Tatruuq ajwiʼ xtawbʼal li sahil chʼoolejil anaqwan
KʼOXLA naq saʼ jun kutan maakʼaʼaq chik li yajel, li tiixilal ut li kamk. Tatruuq xtawbʼal li chaabʼil osobʼtesihom aʼin. Abʼanan, numtajenaq li chʼaʼajkilal saʼebʼ li qakutan. Chanru tatruuq xtawbʼal li sahil chʼoolejil anaqwan? Saʼ li Santil Hu wank li chaabʼil naʼlebʼ li truuq xkʼebʼal xsahil aachʼool ut xyaalalil laayuʼam. Qilaq chanru truuq qatenqʼankil li Raatin li Yos chi xnumsinkil junjunq li chʼaʼajkilal.
SAHAQ SAʼ QACHʼOOL RIKʼIN LI KʼARU WANK QE
Li naʼlebʼ li naxkʼe li Santil Hu: «Mexrahink li bʼihomal, kʼojkʼooq bʼan eechʼool rikʼin li kʼaru wank eere» (Hebreos 13:5).
Saʼebʼ li qakutan ebʼ laj kʼay nekeʼxyeechiʼi naabʼal li kʼaʼaq re ru chanchan tawiʼ naq aajel ru naq tqaloqʼ. Abʼan li Santil Hu naxye naq naru toowanq chi sa saʼ qachʼool rikʼin li kʼaru wank qe. Chanru tooruuq xbʼaanunkil?
Inkʼaʼ tqara li tumin. «Li xrahinkil ru li tumin» naxbʼaanu naq naabʼalebʼ li poyanam maakʼaʼ nekeʼraj re li xkawilal, li xjunkabʼal, li ramiiwebʼ, li chaabʼil naʼlebʼ ut li xloqʼalebʼ (1 Timoteo 6:10). Jwal terto nekeʼxtoj wiʼ aʼin! Joʼkan ajwiʼ, li ani naxra li bʼihomal maajunwa «nakʼojlaak xchʼool» (Eclesiastes 5:10).
Tqajultika naq ebʼ li poyanam wankebʼ xwankil chiru li kʼaʼaq re ru. Yaal naq wankebʼ li kʼaʼaq re ru li jwal nekeʼkʼanjelak, abʼan moko naru ta tooʼeʼxra joʼ tixbʼaanu raj junaq li poyanam. Jun tzʼaqal amiiw naxkʼe xsahil qachʼool (Proverbios 17:17).
WI NAQABʼAANU LI NAXYE LI SANTIL HU, SAHAQ SAʼ QACHʼOOL
NAQ NOKOOYAJERK
Li naʼlebʼ li naxkʼe li Santil Hu: «Li sahil chʼoolej aʼan chanchan li bʼan nakʼehok kawilal» (Proverbios 17:22).
Li sahil chʼoolejil chanchan jun li chaabʼil «bʼan» li tooxtenqʼa chi xkuybʼal junaq li yajel. Abʼan, chanru sahaq saʼ qachʼool usta yajaqo?
Toobʼanyoxinq. Wi junelik ra saʼ qachʼool xbʼaan naq yajo, «chixjunil li kutan inkʼaʼ us» chiqu (Proverbios 15:15). Abʼan li Santil Hu naxkʼe qe li naʼlebʼ aʼin: «Chexyoxinq» (Colosenses 3:15). Tento tqatzol xbʼanyoxinkil li naqakʼul saʼ li qayuʼam, usta kachʼin. Rilbʼal chanru naʼok li Saqʼe, rekʼankil li xkehil li iqʼ malaj rilbʼal chanru naseʼek junaq li qakomon truuq xsahobʼresinkil qachʼool.
Tqatenqʼahebʼ li junchʼol. «Qʼaxal nim li sahil chʼoolejil wank saʼ li kʼehok chiru li wank saʼ li kʼuluk», ut yaal ajwiʼ aʼin usta yajaqo (Hechos 20:35). Naq ebʼ li junchʼol nekeʼxbʼanyoxi li xqabʼaanu chirixebʼ, qʼaxal nasahoʼk saʼ qachʼool ut inkʼaʼ chik jwal naqajultika li qachʼaʼajkilal. Xtenqʼankil ebʼ li junchʼol tixbʼaanu naq sa tqekʼa qibʼ.
XKAWRESINKIL LI SUMLAJIK
Li naʼlebʼ li naxkʼe li Santil Hu: Sikʼomaq «li qʼaxal chaabʼil» malaj li jwal wank xwankil (Filipenses 1:10).
Li sumsukebʼ naru nekeʼxnajtobʼresi ribʼ wi inkʼaʼ nekeʼxkʼe xhoonal chiribʼilebʼ ribʼ. Joʼkan naq jwal us naq li bʼeelomej ut li ixaqilbʼej teʼxkʼe xbʼeenwa li xsumlajikebʼ, teʼril joʼ jun rehebʼ li naʼlebʼ li jwal wank xwankil saʼ li xyuʼamebʼ.
Bʼaanuhomaq junaq li naʼlebʼ saʼ wiibʼal. Li Santil Hu naxye naq «qʼaxal us naq teʼkʼanjelaq wiibʼ poyanam chiru naq taakʼanjelaq junaq xjunes» (Eclesiastes 4:9). Inkʼaʼ raj taabʼaanu li kaʼajwiʼ nawulak chaawu, kʼoxla bʼan li texruuq xbʼaanunkil saʼ wiibʼal. Maare naru texkʼubʼanq, texxik chi bʼeek, teechunubʼ eeribʼ chi rukʼbʼal eekape malaj teerajsi eeru rikʼin jalan chik li naʼlebʼ.
Teekʼutbʼesi naq nekeera eeribʼ. Li Santil Hu naxye naq li bʼeelomej ut li ixaqilbʼej tento teʼxra ut teʼroxloqʼi ribʼebʼ (Efesios 5:28, 33). Wi texseʼeq, teeqʼalu eeribʼ malaj teekʼe junaq leechʼina maatan chiribʼil eeribʼ, aʼin naru tixkawresi leesumlajik. Ut jultikaq aawe naq kaʼajwiʼ rikʼin laasumʼaatin tatyoklaaq (Hebreos 13:4).
Maare twulaq ajwiʼ chaawu
LAAJUNKABʼAL NARU NAXTAW LI SAHIL CHʼOOLEJIL
Teesikʼ li Yos re naq sahaq leechʼool
Wiibʼ li patzʼom li ttenqʼanq rehebʼ li sumsukebʼ re naq sahaqebʼ saʼ xchʼool.
