo aj maak chalen naq nokooyoʼlaak
Chi rajlal, ebʼ li qas qiitzʼin nekeʼroksi li aatin maak re aatinak chirix li maaʼusil naʼlebʼ. Abʼan li Santil Hu naroksi ajwiʼ li aatin aʼin re aatinak chirix li maak li xqechani rikʼin laj Adán ut xʼEva aʼ yaal ma us malaj inkʼaʼ us qanaʼlebʼ.
«Chakʼe reetal naq saʼ maak xinyoʼlaak, ak aj maakin ajwiʼ chaq naq xinsiyaak rikʼin linnaʼ» (SALMO 51:7).
Li maak kixkʼam chaq li nimla rahilal saʼ xbʼeenebʼ li qas qiitzʼin
Kixpoʼ li qawanjik rikʼin li Yos, rikʼinebʼ li qechpoyanamil ut rikʼin li qasutam. Aʼin kixkʼam chaq li nimla rahilal saʼ qabʼeen ut maaʼani nakoleʼk chiru.
«Us ta nawaj raj xbʼaanunkil li us, aʼ chik li inkʼaʼ us naxkʼe ribʼ chiwu» (ROMANOS 7:21).
«Chixjunil li wank junsut junrubʼel choxa naʼayaynak chaq ut wank saʼ rahilal» (ROMANOS 8:22).
