Chalen chaq saʼ xtiklajik, laj Yobʼtesinel naroksihebʼ li ánjel malaj li propeet re raatinankilebʼ li qas qiitzʼin. Kixbʼaanu ajwiʼ naq ttzʼiibʼamanq li raatin ut li xyeechiʼom. Li Yos naxye naq sahaq saʼ qachʼool saʼ li kutan chalk re, abʼan, bʼar naru tqataw ebʼ li yeechiʼom aʼin?

Li xʼesil li Yos wank saʼ li Santil Hu (2 Timoteo 3:16). Chanru li Yos kiroksi ebʼ li xpropeet re xtzʼiibʼankil ebʼ li xʼesil? Aʼan kixkʼe saʼ xkʼaʼuxebʼ li teʼxtzʼiibʼa (2 Pedro 1:21). Jun eetalil, wi jun li patron naxye re jun laj kʼanjel naq tixtzʼiibʼa jun li esilhu, moko tqaye ta naq li esilhu aʼin re laj kʼanjel, re bʼan li patron. Joʼkan ajwiʼ, li Yos kiroksi ebʼ li winq re xtzʼiibʼankil li xʼesil, joʼkan naq li Santil Hu chalenaq rikʼin li Yos.

Li Raatin li Yos jwal wank xwankil, joʼkan naq aʼan naraj naq chixjunil li poyanam teʼxyaabʼasi ut teʼxtaw ru. Saʼebʼ li qakutan, ebʼ li poyanam re «chixjunil li amaqʼ ut tenamit, yalaq chan re ru nekeʼilok ut nekeʼaatinak» teʼruuq xtawbʼal «li chaabʼil esilal li maakʼaʼ rosoʼjik» (Apocalipsis 14:6). Rikʼin li xtenqʼ li Jehobʼa, li Santil Hu xtzʼiibʼamank chi tasal malaj chixjunil saʼ numenaq oxibʼ mil chi aatinobʼaal, li naxqʼax ru jalan chik li hu.