Li Yos kixye re laj Adan: «Li kutan teetzeka wiʼ chʼolchʼo naq texkamq» (Genesis 2:17). Maakʼaʼ raj aj e li naʼlebʼ aʼin wi laj Adan ttiixq ut tkamq raj. Laj Adan naxnaw naq inkʼaʼ tkamq wi inkʼaʼ tixlow ru li cheʼ.

Moko aajel ta ru naq laj Adan ut li xʼEva teʼxlow ru li cheʼ aʼin re naq teʼwanq xyuʼam xbʼaan naq wank naabʼal li cheʼ saʼ li chʼinaʼusil naʼajej (Genesis 2:9). Wi inkʼaʼ raj xeʼxlow ru li cheʼ, xeʼabʼink raj chiru li Yos, li xkʼehok rehebʼ li xyuʼam, ut xeʼxkʼutbʼesi raj naq chʼolchʼo chiruhebʼ naq aʼan wank xkʼulubʼ chi xyeebʼal rehebʼ li tento teʼxbʼaanu.

Re xtawbʼal ru kʼaʼut keʼkamk laj Adan ut li xʼEva, tento tqatzʼil rix jun li naʼlebʼ li nokooxkʼe saʼ chʼaʼajkilal toj saʼebʼ li qakutan. Laj Tza, jun li anjel li maaʼus xnaʼlebʼ, kiroksi jun li kʼantiʼ re xyeebʼal jun li yiibʼ aj tikʼtiʼ. Li Santil Hu naxye: «Li kʼantiʼ qʼaxal chik wank xnaʼlebʼ chiru chixjunilebʼ li xul kixyoobʼtesi li Qaawaʼ Yos. Ut aʼan kixye re li ixq: “Ma yaal naq li Yos xye eere naq inkʼaʼ naru teelow ruhebʼ li cheʼ li wankebʼ saʼ xnaʼaj li awimq?”» (Genesis 3:1).

Li xʼEva kixye: “Naru tqalow ruhebʼ li cheʼ li wankebʼ saʼ xnaʼaj li awimq. Kaʼajwiʼ li ru li cheʼ li wank saʼ xyi, kixye li Yos: «Meelow chi moko teechʼeʼ, xbʼaan naq wi teebʼaanu aʼan, texkamq»”. Tojaʼ naq li kʼantiʼ kixye re: «Inkʼaʼ. Moko texkamq ta. Naxnaw chi us li Yos naq saʼ li kutan teelow wiʼ li ru li cheʼ aʼan taatehonq xsaʼ leeru. Joʼkaqex chik li Yos; teenaw chik kʼaru li us ut li inkʼaʼ us». Rikʼin li aatin aʼin, laj Tza kixye naq li Jehobʼa aj tikʼtiʼ ut naq yook xrambʼal chiruhebʼ jun li chaabʼil naʼlebʼ (Genesis 3:2-5).

Li xʼEva kitʼaneʼk saʼ li raʼal. Kiril li cheʼ. Kikanaak chi rilbʼal li cheʼ. Qʼaxal kirataw... Kixyeʼ li ruqʼ, kixchʼoq li ru ut kixlow. Li Santil Hu naxye kʼaru chik kikʼulmank: «Kixkʼe re li xbʼeelom; ut aʼan ajwiʼ kixlow» (Genesis 3:6).

Kʼajoʼ tana kirahoʼk saʼ xchʼool li Yos rilbʼal naq ebʼ li ralal li raarokebʼ xbʼaan inkʼaʼ keʼabʼink chiru! Kʼaru kixbʼaanu? Li Jehobʼa kixye re laj Adan: «Rikʼin xtiqobʼ laapeekem tatwaʼaq, toj reetal tatsutqʼiiq saʼ li chʼochʼ xat-elk wiʼ chaq. Xbʼaan naq pojtzʼ okenaqat chaq ut pojtzʼ tatsutqʼiiq wiʼ chik» (Genesis 3:17-19). Joʼkan kikʼulmank, «lajeebʼ xwuqkaʼkʼaal rox oʼqʼobʼ (930) chihabʼ wank re laj Adán naq kikamk» (Genesis 5:5). Naq kikamk, laj Adan moko kixik ta saʼ choxa chi moko saʼ junaq chik li naʼajej. Naq li Jehobʼa toj maajiʼ naxyobʼtesi chaq rikʼin li pojtzʼ, maakʼaʼ chaq laj Adan ut,  naq kikamk, kisutqʼiik wiʼ chik chi pojtzʼil malaj kikamk. Ra rabʼinkil aʼin!

Saʼ xkʼabʼaʼ naq laj Adan ut li xʼEva inkʼaʼ keʼraj abʼink chiru li Yos, moko tzʼaqal ta chik re ru li xyuʼamebʼ ut inkʼaʼ chik keʼruuk chi wank chi junelik. Chalen chaq saʼ li hoonal aʼan keʼjalaak li xjunxaqalilebʼ: inkʼaʼ chik tzʼaqal re ru li xyuʼamebʼ ut ebʼ aj maak. Abʼanan, moko kaʼaj tawiʼ aʼanebʼ xeʼxkʼe ribʼ saʼ chʼaʼajkilal naq xeʼxqʼet ribʼ; chixjunilebʼ li ralal xkʼajol xeʼrechani li maak. Saʼ Romanos 5:12 naxye: «Xbʼaan jun chi winq kiʼok chaq li maak saʼ ruuchichʼochʼ, ut xbʼaan li maak kichalk li kamk. Joʼkan naq li kamk kichalk saʼ xbʼeenebʼ chixjunil li poyanam xbʼaan naq chixjunilebʼ keʼmaakobʼk».

Li Santil Hu naxye naq li kamk chanchan jun li tʼikr li naxlan chixjunilebʼ li qas qiitzʼin ut joʼ jun li kembʼil tʼikr li naxtzʼap chixjunilebʼ li tenamit (Isaias 25:7, TNM). Li tʼikr aʼin li naxlan chixjunilebʼ li qas qiitzʼin chanchan jun li sibʼ li nakamsink ut maajun naru xkolbʼal ribʼ chiru. Joʼkan bʼiʼ, «chixjunilebʼ nekeʼkamk saʼ xkʼabʼaʼ laj Adán» (1 Corintios 15:22). Anaqwan, naqabʼaanu ajwiʼ li patzʼom li kixye li Apostol Pablo: «Ani taakoloq we chiru li tzʼejwalej aʼin li nakʼamok we chi kamk?». Ma wank ani tkoloq qe chiru li kamk? (Romanos 7:24).