Ma nekeʼxnaw ebʼ li nekeʼxtzʼil rix li jalan jalanq chi naʼlebʼ chanru kitiklaak li choxa, li Ruuchichʼochʼ ut li yuʼam? Inkʼaʼ. Wankebʼ nekeʼxye naq li nekeʼxtzʼil rix li choxa ut li Ruuchichʼochʼ naru nekeʼxchʼolobʼ aʼin. Laj Marcelo Gleiser, jun laj kʼutunel chirix li choxa ut li Ruuchichʼochʼ saʼ li nimla tzolebʼaal Dartmouth ut naʼokenk saʼ xyanqebʼ laj agnóstico, naxye: «Inkʼaʼ nokooruuk xchʼolobʼankil chi tzʼaqal chanru kitiklaak li choxa ut li Ruuchichʼochʼ».

Kʼaru nayeemank chirix li xtiklajik li yuʼam? Li hu Science News naxye: «Maajunwa tana tooruuq xyeebʼal chanru kitiklaak li yuʼam saʼ Ruuchichʼochʼ. Li xkʼihalil ebʼ li pek ut li bʼaqel li truuq raj xyeebʼal qe chanru kitiklaak li yuʼam, inkʼaʼ chik natawmank». Li nekeʼxye naxkʼut naq li nekeʼxtzʼil rix li jalan jalanq chi naʼlebʼ maajiʼ nekeʼruuk xsumenkil chanru kitiklaak li choxa, li Ruuchichʼochʼ ut li yuʼam.

Maare laaʼat nakaakʼoxla: «Wi yiibʼanbʼil li yuʼam saʼ Ruuchichʼochʼ, ani kiyiibʼank re? Ut wi chaabʼil xnaʼlebʼ ut seebʼ xchʼool laj Yobʼtesinel, kʼaʼut naxkanabʼ naq tqakʼul li rahilal? Kʼaʼut wank naabʼal li paabʼal? Kʼaʼut naxkanabʼ naq ebʼ laj paabʼanel teʼxbʼaanu li maaʼusilal?».

Ebʼ li nekeʼxtzʼil rix li jalan jalanq chi naʼlebʼ moko nekeʼruuk ta xsumenkil ebʼ li patzʼom aʼin, abʼan aʼin moko naraj ta xyeebʼal naq maakʼaʼ xsumenkil. Naabʼal li kristiʼaan ak xeʼxtaw xsumenkil ebʼ li patzʼom aʼin saʼ li Santil Hu.

Wankebʼ li nekeʼxtzʼil rix li jalan jalanq chi naʼlebʼ xeʼxkʼe xhoonal re xtzolbʼal li Santil Hu. Ma twulaq raj chaawu xnawbʼal kʼaʼut xeʼok xpaabʼankil naq wank jun laj Yobʼtesinel? Sikʼ saʼ jw.org ut tzʼiibʼa bʼarwiʼ naxye sikʼ «Li nekeʼxye chirix li yuʼam».