Li naxkʼut chiqu laj Yobʼtesinel naxkʼe qoybʼenihom
Li Yos naxyeechiʼi naq chi seebʼ tjalaaq li qawanjik. Chi seebʼ tixsach li rahilal ut tixbʼaanu naq ebʼ li kristiʼaan teʼxtaw xsahil ebʼ li xyuʼam (Salmo 37:11). Kʼaʼut naru naqakʼojobʼ qachʼool chirix li xyeechiʼom li Yos? Xbʼaan naq «li Yos moko winq ta. [...] Inkʼaʼ natikʼtiʼik» (Números 23:19, Wy). Qilaq wiibʼ oxibʼ li naʼlebʼ li tixbʼaanu li Yos.
Li Yos tixsachebʼ li maaʼusebʼ xnaʼlebʼ
«Us ta wanqebʼ li inkʼaʼ usebʼ xchʼool kamaʼ li rax pim ut teʼkʼihanq li nekeʼbʼaanunk maaʼusilal, abʼanan teʼsacheʼq chi junajwa» (SALMO 92:8).
Joʼ ak xqil, kʼajoʼ li maaʼusilal wank saʼ xbʼeen li Ruuchichʼochʼ. Abʼan inkʼaʼ nasach qachʼool rilbʼal aʼin, xbʼaan naq li Santil Hu ak kixye saʼ 2 Timoteo 3:1-5 naq ebʼ li kristiʼaan joʼkan teʼnaʼlebʼaq «saʼ rosoʼjikebʼ li kutan». Abʼan, kʼaru naraj xyeebʼal li rosoʼjikebʼ li kutan? Aʼin naraj xyeebʼal li rosoʼjik ebʼ li kristiʼaan li inkʼaʼ nekeʼabʼink chiru li Yos. Chi seebʼ, li Yos tixsachebʼ li inkʼaʼ nekeʼraj xjalbʼal ebʼ li xmaaʼus aj naʼlebʼ. Kaʼajwiʼ ebʼ li kristiʼaan li nekeʼabʼink chiru li Yos teʼkanaaq saʼ xbʼeen li Ruuchichʼochʼ. Salmo 37:29 naxye: «Abʼan li tiikebʼ xchʼool teʼreechani li chaabʼil naʼajej [“li Ruuchichʼochʼ”, TNM], ut aran teʼwanq junqʼe junqʼe kutan».
Li Yos tixsach laj Tza
«Li Yos li nakʼehok tuqtuukil usilal tixyeqʼi laj tza rubʼel eeroq chi seebʼ» (ROMANOS 16:20).
Naq laj Tza, ebʼ li maaʼus aj musiqʼej ut ebʼ li kristiʼaan li maaʼusebʼ xnaʼlebʼ teʼsacheʼq, twanq chik tuqtuukilal saʼ xbʼeen li Ruuchichʼochʼ. Li Yos naxye: «Maaʼani chik txuwaq» (Miqueas 4:4).
Li Yos tixsach ebʼ li yajel ut li kamk
«Li xmuhebʼaal li Yos [wanq] rikʼinebʼ li poyanam [...]. Tixchaqihobʼresi chixjunil li xyaʼalebʼ ru, ut inkʼaʼ chik taawanq kamk, chi moko yaabʼak, chi moko japok e malaj rahilal» (APOCALIPSIS 21:3, 4).
Li Yos tixsach li maaʼusilal li keʼxkʼam chaq laj Tza, laj Adán, li xʼEva ut li qamaak. Joʼkan ajwiʼ, maakʼaʼaq chik li rahilal, ebʼ li yajel, joʼ ajwiʼ maakʼaʼaq chik li kamk. Ebʼ li nekeʼabʼink ut nekeʼxra li Yos teʼwanq chi junelik. Abʼan, bʼar teʼwanq?
Li Yos tixchʼinaʼusa li Ruuchichʼochʼ
«Sahoqebʼ li chaqichʼochʼ ut li joxkʼ naʼajej! Chisahoʼq li junesal naʼajej ut chinujaq chi uutzʼuʼuj» (ISAÍAS 35:1).
Naq li Yos tixsach li maaʼusilal, li Ruuchichʼochʼ aʼanaq chik jun chʼinaʼusil naʼajej. Twanq ebʼ li chʼinaʼusil naʼajej bʼarwiʼ tqajsi qu, ebʼ li ninqi naʼaj li numtajenaqaq chi uutzʼuʼuj ut li chʼochʼ naabʼal chik li tzekemq tixkʼe (Salmo 72:16). Ebʼ li palaw, li nimaʼ ut ebʼ li kokʼ roqhaʼ saqaqebʼ chik ru ut chaabʼilaqebʼ. Joʼkan ajwiʼ, inkʼaʼ chik tjultikamanq naq tzʼaj chaq li Ruuchichʼochʼ. Ebʼ li kristiʼaan teʼxkabʼla ebʼ li rochoch ut teʼwanq chisaʼ. Maaʼani chik twanq saʼ nebʼaʼil, tixnumsi weʼej malaj twanq saʼ bʼe (Isaías 65:21, 22).
Li Yos tixkʼehebʼ wiʼ chik xyuʼam ebʼ li kamenaq
«Teʼwakliiq wiʼ chik chi yoʼyo li kamenaq» (HECHOS 24:15, Wy).
Ma twulaq raj chaawu rilbʼalebʼ wiʼ chik ebʼ laakomon ut ebʼ laawamiiw li ak xeʼkamk? Li Nimajwal Yos tixwaklesihebʼ wiʼ chik chi yoʼyo saʼ li chʼinaʼusil naʼajej arin saʼ Ruuchichʼochʼ. Peʼyaal naq kʼajoʼ tsahoʼq aachʼool chi rilbʼalebʼ wiʼ chik ut joʼkan ajwiʼ teʼrekʼa ribʼ ebʼ aʼan! Li Santil Hu naxkʼut naq li Yos kixkʼe xwankil li Jesús naq kiwank arin saʼ Ruuchichʼochʼ re naq truuq xwaklesinkil wiʼ chik chi yoʼyo ebʼ li kokʼal ut ebʼ li ninqi kristiʼaan re naq teʼruuq wanq wiʼ chik rikʼinebʼ li xjunkabʼal ut naq kixbʼaanu aʼin naabʼal ebʼ li kristiʼaan yookebʼ chi ilok re (Lucas 8:49-56; Juan 11:11-14, 38-44).
Maare twulaq ajwiʼ chaawu
AJSI AAWU!
Xnumtaak li chʼaʼajkilal: Maatzʼeq laawoybʼenihom
Li Santil Hu nokooxtenqʼa chi xqʼaxbʼal ru ebʼ li chʼaʼajkilal ut naxkʼe qoybʼenihom.
LI SANTIL HU NAXSUME EBʼ LI PATZʼOM
Kʼaru naraj xyeebʼal wakliik wiʼ chik chi yoʼyo?
Maare taasachq aachʼool chi xnawbʼal ani teʼwakliiq wiʼ chik chi yoʼyo.
LI SANTIL HU NAXSUME EBʼ LI PATZʼOM
Chanru tchalq li tuqtuukilal saʼ Ruuchichʼochʼ?
Li Santil Hu naxye naq li Xʼawabʼejilal li Yos tixkʼam chaq li tuqtuukilal saʼ chixjunil li Ruuchichʼochʼ.
