«Naq textijoq, meeye kʼiila aatin» (Mateo 6:7).

Li Jehobʼa inkʼaʼ naraj naq tqatzol junaq li tij malaj yal isinbʼil chaq saʼ junaq li hu. Naraj bʼan naq tqaye li wank saʼ qachʼool. Kʼoxla aʼin: kʼaru raj taawekʼa wi laawamiiw inkʼaʼ naxjal li naxye aawe wulaj wulaj? Tattitzʼq rabʼinkil! Ebʼ li chaabʼil amiiw nekeʼxseeraqʼi li wank saʼ xchʼoolebʼ. Naq nokootijok chi anchal qachʼool, naqakʼutbʼesi naq naqil li Jehobʼa joʼ qamiiw.

«Nekextzʼaamank ut inkʼaʼ nekexkʼuluk xbʼaan naq inkʼaʼ nekextzʼaamank chi chaabʼil» (Santiago 4:3).

Li Jehobʼa inkʼaʼ tixsume li qatij wi naqapatzʼ li inkʼaʼ nawulak chiru. Qilaq jun li eetalil: kʼoxla naq jun li poyanam naxpatzʼ re li Yos naq ttenqʼaaq naq naxik chi xbʼuulinkil rix li tumin. Ma tixsume tawiʼ li Yos li tij aʼin wi naxye qe naq inkʼaʼ tqarahi ru li tumin chi moko toobʼulinq? (Isaías 65:11, Li Santil Hu, Wycliffe Bible Translators; Lucas 12:15). Li Jehobʼa inkʼaʼ tixsume li tij aʼin. Tento tootijoq joʼ chanru naxye qe saʼ li Santil Hu re naq tooxsume.

 «Li inkʼaʼ naxpaabʼ xchaqʼrabʼ li Qaawaʼ, inkʼaʼ ajwiʼ nakʼuleʼk li xtij xbʼaan li Yos» (Proverbios 28:9).

Saʼ li najter qe kutan li Yos inkʼaʼ kirabʼi li xtij li keʼxqʼet chaq li xchaqʼrabʼ, ut joʼkan ajwiʼ naxbʼaanu anaqwan (Isaías 1:15, 16; Malaquías 3:6). Wi naqaj naq tixsume li qatij, tento tqapaabʼ li xchaqʼrabʼ. Ma toorabʼi tawiʼ li Yos wi xqabʼaanu chaq junaq li yiibʼru aj naʼlebʼ? Wi naqayotʼ qachʼool ut naqabʼaanu li naraj, aʼan tixkuy qamaak (Hechos 3:19).