• Tsikʼeʼq ru xbʼaan li Yos. «Laaʼin xinxaqabʼank re linʼawabʼej [...], ut tinkʼe chaweechanihebʼ li tenamit; aawehaq chixjunil li ruuchichʼochʼ» (Salmo 2:6, 8).

• Trechani li xkʼojaribʼaal li awabʼej David. «Jun kʼuulaʼal xyoʼlaak choʼq qe ut xqamaatani jun chʼinaʼal [...]. Kʼajoʼaq li xwankilal, ut li tuqtuukilal maakʼaʼaq rosoʼjik saʼ li xkʼojaribʼaal laj David ut li xʼawabʼejihom» (Isaías 9:6, 7).

• Tyoʼlaaq Belén. «Aʼut laaʼat, Belén [...], aawikʼin taaʼelq chaq li taaʼawabʼejinq [...], xbʼaan naq li Qaawaʼ sut-nimanbʼilaq ru, toj saʼ xmaril li ruuchichʼochʼ» (Miqueas 5:2, 4).

• Ttzʼeqtaanaaq ut tkamsiiq. «Majewanbʼil chi moko xqakʼe saʼ xnaqʼ qu [...] xtiqʼeʼ xbʼaan li qamaak ut xrahobʼtesiik xbʼaan li qamaaʼusilal» (Isaías 53:3, 5).

• Twakliiq wiʼ chik chi yoʼyo ut tkʼeheʼq xloqʼal. «Inkʼaʼ tinaakanabʼ saʼ xnaʼajebʼ li kamenaq, chi moko taakʼe chi qʼaak laawamiiw [...]: kʼajoʼ xnimal li sahilal chawe chawu» (Salmo 16:10, 11).

Kaʼajwiʼ chirix li Jesukriist natzʼaqlok ru chixjunil aʼin. Jun li ánjel kixye ajwiʼ re li xMaría, li xnaʼ: «Li Qaawaʼ Yos tixkʼe re li xkʼojaribʼaal laj David li xyuwaʼ [...]. Li xnimal awabʼejihom inkʼaʼ taalajq taaʼosoʼq» (Lucas 1:31-33).

Li Jesús maajunwa kiʼawabʼejink naq kiwank saʼ Ruuchichʼochʼ. Abʼanan, twanq choʼq awabʼej saʼ li Xʼawabʼejilal li Yos aran saʼ choxa naq tixjolomi li ruuchichʼochʼ. Kʼaʼut qʼaxal chaabʼil joʼ Awabʼej? Qilaq li kixbʼaanu naq kiwank saʼ Ruuchichʼochʼ.

•   Li Jesús kixkʼe xchʼool chirixebʼ li poyanam. Kixtenqʼahebʼ li winq, li ixq, li saaj ut li cheek. Maakʼaʼ naxye li xwanjikebʼ ut bʼar chalenaqebʼ (Mateo 9:36; Marcos 10:16). Jun li winq saqlep rix kixye re li Jesús: «Wi taawaj, truuq tinaakʼirtasi», tojaʼ naq li Jesús kixtoqʼobʼa ru ut kixkʼirtasi (Marcos 1:40-42).

• Li Jesús kixkʼut chanru tqasahobʼresi xchʼool li Yos. Kixye: «Inkʼaʼ naru texkʼanjelaq chiru li Yos ut chiru li Tumin». Kixye ajwiʼ naq tqilebʼ li junchʼol joʼ chanru twulaq raj chiqu naq tooʼeʼril. Kixkʼut ajwiʼ chiqu naq li Yos moko kaʼaj tawiʼ naril li naqabʼaanu, naxkʼe bʼan ajwiʼ reetal li naqakʼoxla ut li naqekʼa. Joʼkan naq, re xsahobʼresinkil xchʼool li Yos, tento tqakʼe reetal li wank saʼ qachʼool (Mateo 5:28; 6:24; 7:12). Li Jesús kixkʼut ajwiʼ naq tooruuq xtawbʼal li tzʼaqal sahil chʼoolejil wi tqanaw li naraj li Yos ut tqabʼaanu (Lucas 11:28).

• Li Jesús kixkʼut chiqu kʼaru li rahok. Li kixye ut li kixbʼaanu kiwulak saʼ xchʼoolebʼ li poyanam. Li Santil Hu naxye: «Sachsookebʼ xchʼool keʼkanaak li kʼiila tenamit rikʼin li xkʼutum, xbʼaan naq naxtzolebʼ chi wank xwankil» (Mateo 7:28, 29). Kixye aʼin rehebʼ: «Cherahaqebʼ li xikʼ nekeʼilok eere». Ut kitijok ajwiʼ chirixebʼ wiibʼ oxibʼ li keʼtzʼaqonk chi xkamsinkil: «At inYuwaʼ, chakuyebʼ xmaak xbʼaan naq inkʼaʼ nekeʼxnaw kʼaru yookebʼ chi xbʼaanunkil» (Mateo 5:44; Lucas 23:34).

Li Jesús qʼaxal chaabʼil joʼ awabʼej. Kawresinbʼil chiʼus, nokooxra ut naraj qatenqʼankil. Abʼan, joqʼe tixtikibʼ awabʼejink?