Aʼin tzʼaqal xbʼanol!
Chi miyon li poyanam xeʼxyuʼami li naʼlebʼ li naxkʼe li Santil Hu ut xeʼruuk risinkil li tzʼeqtaanank saʼ xchʼoolebʼ. Abʼan, chʼolchʼo tzʼaqal naq qajunes inkʼaʼ tooruuq risinkil chi junajwa li tzʼeqtaanank. Abʼanan, ma wank junaq xbʼanol?
Jun li awabʼejilal li tzʼaqal re ru
Joʼ ak ilbʼil, ebʼ li awabʼej moko nekeʼruuk ta risinkil chi junajwa li tzʼeqtaanank. Abʼan, ma naraj xyeebʼal aʼin naq maaʼani truuq risinkil?
Re naq junaq li awabʼej truuq risinkil chi junajwa li tzʼeqtaanank tento raj tixbʼaanu aʼin:
-
1. Tixsikʼ li naʼlebʼ li t-ekʼasinq rehebʼ li qas qiitzʼin chi xjalbʼal li nekeʼxkʼoxla ut li nekeʼrekʼa chirixebʼ li junchʼol.
-
2. Tixbʼan li qarahilal li naxbʼaanu naq xikʼ tqilebʼ li junchʼol.
-
3. Tixxaqabʼ ebʼ laj kʼamolbʼe li juntaqʼeet trilebʼ chixjunil.
-
4. Tixjunaji ebʼ li qas qiitzʼin re chixjunil li ruuchichʼochʼ.
Li Santil Hu naxye qe naq li Yos kixxaqabʼ jun li awabʼejilal li tixbʼaanu chixjunil aʼin. Naxkʼabʼaʼi li «xnimajwal awabʼejihom li Yos» (Lucas 4:43).
Kʼe reetal li tixkʼe qe li awabʼejilal aʼin.
1. Chaabʼilaq li qatzolbʼal
Chixjunilebʼ li qas qiitzʼin teʼxtzol li tiikilal (ISAÍAS 26:9).
«Li xkʼanjel li tiikilal aʼan li wank saʼ tuqtuukilal, ut li naruuchin li kʼulubʼej aʼan li sahil wank ut li kawil chʼoolej chi junajwa» (ISAÍAS 32:17).
Kʼaru naraj xyeebʼal? Li Xʼawabʼejilal li Yos tixkʼut chiruhebʼ li qas qiitzʼin bʼar wank tzʼaqal li us. Naq naqanaw bʼar wank li us ut li inkʼaʼ us, malaj li tiik ut li inkʼaʼ tiik, najalaak li naqakʼoxla chirixebʼ li junchʼol. Chixjunil li ruuchichʼochʼ tixnaw naq xraabʼal ebʼ li qas qiitzʼin, maakʼaʼ naxye bʼar chalenaqebʼ, aʼan li jwal us.
2. Maakʼaʼaq chik li rahilal
Li Yos «tixchaqihobʼresi chixjunil li xyaʼalebʼ ru, ut inkʼaʼ chik taawanq kamk, chi moko yaabʼak, chi moko japok e malaj rahilal, xbʼaan naq li najter ruuchichʼochʼ ak xnumeʼk» (APOCALIPSIS 21:4).
Kʼaru naraj xyeebʼal? Li Xʼawabʼejilal li Yos trisi chi junajwa chixjunil li rahilal li nachalk saʼ xkʼabʼaʼ naq maakʼaʼ li tiikilal. Maakʼaʼaq chik li yiibʼru aj naʼlebʼ li naxtik chaq xjosqʼilebʼ li rahobʼtesinbʼilebʼ.
3. Chaabʼilaq li tjolominq qe
«Inkʼaʼ taaraqoq aatin joʼ chanru naril chi moko xbʼaan naq yal xyeheʼk re. Taaraqoq bʼan aatin saʼ tiikilal chirixebʼ li maakʼaʼebʼ xwankil ut tixkolebʼ li nebʼaʼ» (ISAÍAS 11:3, 4).
Kʼaru naraj xyeebʼal? Li Jesukriist, li Awabʼej saʼ li Xʼawabʼejilal li Yos, saʼ choxa wanq naq tixjolomi li Ruuchichʼochʼ ut maajunwa tsikʼoq u. Li Jesús juntaqʼeet tixrahebʼ li tenamit ut truuq xbʼaanunkil naq li xchaqʼrabʼ ttzʼaqloq ru saʼ chixjunil li Ruuchichʼochʼ.
4. Wanq li junajil
Li Xʼawabʼejilal li Yos naxbʼaanu naq ebʼ li poyanam junajaq ru li xkʼaʼuxebʼ ut junajaq ru li xrahomebʼ, naq wanqebʼ tzʼaqal saʼ junajil ut junajaq ru teʼkʼoxlaq (FILIPENSES 2:2).
Kʼaru naraj xyeebʼal? Li junajil li wanq saʼ xyanqebʼ li qas qiitzʼin li wanqebʼ rubʼel li Xʼawabʼejilal li Yos moko yal yoobʼanbʼil ta. Relik chi yaal naq teʼwanq saʼ junajil xbʼaan naq teʼxra ribʼ chi anchalebʼ xchʼool.