Kʼaru yook chi kʼulmank rikʼin roxloqʼinkil qibʼ?
KʼAʼUT WANK XWANKIL ROXLOQʼINKIL QIBʼ
Li naroxloqʼi ribʼ, naxnumsi ebʼ li chʼaʼajkilal chi kaw ru xchʼool ut inkʼaʼ naxkanabʼ xkʼebʼal xqʼe.
-
Naq xtzʼilmank rix chanru nekeʼnaʼlebʼak ebʼ li inkʼaʼ nekeʼroxloqʼi ribʼ, kitawmank naq qʼaxal nekeʼok xkʼaʼuxl, qʼaxal nekeʼrahok saʼ xchʼool ut moko sa ta chik nekeʼwaʼak. Joʼkan ajwiʼ, nekeʼnumʼukʼaʼk, nekeʼrukʼ li bʼan li moko kʼebʼil ta rehebʼ xbʼaan laj bʼanonel, joʼ ajwiʼ li bʼan li nakanobʼresink u.
-
Ebʼ li nekeʼroxloqʼi ribʼ, rikʼin maaʼani nekeʼxjuntaqʼeeta ribʼ, us nekeʼxkʼam ribʼ rikʼinebʼ li junchʼol ut nekeʼxtaw li tzʼaqal amiiwil. Ut ebʼ li inkʼaʼ nekeʼroxloqʼi ribʼ, qʼaxal sa nekeʼril wechʼok. Ut saʼ xkʼabʼaʼ li yibʼ aj naʼlebʼ aʼin, ebʼ li ramiiw naru nekeʼtzʼeqtaanank rehebʼ.
-
Joʼkan ajwiʼ, ebʼ li nekeʼroxloqʼi ribʼ, kawebʼ xchʼool usta yookebʼ xnumsinkil li chʼaʼajkilal ut inkʼaʼ nekeʼxkanabʼ naq li chʼaʼajkilal tixram chiruhebʼ xtawbʼal li nekeʼraj. Abʼanan, ebʼ li inkʼaʼ nekeʼroxloqʼi ribʼ, junelik nekeʼril naq nim li xchʼaʼajkilalebʼ usta moko joʼkan ta, ut chʼolchoʼ naq teʼxkanabʼ xkʼebʼal xqʼe.
LI TATRUUQ XBʼAANUNKIL
Sikʼ li chaabʼil amiiw re naq li xnaʼlebʼebʼ tatxtenqʼa saʼ laayuʼam. Tatwanq choʼq ramiiwebʼ li nekeʼxnaw oxloqʼink, li nekeʼxkʼe xchʼool chaawix ut li nekeʼxbʼaanu li chaabʼil naʼlebʼ li tatxtenqʼa saʼ laayuʼam.
Tenqʼahebʼ li junchʼol. Wi tuulanat ut nakaatenqʼahebʼ li junchʼol, taataw xsahil aachʼool. Abʼan, wi nakaatenqʼahebʼ li inkʼaʼ teʼruuq xqʼaxtesinkil aawe li xaabʼaanu chirixebʼ, qʼaxal taataw wiʼ chik xsahil aachʼool ut taawekʼa naq wank xyaalal li xaabʼaanu. Yaal aʼin, usta wankebʼ inkʼaʼ teʼxbʼanyoxi aawe li usilal li xaabʼaanu.
Tenqʼahebʼ laakokʼal re naq teʼxtzol roxloqʼinkil ribʼ. Jun rehebʼ li naʼlebʼ li taabʼaanu aʼan naq tkanabʼebʼ chi xtuqubʼankil ebʼ li xchʼaʼajkilal, wi naruhank. Aʼin ttenqʼanq rehebʼ chi xnawbʼal kʼaru tento teʼxbʼaanu naq tchalq jun nimla chʼaʼajkilal saʼ xbʼeenebʼ ut chanru teʼxqʼax ru. Joʼkan ajwiʼ teʼxtzol roxloqʼoninkilebʼ ribʼ. Chixjunil aʼin ttenqʼanq rehebʼ naq teʼnimanq.
LI NAQABʼAANU JOʼ AJ TESTIIW RE LI JEHOBʼA
Ebʼ li chʼutam ut li tzolok chirix li Santil Hu li nekeʼxkʼe ebʼ laj testiiw re li Jehobʼa naxtenqʼahebʼ li qas qiitzʼin re naq t-usaaq li xyuʼamebʼ, abʼan moko kaʼaj tawiʼ aʼin, nekeʼxtzol ajwiʼ roxloqʼinkilebʼ ribʼ.
WANK QACHʼUTAM RAJLAL XAMAAN
Saʼebʼ li qachʼutam naqabʼi ebʼ li seeraqʼ li isinbʼil chaq saʼ li Santil Hu. Ut nekeʼxkʼut ajwiʼ chiqu chanru tqoxloqʼi qibʼ chiqajunqal. Moko tojbʼil ta li ok saʼ li chʼutam, ut naru nekeʼwulak chixjunilebʼ li nekeʼraj. Jun eetalil, aran taatzol. . .
-
. . . kʼaʼut oxloqʼat chiru li Yos.
-
. . . chanru taataw xyaalal laayuʼam.
-
. . . chanru taataw li tzʼaqal amiiw.
Taataw ajwiʼ li tzʼaqal amiiw, ebʼ li qas qiitzʼin li nekeʼxkʼe xchʼool chiribʼilebʼ ribʼ (1 Corintios 12:25, 26).
Re xnawbʼal xkomon li naʼlebʼ chirix li qachʼutam, sikʼ www.pr418.com/kek ut taawil li bʼideo Kʼaru nabʼaanumank saʼebʼ li Chʼutlebʼaal Kabʼl rehebʼ laj Testiiw?
NAQATZOLEBʼ LI QAS QIITZʼIN CHIRIX LI SANTIL HU
Chi sibʼil naqayeechiʼi xtzolbʼalebʼ li qas qiitzʼin chirix li Santil Hu ut re xbʼaanunkil aʼin naqoksi li hu Sahaq laachʼool. Saʼ li hu aʼin wank ebʼ li patzʼom li tatxkʼe chi kʼoxlak ut xtawbʼal ru ebʼ li xraqal li Santil Hu li naxsume li patzʼom. Wank ajwiʼ ebʼ li bʼideo li trekʼasi laachʼool, ebʼ li jalam u li kʼajoʼ xchʼinaʼusal ut moko chʼaʼaj ta naxchʼolobʼ. Li tzolok aʼin naxtenqʼahebʼ li qas qiitzʼin re naq teʼxkʼe reetal naq oxloqʼebʼ ru ut naxbʼaanu ajwiʼ naq t-usaaq li xyuʼamebʼ.
Wi nakaawaj xnawbʼal chanru tatxtenqʼa xtzolbʼal li Santil Hu rikʼinebʼ laj testiiw re li Jehobʼa, sikʼ www.pr418.com/kek ut taawil li bʼideo Kʼaʼut us naq tattzoloq chirix li Santil Hu?
Maare twulaq ajwiʼ chaawu
CHIQIX
Patzʼ naq tateʼrulaʼani
Aatinan chirix junaq li naʼlebʼ saʼ li Santil Hu malaj tzol xkomon aanaʼlebʼ chirix ebʼ laj Testiiw.
CHIQIX
Chatwulaq saʼebʼ li chʼutam
Tzol chirix li qachʼutam. Sikʼ bʼar nekeʼchʼutlaak ebʼ laj Testiiw saʼ laateep.
