KʼAJOʼ XCHʼINAʼUSAL LI YEECHIʼOM AʼIN! Laj Yobʼtesinel naraj naq laaʼat tatwanq arin chi junelik saʼ Ruuchichʼochʼ. Abʼan naabʼalebʼ nekeʼchʼaʼajkoʼk chiru xpaabʼankil aʼin. Nekeʼxye naq twulaq xqʼehil naq tookamq, ak re naq tkʼulmanq aʼin. Jalanebʼ chik nekeʼxkʼoxla naq xbʼeenwa teʼkamq ut teʼxik saʼ choxa re naq teʼwanq chi junelik. Ut laaʼat, kʼaru nakaakʼoxla?

Maasume wank. Xbʼeenwa tzʼil rix li naxye li Santil Hu chirix ebʼ li patzʼom aʼin: Jarubʼ chihabʼ toowanq chi yoʼyo saʼ xkʼabʼaʼ chanru yobʼtesinbʼilo? Kʼaru aj e naq li Yos kixyobʼtesi li Ruuchichʼochʼ ut ebʼ li kristiʼaan? Kʼaʼut naq nokookamk?

Naq naqajuntaqʼeeta li qayuʼam rikʼinebʼ li junchʼol chik chi yobʼtesihom, naqakʼe reetal naq maaʼani chik yobʼtesinbʼil joʼ laaʼo. Kʼaru najalanink qe? Li Santil Hu naxye naq kaʼajwiʼ laaʼo yobʼtesinbʼilo joʼ xjalam u li Yos (Génesis 1:26, 27). Kʼaru naraj xyeebʼal aʼin? Naq li Yos xooxyobʼtesi rikʼin li xchaabʼil naʼlebʼ, joʼ li rahok ut li tiikilal.

Joʼkan ajwiʼ, xooxyobʼtesi re naq tqanaw kʼaru li us ut li inkʼaʼ us ut re naq tqanaw ru ut toowanq choʼq ramiiw. Joʼkan naq, nokooruuk rilbʼal li xchʼinaʼusil li yobʼtesihom, ebʼ li kʼaʼaq re ru li nekeʼxyiibʼ li winq, li wajbʼak ut ebʼ li uutzʼuʼujinbʼil aatin. Abʼanan, li najalanink qe aʼan naq naqaloqʼoni ru li Yos. Chixjunil ebʼ li chaabʼil naʼlebʼ aʼin naxbʼaanu naq ebʼ li kristiʼaan jalanaqebʼ chiruhebʼ li junchʼol chik chi yobʼtesihom.

Kʼoxla rix aʼin: wi li Yos kiraj naq ebʼ li kristiʼaan kaʼajwiʼ teʼwanq chiru jarubʼaq chihabʼ, kʼaʼut naq kixyobʼtesihebʼ rikʼin li chaabʼil naʼlebʼ aʼin ut kixkʼe xseebʼalebʼ xchʼool re xbʼaanunkil? Xbʼaan naq naraj naq teʼwanq chi junelik arin saʼ Ruuchichʼochʼ.

Wankebʼ nekeʼxye naq li Yos moko kiraj ta naq ebʼ li kristiʼaan teʼwanq chi junelik arin saʼ Ruuchichʼochʼ. Nekeʼxye naq li qawanjik arin saʼ Ruuchichʼochʼ nakʼanjelak re xkʼutbʼal ma qakʼulubʼ naq tooxik saʼ choxa rikʼin li Yos. Abʼan wi yaal raj aʼin, aʼ li Yos wank raj re naq wank li maaʼusilal arin saʼ Ruuchichʼochʼ. Ut aʼin moko naxchap ta ribʼ rikʼin li xchaabʼil naʼlebʼ li Yos, xbʼaan naq li Santil Hu naxye chirix: «Chixjunil li xkʼuubʼahom aʼan tiikilal.  Aʼan jun Yos tiik xchʼool, li inkʼaʼ nabʼalaqʼik; aʼan paabʼajel ut jwal chaabʼil» (Deuteronomio 32:4).

Li Santil Hu chi chʼolchʼo ru naxye kʼaru aj e naq li Yos kixyobʼtesi li Ruuchichʼochʼ: «Kaʼajwiʼ li Qaawaʼ laj eechal re li choxa, abʼan li ruuchichʼochʼ qʼaxtesinbʼil saʼ ruqʼ li winq!» (Salmo 115:16). Joʼkan tzʼaqal, li Yos kixyobʼtesi li Ruuchichʼochʼ re naq twanq chi junelik ut kixyiibʼ rikʼin chixjunil li naʼajmank re naq tqayal xsahil li yuʼam (Génesis 2:8, 9).

«Kaʼajwiʼ li Qaawaʼ laj eechal re li choxa, abʼan li ruuchichʼochʼ qʼaxtesinbʼil saʼ ruqʼ li winq!» (Salmo 115:16).

