Wankebʼ nekeʼxtzʼeqtaana li jalanebʼ xtenamit, qʼeq malaj saq, xteep, raatinobʼaal, xpaabʼal, winq malaj ixq, nebʼaʼ malaj bʼihom. Wankebʼ inkʼaʼ sa nekeʼril li junchʼol xbʼaanebʼ li xchihabʼ, li xtzolbʼal, naq inkʼaʼ tzʼaqalebʼ re ru malaj xbʼaan chanru nekeʼilok. Abʼanan, nekeʼxkʼoxla naq inkʼaʼ nekeʼtzʼeqtaanank.

Ma bʼonbʼilat ajwiʼ rikʼin li tzʼeqtaanank? Moko chʼaʼaj ta rilbʼal li tzʼeqtaanank rikʼinebʼ li junchʼol, abʼan maare chʼaʼaj rilbʼal aʼin saʼ li qayuʼam. Usta inkʼaʼ raj naqaj, chiqajunilo nokootzʼeqtaanank. Laj David Williams li kawresinbʼil chirix li komonil naxye naq wi jun li poyanam «inkʼaʼ sa naril jun siir li qas qiitzʼin ut naq tixtaw ribʼ rikʼin jun rehebʼ aʼan, inkʼaʼ sa tril, abʼan inkʼaʼ tixkʼe reetal chanru kinaʼlebʼak rikʼin».

Jun eetalil, laj Yovitsa kiwank saʼ jun li teep re Europa bʼarwiʼ wank jun chʼina chʼuut li qas qiitzʼin. Tojaʼ naq naxye: «Junelik xinkʼoxla naq maajun rehebʼ li qas qiitzʼin aʼin chaabʼil xnaʼlebʼ. Inkʼaʼ ninkʼoxla naq nintzʼeqtaanank. Ninye saʼ linchʼool: “Yaal li ninkʼoxla chirixebʼ”».

Naabʼalebʼ li awabʼej nekeʼxxaqabʼ ebʼ li chaqʼrabʼ re risinkil li tzʼeqtaanank ut jalan chik li chʼaʼajkilal. Abʼan, inkʼaʼ nekeʼruuk risinkil. Kʼaʼut? Xbʼaan naq ebʼ li chaqʼrabʼ aʼin kaʼajwiʼ naril li nekeʼxbʼaanu ebʼ li qas qiitzʼin, ut inkʼaʼ li nekeʼxkʼoxla ut li nekeʼrekʼa. Li tzʼeqtaanank nayoʼlaak saʼ xkʼaʼuxebʼ ut saʼ xchʼoolebʼ li qas qiitzʼin. Aʼut, ma maakʼaʼ chik tooruuq xbʼaanunkil chirix li tzʼeqtaanank? Ma wank xbʼanol?