Anaqwan ak xqatzʼil rix junjunq li naʼlebʼ li nokooxtenqʼa chi xnawbʼal ru chiʼus ani li Yos. Xqatzol naq li Santil Hu naxkʼut naq li xkʼabʼaʼ aʼan Jehobʼa ut naq li rahok aʼan li xnaʼlebʼ li jwal qʼaxal ru. Xqatzʼil ajwiʼ rix li ak kixbʼaanu chaq ut li tixbʼaanu chirixebʼ li qas qiitzʼin. Abʼanan, toj wank naʼajmank xnawbʼal chirix li Yos, abʼan maare taakʼoxla ma aajel tawiʼ ru xbʼaanunkil aʼin.

Li Jehobʼa naxye aawe naq, wi taasikʼ, «aʼan tixkʼut ribʼ chawu» (1 Cronicas 28:9). Wi nakaakʼe aachʼool chi xnawbʼal ru, taakʼul jun xnimal ru osobʼtesihom: tatwanq tzʼaqal choʼq ramiiw (Salmo 25:14). Chanru tatruuq xtawbʼal rusilal aʼin?

Sahaq tzʼaqal saʼ laachʼool. Li Santil Hu naxye naq li Yos «sa saʼ xchʼool» (1 Timoteo 1:11, TNM). Wi tatjiloq chixkʼatq li Yos ut taayal xkʼambʼal aawe rikʼin, sahaq tzʼaqal saʼ laachʼool, ut aʼin tatxtenqʼa saʼ laajunxaqalil, laakʼaʼuxl ut laachʼool (Salmo 33:12). Joʼkan ajwiʼ, inkʼaʼ taakʼe aawibʼ saʼ chʼaʼajkilal, taatzol li chaabʼil naʼlebʼ ut taakʼam aawibʼ saʼ usilal rikʼinebʼ li junchʼol. Chʼolchʼo naq taakʼoxla ajwiʼ li kixye laj Salmiist: «Wank chi xkʼatq li Yos aʼan li us choʼq we» (Salmo 73:28).

Li Yos tatril. Li Jehobʼa naxye rehebʼ li ramiiw: «Junelik yooqin chawilbʼal naq tatinbʼeres» (Salmo 32:8). Aʼin naraj xyeebʼal naq li Jehobʼa naril chixjunqalebʼ li nekeʼkʼanjelak chiru ut naxkʼe tzʼaqal rehebʼ li naʼajmank (Salmo 139:1, 2). Naq tkawuuq laaʼamiiwil rikʼin li Jehobʼa, taakʼe reetal naq junelik tatxtenqʼa.

Chaabʼilaq laayuʼam saʼ li kutan chalkebʼ re. Moko kaʼaj tawiʼ tatxtenqʼa re naq sahaq saʼ laachʼool anaqwan, li Jehobʼa naxye ajwiʼ aawe naq chaabʼilaq laayuʼam saʼ li kutan chaalel (Isaias 48:17, 18). Li Santil Hu naxye: «Aʼan aʼin li junelik yuʼam: naq teʼxnaw aawu laaʼat li junat chi tzʼaqal Yos ut li xataqla chaq, li Jesus aʼ li Kriist» (Juan 17:3). Li qoybʼenihom li naxyeechiʼi li Yos chanchan jun li ankla «kaw ribʼ ut inkʼaʼ naʼeekʼank saʼ xnaʼaj» li nokooxtenqʼa re naq kaw xaqxoqo saʼ li qapaabʼal saʼebʼ li kutan aʼin (Hebreos 6:19).

Aʼin yal junjunq rehebʼ li rusilal li naxkʼam chaq xnawbʼal ru chiʼus li Yos ut wank choʼq ramiiw. Wi taawaj xnawbʼal xkomon, naru tat-aatinaq rikʼin jun laj Testiiw re li Jehobʼa malaj taawil li qanaʼaj saʼ Internet jw.org/kek.