Li Santil Hu naxye ajwiʼ kʼaʼut naq li Yos kixyobʼtesi ebʼ li kristiʼaan. Kixye re li xbʼeen winq ut ixq: «Chenujobʼresi li ruuchichʼochʼ ut chereechanihaq. Chextaqlanq saʼ xbʼeenebʼ [...] chixjunil li xul li nekeʼxjukuki ribʼ chiru chʼochʼ» (Génesis 1:28). Kikʼemank rehebʼ jun chaabʼil kʼanjel: rilbʼal ut xnujobʼresinkil li Ruuchichʼochʼ! Li Yos kiraj naq laj Adán ut li xʼEva teʼwanq ralal xkʼajol arin saʼ Ruuchichʼochʼ, maawaʼ saʼ choxa.

Li Santil Hu naxye naq jun li ánjel li kixyobʼtesi li Yos, aʼ laj Tza, kixqʼet ribʼ ut kiraj xjalbʼal li rajom li Yos chalen chaq saʼ xtiklajik. Chanru kixbʼaanu?

Laj Tza kixqʼunbʼesi laj Adán ut li xʼEva re naq teʼxqʼet ribʼ chiru li Yos. Kixye rehebʼ naq li Yos yook xmaqʼbʼal chiruhebʼ naq teʼxnaw kʼaru li us ut li inkʼaʼ us. Ebʼ aʼan keʼabʼink chiru laj Tza ut keʼxtzʼeqtaana li Yos. Kʼaru kikʼulmank? Saʼ xnumikebʼ li chihabʼ, keʼkamk joʼ kixye chaq li Yos saʼ xtiklajik. Keʼxtzʼeq li maatan re wank chi junelik arin saʼ Ruuchichʼochʼ (Génesis 2:17; 3:1-6; 5:5).

Toj saʼebʼ li qakutan ebʼ li kristiʼaan nekeʼxkʼul li rahilal saʼ xkʼabʼaʼ li qʼetok ibʼ li keʼxbʼaanu laj Adán ut li xʼEva. Li Santil Hu naxye: «Relik chi yaal naq xbʼaan jun chi winq [aʼ laj Adán] kiʼok chaq li maak saʼ ruuchichʼochʼ, ut xbʼaan li maak kichalk li kamk. Joʼkan naq li kamk kichalk saʼ xbʼeenebʼ chixjunil li poyanam xbʼaan naq chixjunilebʼ keʼmaakobʼk» (Romanos 5:12). Joʼkan bʼiʼ, nokookamk saʼ xkʼabʼaʼ li maak ut li kamk li xqechani rikʼin laj Adán ut li xʼEva, maawaʼ saʼ xkʼabʼaʼ naq yibʼru xnaʼlebʼ li Yos.

Li qʼetok ibʼ li kiwank chaq saʼ li naʼajej Edén, moko kixjal ta li kiraj li Yos choʼq re li Ruuchichʼochʼ ut ebʼ li qas qiitzʼin. Saʼ xkʼabʼaʼ naq tzʼaqal re ru li xrahom ut li xtiikilal, kixsikʼ jun li naʼlebʼ re naq toorisi rubʼel xwankil li maak ut li kamk. Li apóstol Pablo kixye: «Li xtojbʼal li maak aʼan li kamk; abʼan li maatan li nachalk rikʼin li Yos aʼan li junelik yuʼam saʼ xkʼabʼaʼ li Kristo Jesus, li Qaawaʼ» (Romanos 6:23). Saʼ xkʼabʼaʼ li xrahom, li Yos «kixkʼe chaq li Ralal li jun ajwiʼ chiru [li Jesukriist] re naq li wanq xpaabʼal chirix inkʼaʼ tsachq, wanq bʼan xyuʼam chi junelik» (Juan 3:16, TNM). Li Jesús chi anchal xchʼool kixtoj li naʼajmank re naq tooruuq xtawbʼal wiʼ chik chixjunil li kixtzʼeq laj Adán. a

Chi seebʼ tchʼinaʼusoʼq li Ruuchichʼochʼ. Wi taawaj xyalbʼal xsahil li yeechiʼom aʼin, bʼaanu li kixye li Jesús: «Okanqex saʼ li okebʼaal kachʼin ru xbʼaan naq nim ru li okebʼaal ut nim ru li bʼe nakʼamok saʼ li kamk chi junelik, ut naabʼalebʼ li nekeʼok aran. Abʼan qʼaxal laatzʼ ru li okebʼaal ut kachʼin ru li bʼe nakʼamok saʼ li yuʼamej, ut inkʼaʼ kʼihebʼ li nekeʼtawok re» (Mateo 7:13, 14). Joʼkan bʼiʼ, saʼ aawuqʼ wank xsikʼbʼal li taabʼaanu saʼ laayuʼam saʼebʼ li kutan chalk re. Kʼaru taabʼaanu?