Saʼ li tzolom li tojeʼ xqil xqatzʼil rix li eetalil li kixye li Jesús. Li eetalil aʼin naxkʼut naq ak xaqabʼanbʼil chik li Xʼawabʼejilal li Yos saʼ choxa bʼarwiʼ li Jesukriist wank choʼq Awabʼej.

Naq li Jesús kiʼok chi Awabʼejink, li Santil Hu naxye naq kirisi laj Tza ut ebʼ li maaʼus aj musiqʼej saʼ choxa. Aʼin jun rehebʼ li xyaalalil naq kinumtaak li rahilal saʼ li Ruuchichʼochʼ chalen li chihabʼ 1914 (Apocalipsis 12:7, 9).

Li Jesús joʼ Awabʼej saʼ li Xʼawabʼejilal li Yos ak kixbʼaanu naabʼal li chaabʼil naʼlebʼ chirixebʼ li poyanam usta xnumtaak li chʼaʼajkilal saʼ li Ruuchichʼochʼ. Aʼan yook xbʼeresinkil li nimla kʼanjel li kixye chaq li Jesús naq tbʼaanumanq ut chi miyon li poyanam ak xeʼxtzol ut xeʼxyuʼami li naxye li Santil Hu (Isaías 2:2-4). Ak xeʼxtzol xkʼebʼal li kʼanjel saʼ xnaʼaj, xtuqubʼankil li chʼaʼajkilal saʼebʼ li xjunkabʼal ut xyalbʼal xsahil li kʼaru rehebʼ chi inkʼaʼ nekeʼxik xchʼool chirix. Li Santil Hu naxtenqʼahebʼ re naq tchaabʼiloʼq ru li xyuʼamebʼ ut naxtzolebʼ re naq teʼwanq rubʼel li Xʼawabʼejilal li Yos joʼ chanru naraj aʼan.

Usta li Jesús ak yook chi awabʼejink saʼ choxa, li winq toj yook chi jolomink saʼ li Ruuchichʼochʼ. Abʼan li Yos kixye re li Jesús: «Chiwanq laawankil saʼ xbʼeenebʼ li xikʼ nekeʼilok aawe!» (Salmo 110:2). Chi seebʼ, li Jesús tixsach chixjunilebʼ li xikʼ nekeʼilok re ut trisi li xchʼaʼajkilalebʼ li nekeʼpaabʼank re li Yos.

Saʼ li hoonal aʼan li Xʼawabʼejilal li Yos tixbʼaanu aʼin:

• Tixsachebʼ li bʼalaqʼil paabʼal. Li Santil Hu naxjuntaqʼeeta li bʼalaqʼil paabʼal rikʼin jun li ixq aj yumbʼeet li tsacheʼq ru chi seebʼ. Joʼkan naq teʼsacheʼq ru li paabʼal li nekeʼxkʼut li tikʼtiʼ chirix li Yos ut li nekeʼxchʼaʼajki li xyuʼamebʼ li poyanam. Sachamilaqebʼ xchʼool teʼkanaaq naq teʼsacheʼq ru li bʼalaqʼil paabʼal (Apocalipsis 17:15, 16).

• Tixsachebʼ li xʼawabʼejilal li winq. Li Xʼawabʼejilal li Yos tixsachebʼ li xʼawabʼejilal li winq (Apocalipsis 19:15, 17, 18).

• Tixsach li maaʼusebʼ xnaʼlebʼ. Kʼaru teʼxkʼul li inkʼaʼ nekeʼxkanabʼ xbʼaanunkil li maaʼusilal ut inkʼaʼ nekeʼxpaabʼ li Yos? «Li inkʼaʼ usebʼ xnaʼlebʼ isinbʼilaqebʼ saʼ li naʼajej aʼin» (Proverbios 2:22).

• Tixsach laj Tza ut ebʼ li maaʼus aj musiqʼej. Laj Tza ut ebʼ li maaʼus aj musiqʼej «inkʼaʼ chik tixbʼalaqʼihebʼ li tenamit» (Apocalipsis 20:3, 10).

Kʼaru teʼxkʼul li nekeʼraj wanq rubʼel li Xʼawabʼejilal li Yos?

Naq li Jesukriist t-awabʼejinq qʼaxal naabʼal wiʼ chik tixbʼaanu chiru li xʼawabʼejilal li winq. T-awabʼejinq ajwiʼ rochbʼen 144,000 li sikʼbʼilebʼ ru saʼ xyanqebʼ li poyanam (Apocalipsis 5:9, 10; 14:1, 3). Tixbʼaanu naq ttzʼaqloq ru li rajom li Yos saʼ Ruuchichʼochʼ. Kʼaru tixbʼaanu li Xʼawabʼejilal li Yos chirixebʼ li poyanam?

• Trisi li yajel ut li kamk. «Maajun chik saʼ qayanq tixye: “Yajin”» ut «inkʼaʼ chik taawanq kamk» (Isaías 33:24; Apocalipsis 21:4).

• Twanq li tuqtuukilal ut li sahilal. «Kʼajoʼaq li sahilwank toxeʼxtaw chixjunilebʼ» ut «li junjunq taahilanq saʼ xmu li rochoch saʼ tuqtuukilal, chi maakʼaʼaq xxiw» (Isaías 54:13; Miqueas 4:4).

• Ttawmanq xsahil li kʼanjelak. «Teʼxyal xsahil li xkʼanjelebʼ. Inkʼaʼ chik teʼxtawasi ribʼ chi kʼanjelak chi maakʼaʼ rajbʼal» (Isaías 65:22, 23).

• Tixtuqubʼ ru li chʼaʼajkilal li wank saʼ li qasutam. «Sahoqebʼ li chaqichʼochʼ ut li joxkʼ naʼajej! Chisahoʼq li junesal naʼajej ut chinujaq chi uutzʼuʼuj» (Isaías 35:1).

• Naxtzolebʼ li poyanam re naq teʼwanq xyuʼam chi junelik. «Aʼan aʼin li junelik yuʼam: naq teʼxnaw aawu laaʼat li junat chi tzʼaqal Yos ut li xataqla chaq, li Jesus aʼ li Kriist» (Juan 17:3).

Li Yos naraj naq taakʼul li osobʼtesihom aʼin (Isaías 48:18). Saʼ li jun chik tzolom taawil li tatruuq xbʼaanunkil anaqwan re naq taakʼul li osobʼtesihom aʼin.