Naru nakaakanabʼ mayibʼk

ANAQWAN xwulak li hoonal naq «kawaq aachʼool ut chayal aaqʼe chi kʼanjelak» (1 Crónicas 28:10, SBG). Kʼaru chik naru taabʼaanu re naq taaqʼax ru li mayibʼk?

Xaqabʼ xkutankil. Li molam li naril li kawilal ut li naxkolebʼ li kristiʼaan aran Estados Unidos naxye naq, us raj naq li kristiʼaan li tixye naq inkʼaʼ chik naraj mayibʼk, tixxaqabʼ xkutankil re xbʼaanunkil. Chi joʼkan, li traj xbʼaanunkil junelik wanq saʼ xchʼool. Juchʼ li xkutankil saʼ li almanaak, yehebʼ re laawamiiw ut aʼ yaal kʼaru tkʼulmanq maajal li xaaye.

Yiibʼ junaq laahu. Chi saʼ tzʼiibʼa ebʼ li naʼlebʼ li nakaakʼoxla naq truuq aatenqʼankil, ut tzʼiibʼa ebʼ li naʼlebʼ aʼin.

● Kʼaʼut nakaawaj xkanabʼankil li mayibʼk

● Li xnumbʼril li xselular junaq li kristiʼaan li taabʼoq naq taawekʼa naq twaj wiʼ chik mayibʼk

● Ebʼ li naʼlebʼ li truuq aatenqʼankil re xtawbʼal li twaj (maare li xraqal li Santil Hu joʼ Gálatas 5:22, 23)

Yalaq bʼar tatxik kʼam laahu, ut yaabʼasi naabʼal sut chiru li kutan. Usta ak xaakanabʼ li mayibʼk, yaabʼasi rajlal naq taarahi wiʼ chik ru li may.

Kawresi aawibʼ re xkanabʼankil li mayibʼk. Kanabʼ xbʼaanunkil li naʼlebʼ li nakaabʼaanu naq nakatmayibʼk. Jun eetalil, wi kʼaynaqat xlechbʼal laamay naq nakaatsaqewk, oybʼenink jun hooraq re xbʼaanunkil. Wi nakatmayibʼk naq yookat malaj naq xatraqeʼk chi waʼak, kanabʼ xbʼaanunkil. Matxik saʼebʼ li naʼaj bʼarwiʼ nekeʼmayibʼk. Tzol aawibʼ aajunes xyeebʼal chi kaw: «Inkʼaʼ bʼanyox, inkʼaʼ chik ninmayibʼk». Joʼkan ajwiʼ, xkawresinkil li kutan naq taakanabʼ mayibʼk, tatxtenqʼa chi xjultikankil naq chi seebʼ moko laaʼat ta chik aj mayinel.

Jalan chik li naʼlebʼ li jwal wank xwankil. Naq wulak re li kutan loqʼ li kʼaʼaq re ru li tatruuq xkʼuxbʼal joʼ: li zanahoria, li toqʼ, li mania ut wank jalan chik xkomon. Ye rehebʼ re laawamiiw ut ebʼ laakomon li kutan li xaasikʼ re naq taakanabʼ mayibʼk ut kʼaru teʼruuq xbʼaanunkil re aatenqʼankil. Naq wulak re li kutan, kut chi najt li may li wank saʼ laawochoch, li wank saʼ laabʼelebʼaal chʼiichʼ, li wank saʼ xbʼooxil laatʼikr, li wank saʼ li naʼaj bʼarwiʼ nakatkʼanjelak, joʼkan ajwiʼ li xnaʼaj li xchahil li may, li nakʼanjelak re xlechbʼal li may ut yalaq kʼaru li tixbʼaanu naq taarahi ru li mayibʼk. Li xyaalalil aʼan naq chʼaʼaj bʼayaq xik chi xloqʼbʼal malaj xpatzʼbʼal re junaq laawamiiw chiru risinkil saʼ laakaax. Joʼkan ajwiʼ maakanabʼ xpatzʼbʼal re li Yos naq tatxtenqʼa, qʼaxal chik taabʼaanu aʼin naq ak xaachoy li may ut maajun chik li may taachʼeʼ (Lucas 11:13).

Naabʼalebʼ li kristiʼaan xeʼxtzʼeqtaana li xeʼxkʼoxla naq ramiiw, abʼan xeʼxkʼe reetal naq aj bʼalaqʼ ut narahobʼtesink: aʼ li may. Laaʼat ajwiʼ tatruuq xkolbʼal aawibʼ chiru li may ut taawekʼa naq laaʼat chik nakattaqlank saʼ laayuʼam ut sa chik trekʼa ribʼ laajunxaqalil.

[Jalam u]

Yalaq bʼar tatxik kʼam laahu ut yaabʼasi naabʼal sut chiru li kutan