Li xkʼabʼaʼ. Li Yos ajwiʼ naxye: «Laaʼin li nimajwal Yos li nakolok eere, Jehová inkʼabʼaʼ» (Exodo 6:8, Exodo en Kʼekchiʼ, Sociedades Bíblicas en Guatemala. Akʼ tzʼiibʼ). Wuqubʼ mil sut tana natawmank xkʼabʼaʼ li Yos saʼ li Santil Hu. Abʼanan, saʼ naabʼal li Santil Hu keʼroksi li uuchil kʼabʼaʼej Qaawaʼ. Li Yos naraj wank choʼq aawamiiw, joʼkan naq naraj naq taawoksi li xkʼabʼaʼ (Salmo 105:1).

Li ruuchil xkʼabʼaʼ. Naq li Santil Hu naʼaatinak chirix li Jehobʼa naroksi li uuchil kʼabʼaʼej Yos, Nimajwal Yos, aj Yobʼtesinel, Yuwaʼbʼej, Qaawaʼ ut Nimajwal Awabʼej. Saʼ li Santil Hu naqataw  ajwiʼ naabʼal li tij bʼarwiʼ naʼoksimank jun li uuchil kʼabʼaʼej chirix li Jehobʼa (Daniel 9:4).

Chanru aʼan. Li Yos aʼan jun li musiqʼej li inkʼaʼ naʼilmank ru (Juan 4:24). Li Santil Hu naxye naq «maajun sut kiʼileʼk ru xbʼaan anihaq» (Juan 1:18). Li Santil Hu naxye ajwiʼ qe kʼaru narekʼa. Li qabʼaanuhom naru naxsahobʼresi malaj naxrahobʼtesi xchʼool (Salmo 78:40, 41; Proverbios 27:11).

Li xchaqʼalil ru xnaʼlebʼ. Li Yos junaqik narilebʼ chixjunil li poyanam, maakʼaʼ naxye li xtenamit malaj li xwanjik (Hechos 10:34, 35). Joʼkan ajwiʼ, naʼuxtaanank, natoqʼobʼank u, wank xkuyum, jwal narahok, ut junelik naxye li yaal (Exodo 34:6, 7). Abʼanan, saʼ xyanq chixjunil aʼin, wank kaahibʼ li xnimal ru xnaʼlebʼ.

Li xwankilal. Aʼan «li Nimajwal Yos». Aʼin naraj xyeebʼal naq naru xbʼaanunkil chixjunil li naxyeechiʼi (Genesis 17:1).

Li xchoxahil naʼlebʼ. Li xnimal xnawom li Yos inkʼaʼ naru xjuntaqʼeetankil rikʼin junaq chik. Joʼkan naq, li Santil Hu naxye naq kaʼajwiʼ aʼan «naxnaw chixjunil» (Romanos 16:27).

Li xtiikilal. Li Yos junelik nanaʼlebʼak saʼ tiikilal. «Chixjunil li xkʼuubʼahom aʼan tiikilal» ut «inkʼaʼ nabʼalaqʼik» (Deuteronomio 32:4).

Li xrahom. Li Santil Hu naxye naq «li Yos aʼan rahok» (1 Juan 4:8). Li Yos moko kaʼaj tawiʼ naxkʼutbʼesi li rahok, aʼan tzʼaqal li rahok. Li xnimal xrahom naʼekʼasink re chi xbʼaanunkil chixjunil, ut saʼ xkʼabʼaʼ aʼin naqataw naabʼal rusilal.

Nawank saʼ amiiwil rikʼinebʼ li qas qiitzʼin. Li Yos aʼan li qachoxahil Yuwaʼ li nokooxra (Mateo 6:9). Naru toowanq choʼq ramiiw wi naqapaabʼ (Salmo 25:14). Li Yos naraj naq tootijoq re naq toojiloq chixkʼatq ut tqaye re chixjunil li qachʼaʼajkilal xbʼaan naq naxkʼe xchʼool chiqix (Santiago 4:8; 1 Pedro 5:7).

Li Jesus moko aʼan ta li Yos. Li Jesus jun ajwiʼ xbʼaan naq kaʼajwiʼ aʼan kiyobʼtesiik xbʼaan li Yos. Joʼkan naq saʼ li Santil Hu nakʼabʼaʼiik joʼ Ralal li Yos (Juan 20:31). Li Jehobʼa kixyobʼtesi li Jesus, aʼan li xbʼeen ralal ut moqon chik kixkʼabʼaʼi joʼ laj kʼanjel chiru re naq tixyiibʼ li choxachʼochʼ ut chixjunil li wank xyuʼam (Proverbios 8:30, TNM, 31; Colosenses 1:15, 16).

 Li Jesus maajunwa kixye naq aʼan li Yos. Kixye bʼan: «Rikʼin ninchalk chaq ut aʼan kitaqlank chaq we» (Juan 7:29). Naq yook chaq chi aatinak rikʼin jun rehebʼ li xtzolom ixq, li Jesus kixye li aatin aʼin chirix li Jehobʼa «linYuwaʼ ut eeYuwaʼ ajwiʼ laaʼex» ut «linYos ut eeYos ajwiʼ laaʼex» (Juan 20:17). Naq kikamk, li Jehobʼa kixwaklesi wiʼ chik chi yoʼyo re naq twanq saʼ choxa, kixbʼaanu naq tkʼojlaaq saʼ xnim uqʼ ut kixkʼe xnimal xwankilal (Mateo 28:18; Hechos 2:32, 33).

Li Jesukriist truuq aatenqʼankil chi jilok chixkʼatq li Yos

Kichalk saʼ Ruuchichʼochʼ re xkʼutbʼal chiqu chanru li Xyuwaʼ. Li Jehobʼa kixye ajwiʼ aʼin chirix li Jesus: «Aʼin li walal raaro inbʼaan: aʼan cherabʼihaq» (Marcos 9:7). Kaʼajwiʼ li Jesus naxnaw ru chiʼus li Yos. Aʼan kixye: «Maaʼani nanawok ru li Yuwaʼbʼej, kaʼajwiʼ li Kʼajolbʼej ut ebʼ li taaraj wiʼ xkʼutbʼesinkil» (Lucas 10:22).

Naxkʼutbʼesi li xnaʼlebʼ li Yos chi tzʼaqal re ru. Li Jesus kixkʼutbʼesi tzʼaqal li xnaʼlebʼ li Xyuwaʼ, joʼkan naq kiruuk xyeebʼal: «Li xʼilok wu, xril ru li Yuwaʼbʼej» (Juan 14:9). Rikʼin li xyeehom ut li xbʼaanuhom, li Jesus kixtenqʼahebʼ li poyanam chi jilok chixkʼatq li Yos xbʼaan naq kixkʼutbʼesi chiruhebʼ naq raarokebʼ xbʼaan li Xyuwaʼ. Li Jesus kixye: «Laaʼin li bʼe, li yaal ut li yuʼam. Maaʼani naxik rikʼin li Yuwaʼbʼej, wi inkʼaʼ ta saʼ inkʼabʼaʼ» (Juan 14:6). Kixye ajwiʼ: «Ebʼ li tzʼaqal aj loqʼoninel teʼxloqʼoni ru li Yuwaʼbʼej saʼ musiqʼej ut rikʼin li yaal, xbʼaan naq joʼkaʼin naraj li Yuwaʼbʼej naq taaloqʼoniiq ru» (Juan 4:23). Kʼoxla aʼin, li Jehobʼa yook xsikʼbʼalebʼ li poyanam joʼ laaʼat li nekeʼraj xnawbʼal li yaal chirix.