USTA xqechani li maak ut li kamk xbʼaan naq laj Adan ut li xʼEva keʼxqʼet ribʼ, abʼan li rajom li Yos choʼq rehebʼ li poyanam inkʼaʼ kijalaak. Li Raatin li Yos, li Santil Hu, naabʼal sut naxkʼut naq inkʼaʼ kijalaak li rajom li Yos.

• «Li tiikebʼ xchʼool teʼwanq saʼ li chʼochʼ aʼin, ut teʼkanaaq arin chi junelik» (Proverbios 2:21).

• «Tixsach chi junajwa xwankil li kamk. Li Qaawaʼ tixmes li xyaʼal ruhebʼ chixjunil li poyanam» (Isaias 25:8).

• «Li taajukʼeeq xwankil saʼ rosoʼjik, aʼan li kamk» (1 Corintios 15:26).

• «Inkʼaʼ chik taawanq kamk, chi moko yaabʼak, chi moko japok e malaj rahilal» (Apocalipsis 21:4).

Kʼaru tixbʼaanu li Yos re xsachbʼal chi junajwa li kamk? Joʼ ak xqil, li Santil Hu naxye chi chʼolchʼo ru naq «li tiikebʼ xchʼool teʼwanq [...] chi junelik» saʼ li Ruuchichʼochʼ. Abʼanan, naxye ajwiʼ naq «moko wank ta junaq tiik xchʼool saʼ ruuchichʼochʼ li tixbʼaanu li us chi junelik, chi inkʼaʼ ta taamaakobʼq» (Eclesiastes 7:20). Ma naraj xyeebʼal aʼin naq li Yos tixkubʼsi xwankil li xchaqʼrabʼ re naq tooruuq chi wank chi junelik? Li Yos maajunwa tixbʼaanu aʼin xbʼaan naq «inkʼaʼ natikʼtiʼik» (Tito 1:2). Joʼkan naq, kʼaru tixbʼaanu re naq ttzʼaqloq ru li kiraj chaq choʼq rehebʼ li poyanam?

Li rahok kiʼekʼasink re li Jehobʼa chi xtojbʼal li naʼajmank re qakolbʼal chiru li kamk. Saʼ li Santil Hu, li tojok aʼan li nakʼemank re xtojbʼal rix li xsachmank malaj re xbʼaanunkil joʼ naxpatzʼ li chaqʼrabʼ. Li ttojmanq juntaqʼeetaq rikʼin li xsachmank. Saʼ xkʼabʼaʼ naq laaʼo aj maak ut tenebʼanbʼil li kamk saʼ qabʼeen, li Santil Hu naxye chi chʼolchʼo ru: «Maajun taaruhanq chi xkolbʼal ribʼ xjunes chi moko xqʼajkamunkil chiru li Yos li xkolbʼal li xyuʼam. Xbʼaan naq qʼaxal terto nakoleʼk wiʼ li qayuʼam ut maajun wa tzʼaqalaq li tumin» (Salmo 49:8, 9).

Naq junaq li poyanam nakamk, kaʼajwiʼ naru xtojbʼal rix li xmaak. Inkʼaʼ naru xkolbʼal ribʼ chi moko xtojbʼal rix li xmaak junaq chik li poyanam (Romanos 6:7). Naʼajmank naq junaq winq li tzʼaqal re ru xyuʼam ut maakʼaʼ xmaak tixqʼaxtesi li xyuʼam saʼ xkʼabʼaʼ li qamaak ut maawaʼ saʼ xkʼabʼaʼ li xmaak (Hebreos 10:1-4).

Aʼin tzʼaqal li kixbʼaanu li Yos. Kixtaqla chaq li Jesus, li Ralal li wank saʼ choxa, re naq twanq saʼ Ruuchichʼochʼ joʼ jun winq li tzʼaqal re ru xyuʼam (1 Pedro 2:22). Li Jesus kixye naq kichalk chi «xkʼeebʼal li xyuʼam re xkolbʼalebʼ rix chixjunilebʼ» (Marcos 10:45). Kikamk re xqʼaxbʼal ru li kamk ut re naq tooruuq xtawbʼal li yuʼam chi junelik (Juan 3:16).

Jwal yiibʼru li kutan li wanko wiʼ ut chʼaʼaj xnumsinkil, li naxkʼut naq wanko «saʼ rosoʼjikebʼ» li xmaaʼusilal li ruuchichʼochʼ aʼin, joʼ kixye chaq li Santil Hu (2 Timoteo 3:1). Li rosoʼjikebʼ li kutan traqeʼq saʼ «xkutankil li raqbʼa aatin naq teʼsacheʼq li inkʼaʼ nekeʼpaabʼank» (2 Pedro 3:3, 7). Abʼan li nekeʼrahok re li Yos teʼkoleʼq naq teʼsacheʼq li inkʼaʼ usebʼ xnaʼlebʼ ut teʼxtaw «li junelik yuʼam» (Mateo 25:46).

Joʼkan ajwiʼ, chi miyon ebʼ li qas qiitzʼin teʼruuq chi wank chi junelik naq teʼwaklesiiq wiʼ chik chi  yoʼyo. Li Jesus naru xwaklesinkilebʼ li kamenaq. Naq xkoho saʼ li tenamit Nain, kixwaklesi chi yoʼyo li xyum jun li malkaʼan xbʼaan naq kiril xtoqʼobʼaal ru (Lucas 7:11-15). Li Apostol Pablo kixye ajwiʼ: «Kaw linchʼool chi roybʼeninkil rikʼin li Yos naq teʼwakliiq wiʼ chik chi yoʼyo li tiikebʼ xchʼool ut ebʼ laj maak». Li yeechiʼom aʼin naxkʼut li xnimal xrahom li Yos chirixebʼ li poyanam (Hechos 24:15).

Chi mil miyon ebʼ li poyanam teʼruuq xtawbʼal li yuʼam chi junelik. Li Santil Hu naxye: «Li tiikebʼ xchʼool teʼwanq saʼ li chʼochʼ aʼin, ut teʼkanaaq arin chi junelik» (Proverbios 2:21). Tojaʼ naq, teʼruuq ajwiʼ xyeebʼal chi sa saʼ xchʼoolebʼ li kixye li Apostol Pablo wiibʼ mil chihabʼ tana anaqwan: «At kamk, bʼar wank laawankil? Bʼar wank laatiqʼlebʼ, at kamk?» (1 Corintios 15:55). Aran tsacheʼq ru li kamk, li jwal xikʼ naʼilok qe.