Laj Yobʼtesinel nokooxra ut naxkʼe xchʼool chiqix
1. NAXKʼE LI SAQʼE
Chan raj ru li yuʼam wi maakʼaʼ li Saqʼe? Li Saqʼe naxbʼaanu naq ebʼ li cheʼ teʼwanq xxaq, teʼatzʼumaq, teʼuuchinq ut teʼwanq riyajil. Naxbʼaanu naq li xxeʼ li cheʼ tixtzʼubʼ li haʼ ut tixkʼam saʼebʼ li xxaq bʼarwiʼ naʼelk chi sibʼul.
2. NAXKʼE LI HABʼ
Li habʼ aʼan jun li nimla maatan li naxkʼe qe li Yos. Saʼ xkʼabʼaʼ aʼin li chʼochʼ naxkʼe ru li awimq. Li Yos naxkʼe qe li habʼ, li xkʼihal ru li awimq, li qatzakahemq ut aʼin naxkʼe xsahil li qachʼool.
3. NAXKʼE QATZAKAHEMQ UT QABʼAATAL
Ebʼ li naʼbʼej yuwaʼbʼej nekeʼok xkʼaʼuxl chirix chanru teʼxtaw xtzakahemq ut xbʼaatal ebʼ li xjunkabʼal. Li Santil Hu naxye: «Ilomaqebʼ li xikʼanel xul li nekeʼrupupik chiru choxa: inkʼaʼ nekeʼawk, chi moko nekeʼqʼolok, chi moko nekeʼtamok saʼebʼ li xkʼuulebʼaalebʼ; ut leechoxahil Yuwaʼ nachʼoolanink rehebʼ. Ma inkʼaʼ tabʼiʼ qʼaxal loqʼex laaʼex chiruhebʼ aʼan?» (Mateo 6:25, 26).
«Chekʼe reetal ebʼ li uutzʼuʼuj saʼ pim, chanru nekeʼkʼiik [...]. Aʼut laaʼin ninye eere naq chi moko laj Salomón saʼ chixjunil li xnimal xloqʼal kixtiqibʼ ribʼ kamaʼ junaq rehebʼ aʼan. Wi li Yos joʼkaʼin naq naxtiqibʼ li pim li wank anaqwan chiru tzuultaqʼa [...], ma inkʼaʼ tabʼiʼ qʼaxal numtajenaq chik tixbʼaanu eere laaʼex [...]?» (Mateo 6:28-30).
Wi li Yos naxkʼe li qatzakahemq ut li qabʼaatal, truuq ajwiʼ qatenqʼankil saʼ jalan chik li naʼlebʼ. Naq naqakʼe qaqʼe chi xbʼaanunkil li naraj li Yos, aʼan nokooxtenqʼa chi xsikʼbʼal li qatzakahemq malaj xtawbʼal junaq li kʼanjel re xloqʼbʼal li naʼajmank chiqu (Mateo 6:32, 33).
Naq naqil li Saqʼe, li habʼ, li xul li nekeʼrupupik ut ebʼ li uutzʼuʼuj, peʼyaal naq aʼin nokoorekʼasi chi xraabʼal li Yos? Saʼ li jun chik tzolom tqil chanru li Yos kiʼaatinak rikʼinebʼ li qas qiitzʼin.
