Ebʼ li chaabʼil naʼlebʼ re naq sahaq saʼ xchʼool laajunkabʼal
Li sumlaak ut ebʼ li kokʼal aʼan jun li loqʼlaj maatan li naxkʼe qe laj Yobʼtesinel. Saʼ xkʼabʼaʼ naq aʼan naraj naq sahaq saʼ xchʼool li qajunkabʼal, naxkʼe qe li chaabʼil naʼlebʼ saʼ jun li najteril hu li jwal oxloqʼ. Saʼ li tzolom aʼin tqil wiibʼ oxibʼ rehebʼ li naʼlebʼ aʼin.
Ex bʼeelomej, cheera leerixaqil
«Li winq tento teʼxra li rixaqil, kamaʼ naq nekeʼxra li xtzʼejwalebʼ. Ani naxra li rixaqil naxra ajwiʼ ribʼ. Maajun wa junaq xikʼ kiril li xtzʼejwal, naxchʼoolani bʼan ut naxra» (EFESIOS 5:28, 29).
Li bʼeelomej aʼan xjolomil li junkabʼal (Efesios 5:23). Jun li chaabʼil bʼeelomej moko kaw ta nataqlank, naroxloqʼi bʼan li rixaqil, naril, naxkʼe li xtumin ut naxra. Joʼkan ajwiʼ, naxbʼaanu chixjunil li wank saʼ ruqʼ re naq sahaq saʼ xchʼool ut moko naxmin ta ru re naq tixbʼaanu li kʼaru naraj aʼan (Filipenses 2:4). Naq naʼaatinak rikʼin, naxye re li narekʼa ut li naxkʼoxla, abʼan naxkʼe ajwiʼ xchʼool chi rabʼinkil. Moko saʼ junpaat ta napoʼk rikʼin, inkʼaʼ naxsakʼ malaj naxtzʼekbʼe (naxkut) chi aatin (Colosenses 3:19).
At ixaqilbʼej, chaawoxloqʼi laabʼeelom
«Li ixaqilbʼej chiroxloqʼi li xbʼeelom» (EFESIOS 5:33).
Li ixaqilbʼej naxbʼaanu naq twanq li tuqtuukilal saʼ li junkabʼal naq naroxloqʼi li xbʼeelom ut naʼokenk chirix rikʼin li naxye. Naq napaltoʼk inkʼaʼ naxkʼe saʼ xutaan, inkʼaʼ napoʼk rikʼin, naroxloqʼi bʼan (1 Pedro 3:4). Joʼkan ajwiʼ, naq nachalk junaq li chʼaʼajkilal li aajel ru xtuqubʼankil ru, naxsikʼ li hoonal re aatinak rikʼin ut naraatina saʼ tuulanil (Eclesiastés 3:7).
Chaawoxloqʼi laasumlajik
«Li winq [...] tixlaqʼabʼ ribʼ rikʼin li rixaqil, ut junajebʼ aj chik chi tzʼejwalej naq wanqebʼ» (GÉNESIS 2:24).
Naq jun li winq ut jun li ixq nekeʼsumlaak, junebʼ aj chik. Joʼkan naq, junaq li sumal naxkʼe xqʼe re naq tkawuuq li xsumlajik rikʼin xyeebʼal li nekeʼrekʼa ut xbʼaanunkil junaq li naʼlebʼ li tixbʼaanu naq sa trekʼa ribʼ li xsumʼaatin. Maajunwa raj tixlaqʼabʼ ribʼ rikʼin jalan chik li maawaʼ li xsumʼaatin. Naq junaq naxmux li xsumlajik, naxtochʼ xchʼool li xsumʼaatin ut naxjukʼ li xjunkabʼal (Hebreos 13:4).
Ex yuwaʼbʼej, cheetij leeralal leekʼajol
«Kʼe xnaʼlebʼebʼ li kokʼ poyanam naq toj saajebʼ; ut naq toxeʼtixq, inkʼaʼ taasachq saʼ xchʼoolebʼ» (PROVERBIOS 22:6).
Li Yos kixtenebʼ saʼ xbʼeenebʼ li naʼbʼej yuwaʼbʼej xtijbʼalebʼ li ralal xkʼajol, xkʼutbʼal chiruhebʼ li chaabʼil bʼe ut xkanabʼankil jun chaabʼil eetalil choʼq rehebʼ (Deuteronomio 6:6, 7). Naq junaq li chʼinaʼal inkʼaʼ naʼabʼink, li naʼbʼej malaj li yuwaʼbʼej moko nanaʼlebʼak ta saʼ maajoʼil, seebʼ bʼan xchʼool chi abʼink, naxkuy ribʼ chi aatinak ut naxkuy ribʼ chi josqʼoʼk (Santiago 1:19). Ut wi naʼajmank xqʼusbʼal, tixbʼaanu saʼ xkʼabʼaʼ naq naxra ut maawaʼ xbʼaan xjosqʼil.
At alal kʼajolbʼej, chat-abʼinq chiru laanaʼ laayuwaʼ
«Ex alalbʼej, chepaabʼ leenaʼ leeyuwaʼ [...]. “Chawoxloqʼi laanaʼ laayuwaʼ[”]» (EFESIOS 6:1, 2).
Ebʼ li alal kʼajolbʼej tento teʼabʼinq ut teʼroxloqʼi li xnaʼ xyuwaʼ. Naq nekeʼxbʼaanu aʼin, nawank tuqtuukilal saʼ li junkabʼal ut sahebʼ saʼ xchʼool. Naq nekeʼninqank ebʼ li alal kʼajolbʼej, nekeʼxkʼutbʼesi naq nekeʼroxloqʼi li xnaʼ xyuwaʼ naq nekeʼril naq us wankebʼ. Jun eetalil, nekeʼxtenqʼahebʼ rikʼin li naʼajmank saʼ li ochoch malaj rikʼin tumin naq naʼajmank chiruhebʼ (1 Timoteo 5:3, 4).
Maare twulaq ajwiʼ chaawu
LAAJUNKABʼAL NARU NAXTAW LI SAHIL CHʼOOLEJIL
Teesikʼ li Yos re naq sahaq leechʼool
Wiibʼ li patzʼom li ttenqʼanq rehebʼ li sumsukebʼ re naq sahaqebʼ saʼ xchʼool.
LI SANTIL HU NAXSUME EBʼ LI PATZʼOM
Ma naroybʼeni li Yos naq tqil qanaʼ qayuwaʼ naq teʼcheekoʼq?
Li Santil Hu naʼaatinak chirixebʼ li winq ut ixq li xeʼril chaq li xnaʼ xyuwaʼ ut naxkʼe ajwiʼ li chaabʼil naʼlebʼ li natenqʼank.
