Li yaal chirix li kutan chalkebʼ re
Ma ak xaakʼoxla junsutaq kʼaru tqakʼul saʼ li kutan chalkebʼ re? Li Santil Hu naxye naq chi seebʼ tqil xninqal ru eetalil li wanq xwankil saʼ li qayuʼam.
Li Jesus kixchʼolobʼ chanru tqanaw naq «li xnimajwal awabʼejihom li Yos ak nachʼ wan chaq» (Lucas 21:31). Saʼ xyanq aʼin, kixye naq twanq nimla yalok u, kawil hiik, weʼej ut letzbʼil yajel. Aʼan tzʼaqal li yook chi kʼulmank saʼebʼ li qakutan (Lucas 21:10-17).
Li Santil Hu naxye ajwiʼ naq «saʼ rosoʼjikebʼ li kutan» t-ilmanq saʼ li xʼawabʼejilal li winq li xnaʼlebʼebʼ li poyanam malaj li xyibʼal ru xbʼaanuhomebʼ. Chaawil li propesiiy aʼin saʼ 2 Timoteo 3:1-5 a. Peʼyaal naq ebʼ li aatin aʼin naxchʼolobʼ chiʼus li xnaʼlebʼ ut li xbʼaanuhom li wankebʼ saʼ li qasutam?
Kʼaru naraj xyeebʼal aʼin? Naq chi seebʼ li Xʼawabʼejilal li Yos tixjal naabʼal li naʼlebʼ ut chaabʼilaq chik ru li qayuʼam saʼ li Ruuchichʼochʼ (Lucas 21:36). Li Santil Hu naxye naq li Yos tixbʼaanu naabʼal li chaabʼil naʼlebʼ choʼq re li Ruuchichʼochʼ ut ebʼ li poyanam. Qilaq junjunq li eetalil.
JUN CHAABʼIL AWABʼEJILAL
Li Jesus «kikʼeheʼk xwankil, xloqʼal ut xʼawabʼejihom, ut [...] li tenamit, ebʼ li poyanam li jalan jalanq li raatinobʼaalebʼ keʼok chi kʼanjelak chiru. Li xwankilal wanq chi junelik ut inkʼaʼ taaʼosoʼq; ut li xʼawabʼejihom maajoqʼe taasachmanq» (DANIEL 7:14).
Kʼaru naraj xyeebʼal. Naq tooruuq chi wanq chi sa saʼ qachʼool rubʼel li chaabʼil awabʼejilal li kixxaqabʼ li Yos bʼarwiʼ kixkʼe li Ralal choʼq Awabʼej.
MAAKʼAʼAQ CHIK LI YAJEL
«Maajun chik saʼ qayanq tixye: “Yajin”» (ISAIAS 33:24).
Kʼaru naraj xyeebʼal. Naq tzʼaqalaq chik re ru li qajunxaqalil ut inkʼaʼ chik tooyajerq. Naru twanq qayuʼam chi junelik.
TWANQ LI TUQTUUKILAL CHI JUNELIK
«Aʼan xchʼanabʼank re li yalok toj saʼ xmaril li ruuchichʼochʼ» (SALMO 46:10).
Kʼaru naraj xyeebʼal. Naq maajunwa chik tsachq li tuqtuukilal chi moko tooxkʼe saʼ rahilal li yalok u.
LI TEʼWANQ SAʼ RUUCHICHʼOCHʼ CHAABʼILAQEBʼ XNAʼLEBʼ
«Li tiikebʼ xchʼool teʼwanq saʼ li chʼochʼ aʼin, [...] ebʼ li inkʼaʼ usebʼ xnaʼlebʼ isinbʼilaqebʼ saʼ li naʼajej aʼin; ebʼ laj bʼalaqʼ teʼsachmanq» (PROVERBIOS 2:21, 22).
Kʼaru naraj xyeebʼal. Naq maakʼaʼaqebʼ chik li maaʼusebʼ xnaʼlebʼ; kaʼaj chik teʼwanq li teʼraj xpaabʼankil li Yos.
CHʼINAʼUSAQ CHIXJUNIL LI RUUCHICHʼOCHʼ
«Teʼkabʼlaq ut teʼwanq chisaʼ; teʼawq uubʼ ut teʼxtzeka li ru» (ISAIAS 65:21, 22).
Kʼaru naraj xyeebʼal. Naq chixjunil li Ruuchichʼochʼ chʼinaʼusaq chik. Li Yos tixbʼaanu naq ttzʼaqloq ru li xqatzʼaama: naq t-uxq li rajom «saʼ ruuchichʼochʼ» (Mateo 6:10).
a Naru taayaabʼasi li Santil Hu saʼ internet saʼ www.pr418.com.
Maare twulaq ajwiʼ chaawu
LI SANTIL HU NAXSUME EBʼ LI PATZʼOM
Kʼaru truuq xbʼaanunkil li Xnimajwal Awabʼejilal li Yos?
Kʼe reetal li tkʼulmanq naq li Xʼawabʼejilal li Yos tixjolomi li Ruuchichʼochʼ.
