MA RELIK CHI YAAL TATRUUQ XBʼERESINKIL LAAYUʼAM? Wankebʼ nekeʼxye naq xaqabʼanbʼil chik li tqakʼul, junchʼol chik nekeʼxye naq li Yos yaal re li tqakʼul. Joʼkan naq, wi inkʼaʼ nekeʼruuk xbʼaanunkil li nekeʼraj, yal nekeʼxkanabʼ ut nekeʼxye: «Ak xaqabʼanbʼil chaq».

Wankebʼ nekeʼchʼinaak xchʼool naq nekeʼxkʼe reetal naq inkʼaʼ nekeʼruuk xtuqubʼankil ru li chʼaʼajkilal li wank saʼ ruuchichʼochʼ. Wankebʼ nekeʼxyal xchaabʼilobʼresinkil li xyuʼamebʼ, abʼan nekeʼchʼinaak xchʼool naq inkʼaʼ nekeʼruuk xbʼaan li yalok u, li raaxiikʼ, li yajel malaj jalan chik li naʼlebʼ. Ut saʼ xkʼabʼaʼ aʼan nekeʼxye naq maakʼaʼ aj e naq nekeʼxyal xqʼe.

Wank sut li nakʼulmank saʼ li qasutam naxjal li naqaj xbʼaanunkil (Eclesiastés 9:11). Abʼan chiqajunilo tooruuq xsikʼbʼal li junelik yuʼam. Li Santil Hu naxye naq saʼ quqʼ wank xsikʼbʼal li kʼaru tqabʼaanu. Abʼan kʼaʼut naqaye aʼin?

Naq ebʼ laj Israel okebʼ raj re saʼ li naʼajej yeechiʼinbʼil chaq rehebʼ, li Yos kixye re laj Moisés: «Xinyeechiʼi aawe yuʼam ut kamk, osobʼtesiik ut majewaak. Sikʼ ru li yuʼam re naq yoʼyooqat laaʼat joʼwiʼ ebʼ laawalal aakʼajol. Chara li Qaawaʼ laaYos, chawabʼi li xyaabʼ xkux ut chapchooqat rikʼin» (Deuteronomio 30:15, 19, 20).

«Xinyeechiʼi aawe yuʼam ut kamk, osobʼtesiik ut majewaak. Sikʼ ru li yuʼam» (Deuteronomio 30:19).

Joʼkan, li Yos kirisihebʼ chaq Ejiipt ebʼ laj Israel ut kixkanabʼebʼ chi xsikʼbʼal li kʼaru teʼxbʼaanu ut naq sahaqebʼ saʼ xchʼool rikʼin li chʼochʼ li yeechiʼinbʼil chaq rehebʼ. Abʼan moko yal ta chi joʼkan teʼxtaw ebʼ li osobʼtesihom aʼan. Tento raj teʼxbʼaanu jun li naʼlebʼ: «xsikʼbʼal li yuʼam». Chanru? Rikʼin xraabʼal li Yos, rabʼinkil li raatin ut jilok chixkʼatq.

Laaʼat ajwiʼ, tento taasikʼ kʼaru xbʼaanunkil saʼ laayuʼam. Wi taasikʼ xraabʼal li Yos, rabʼinkil li raatin ut jilok chixkʼatq, yookat xsikʼbʼal li yuʼam chi junelik. Abʼan kʼaru naʼajmank re xbʼaanunkil aʼin?

Li apóstol Juan kixtzʼiibʼa naq «li Yos aʼan rahok» ut aʼan tzʼaqal li xnimal ru naʼlebʼ li Jehobʼa (1 Juan 4:8). Xbʼaan naq li Jesús ak naxnaw aʼin, naq keʼxpatzʼ re bʼar wank li xnimal ru chaqʼrabʼ, aʼan kixsume: «Taara li Qaawaʼ laaYos chi anchal laachʼool, chi anchal laawaanm ut chi anchal laakʼaʼuxl» (Mateo 22:37). Joʼkan naq li qamiiwil rikʼin li Jehobʼa nachalk saʼ xkʼabʼaʼ naq naqara maawaʼ yal saʼ xkʼabʼaʼ naq naqaxuwa ru malaj naq inkʼaʼ naqanaw kʼaʼut naq nokooʼabʼink chiru. Abʼan, kʼaʼut tento tqara li Yos?

Li rahom li narekʼa li Jehobʼa chirixebʼ li kristiʼaan chanchan li nekeʼrekʼa ebʼ li naʼbʼej yuwaʼbʼej chirixebʼ li ralal xkʼajol. Usta ebʼ aj maak, ebʼ li naʼbʼej yuwaʼbʼej nekeʼxyal xqʼe chi xtzolbʼalebʼ, xtijbʼalebʼ ut xqʼusbʼalebʼ li ralal xkʼajol re naq sahaqebʼ saʼ xchʼool ut re naq us teʼelq. Ut kʼaru nekeʼroybʼeni ebʼ li naʼbʼej yuwaʼbʼej? Naq teʼraheʼq xbʼaanebʼ li ralal xkʼajol, naq teʼabʼinq ut naq teʼxtaw ru naq li kʼaru nekeʼxye, aʼan us choʼq rehebʼ. Ma inkʼaʼ tabʼiʼ xkʼulubʼ li qachoxahil Yuwaʼ naq tqara ut naq tqabʼanyoxi chixjunil li naxkʼe qe?

