Chanru tixkʼe saʼ chʼaʼajkilal li Internet laakʼaʼuxl
Junelik yooko xtzolbʼal qanaʼlebʼ: naq wanko saʼ tzolebʼaal, saʼ li qakʼanjel malaj saʼ jalan chik li naʼajej. Li Internet naru nokooxtenqʼa. Ut anaqwan usta wanko saʼ li qochoch malaj chunchuko saʼ li qanaʼaj saʼ junpaat naqataw li naqaj xnawbʼal.
Abʼan ebʼ li kristiʼaan li junelik nekeʼroksi li Internet naru nekeʼxkʼul ebʼ li chʼaʼajkilal aʼin:
-
Moko nekeʼxkʼe ta chik xchʼool chirix li yookebʼ xyaabʼasinkil.
-
Nachʼaʼajkoʼk chiruhebʼ xkʼebʼal xchʼool chirix jun ajwiʼ li naʼlebʼ.
-
Saʼ junpaat nekeʼtitzʼk naq wankebʼ xjunes.
LI TENTO XNAWBʼAL
ILOK RU HU
Ebʼ li kristiʼaan li nekeʼroksi li xkʼanjelobʼaal re rilbʼal junaq li hu moko nekeʼril ta chixjunil, nekeʼril bʼan saʼ junpaat kaʼajwiʼ re xtawbʼal ru chirix kʼaru naʼaatinak.
Rilbʼal xsaʼ junaq li hu saʼ junpaat natenqʼank re xtawbʼal xsumenkil junaq li patzʼom. Abʼan aʼin inkʼaʼ natenqʼank naq naqaj xtawbʼal xchamal junaq li naʼlebʼ.
KʼOXLA AʼIN: Ma chʼaʼaj chaawu rilbʼal naq najt roq li yookat xyaabʼasinkil? Kʼaʼut tattzoloq chiʼus wi saʼ xyaalal nakaayaabʼasi junaq li naʼlebʼ? (PROVERBIOS 18:15).
KʼE AACHʼOOL CHIRIX JUN AJWIʼ LI KʼANJEL
Wankebʼ nekeʼroksi li Internet re xbʼaanunkil jalan jalanq li naʼlebʼ saʼ jun ajwiʼ chi hoonal. Jun eetalil, naq yookebʼ chi tzolok, yookebʼ ajwiʼ xtaqlankil li esil choʼq rehebʼ li ramiiw. Xbʼaan naq moko nekeʼxkʼe ta xchʼool chirix jun ajwiʼ li naʼlebʼ, moko us ta nekeʼelk.
Maare chʼaʼaj xkʼebʼal aachʼool chirix jun ajwiʼ li naʼlebʼ, abʼan taataw rusilal wi taabʼaanu. Li xGrace naxye: «Aʼin naxbʼaanu naq moko tatpaltoʼq ta ut inkʼaʼ tixkʼe xrahil aajolom. Xinkʼe reetal naq us ninʼelk wi ninkʼe inchʼool chirix jun ajwiʼ li naʼlebʼ ut moko chirix ta naabʼal li kʼanjel saʼ jun ajwiʼ chi hoonal».
KʼOXLA AʼIN: Naq nakaachap xbʼaanunkil naabʼal li kʼanjel, ma nachʼaʼajkoʼk chaawu xjultikankil ut xtawbʼal ru li xaatzol? (PROVERBIOS 17:24).
LI JUNESAL
Naabʼalebʼ inkʼaʼ sa nekeʼrekʼa ribʼ naq wankebʼ xjunes wi maakʼaʼ nekeʼxbʼaanu. Joʼkan naq nekeʼroksi li Internet re naq sa teʼrekʼa ribʼ. Li xʼOlivia naxye: «Saʼ junpaat nintitzʼ wi maakʼaʼ ninbʼaanu, inkʼaʼ ninruuk wank 15 kʼasal chi inkʼaʼ tinwil linselular, lintablet malaj li tele».
Abʼanan, re xtawbʼal rusilal li naqil aajel ru naq chiqajunilo tqakʼe qahoonal re wank qajunes ut chi joʼkan tooruuq xkʼoxlankil rix li ak xqatzol.
KʼOXLA AʼIN: Naq wankat aajunes, ma nakaawoksi li hoonal aʼan re kʼoxlak? (1 TIMOTEO 4:15).
LI TATRUUQ XBʼAANUNKIL
KʼOXLA CHANRU NAKAAWOKSI LI INTERNET
Chanru truuq li Internet aatenqʼankil re naq seebʼaq aachʼool chi tzolok? Ut chanru tatxkʼe saʼ chʼaʼajkilal naq yookat chi tzolok?
LI NAʼLEBʼ LI NAXKʼE LI SANTIL HU: «Kol li naʼlebʼ li qʼaxal nakʼanjelak ut li seebʼal kʼaʼuxl» (PROVERBIOS 3:21, TNM).