Saʼ li aatinobʼaal li kitzʼiibʼamank chaq li Santil Hu, wank sut li aatin abʼink naraj xyeebʼal «xpaabʼankil». Ut ma inkʼaʼ tabʼiʼ aʼan naroybʼeni chaq li yuwaʼbʼej naq naxye rehebʼ li ralal xkʼajol «chinawabʼi»? Joʼkan naq, rabʼinkil xyaabʼ xkux li Yos naraj xyeebʼal xnawbʼal li naxpatzʼ qe li Yos ut xbʼaanunkil. Saʼebʼ li qakutan li Yos inkʼaʼ naxkʼut ribʼ chiqu naq naʼaatinak qikʼin, re rabʼinkil tento naq tqil xsaʼ li Santil Hu ut tqayuʼami li naxye (1 Juan 5:3).

Re xkʼutbʼesinkil naq wank xwankil rabʼinkil li Yos, saʼ jun kutan li Jesús kixye: «Moko kaʼaj ta wiʼ rikʼin wa yoʼyooq li winq, rikʼin aj bʼan wiʼ chixjunil li aatin naʼelk chi xtzʼuumal re li Yos» (Mateo 4:4). Wank xwankil li waʼak, abʼan li qʼaxal wank wiʼ chik xwankil aʼan xxokbʼal saʼ qachʼool li xnaʼlebʼ li Yos. Kʼaʼut? Li awabʼej Salomón kixye: «Li chaabʼil naʼlebʼ natenqʼank qe; joʼkan ajwiʼ li tumin. Abʼanan najtaq roq li qayuʼam wi wank qachoxahil naʼlebʼ» (Eclesiastés 7:12). Li xchoxahil naʼlebʼ li Jehobʼa naru nokooxkol anaqwan ut tooxtenqʼa chi xtawbʼal li bʼe li nokooxkʼam saʼ li junelik yuʼam.

Saʼ li tzolom rubʼelaj xqil wiibʼ oxibʼ li raatin li Jesús naq kixye: «Qʼaxal laatzʼ ru li okebʼaal ut kachʼin ru li bʼe nakʼamok saʼ li yuʼamej, ut inkʼaʼ kʼihebʼ li nekeʼtawok re» (Mateo 7:13, 14). Re naq toowanq saʼ li bʼe aʼan, qʼaxal us raj naq wank junaq laj kʼamol qabʼe li tooxtenqʼa chi xtawbʼal li junelik yuʼam. Joʼkan naq aajel ru naq toojiloq chixkʼatq li Yos (Salmo 16:8). Abʼan chanru tqabʼaanu?

Rajlal kutan laatzʼ qu ut toj wank chik xkomon li naqaj xbʼaanunkil. Jwal laatzʼ qu chi xbʼaanunkil li qakʼanjel, joʼkan naq maakʼaʼ chik qahoonal chi xbʼaanunkil li naraj li Yos. Joʼkan naq wank peʼ xyaalal naq li Santil Hu naxye aʼin: «Kʼehomaq reetal chi us chanru leeyuʼam: inkʼaʼ joʼkaqex li maakʼaʼebʼ xnaʼlebʼ, joʼkaqex bʼan li wankebʼ xnaʼlebʼ. Meekolebʼ li kutan aʼin xbʼaan naq moko usebʼ ta li yookohatq chi rilbʼal» (Efesios 5:15, 16). Jilok chixkʼatq li Yos naraj xyeebʼal naq li qamiiwil rikʼin tqakʼe xbʼeenwa saʼ li qayuʼam (Mateo 6:33).

Usta maakʼaʼ tatruuq xbʼaanunkil re xjalbʼal li xaakʼul chaq, abʼan wank kʼaru tatruuq xbʼaanunkil re naq laaʼat ut laajunkabʼal chaabʼil texʼelq saʼ leeyuʼam. Li Santil Hu naxye naq li qachoxahil Yuwaʼ qʼaxal nokooxra ut naxye qe li tqabʼaanu. Kʼe reetal li kixye li propeet Miqueas:

«At winq, at ixq, ak yeebʼil aawe li kʼaru us xbʼaanunkil, aʼ li nawulak chiru li Qaawaʼ naq taabʼaanu: kaʼajwiʼ xbʼaanunkil li tiikilal, xkʼeebʼal aachʼool chi rahok ut taakubʼsi laawankil chiru laaYos» (Miqueas 6:8).

Ut laaʼat? Ma taakʼulubʼa wank choʼq ramiiw li Yos? Wi joʼkan, taakʼul li osobʼtesihom li ak xkʼubʼ choʼq rehebʼ li ramiiw. Laaʼat yaal aawe li taasikʼ xbʼaanunkil.