«Chexyoʼleq bʼiʼ laaʼex, xbʼaan naq inkʼaʼ nekenaw joʼqʼe xkutankil chi moko li xhonalil xkʼulunik li Kʼajolbʼej» (MATEO 25:13).

«Yoʼoon wanqex, chexyoʼleq xbʼaan naq inkʼaʼ nekenaw joʼqʼe li xqʼehil» (MARCOS 13:33).

Joʼkan bʼiʼ, maaʼani li wank saʼ xbʼeen li Ruuchichʼochʼ naxnaw chi tzʼaqal re ru joqʼe tchalq li rosoʼjik li Ruuchichʼochʼ. Abʼan li Yos ak kixxaqabʼ «li kutan aʼan malaj li xhonalil» joqʼe tchalq li rosoʼjik (Mateo 24:36). Ma naraj xyeebʼal aʼin naq inkʼaʼ tooruuq xnawbʼal joqʼe tchalq li rosoʼjik? Inkʼaʼ. Li Jesús kixye rehebʼ li xtzolom naq teʼxkʼe reetal wiibʼ oxibʼ li naʼlebʼ li tixkʼutbʼesi naq nachʼ wank chaq li rosoʼjik.

Li jalan jalanq chi naʼlebʼ li tkʼulmanq tixkʼutbʼesi naq wanko saʼ «li rosoʼjik li ruuchichʼochʼ». Li Jesús kixye: «Teʼwaklijeʼq chi xkamsinkil ribʼebʼ tenamit rikʼin jalan chik tenamit, li awabʼej rikʼin jalan chik awabʼej, ut taawanjeʼq weʼej ut hiik saʼ naabʼal chi naʼajej» (Mateo 24:3, 7). Kixye ajwiʼ naq twanq ebʼ li «yajel» (Lucas 21:11). Ma yookat xkʼebʼal reetal naq yook chi tzʼaqlok ru ebʼ li propesiiy aʼin li kixye li Jesús?

Saʼebʼ li qakutan naabʼal li kristiʼaan nekeʼxkʼul li rahilal saʼ xkʼabʼaʼ li yalok u, li weʼej, ebʼ li hiik ut li jalan jalanq chi yajel. Jun eetalil, saʼ li chihabʼ 2004 kimoq jun li nimla hiik saʼ li palaw Índico li kixbʼaanu naq teʼkamq kachʼin chik ma 225,000 chi kristiʼaan xbʼaan jun li tsunami. Chiru oxibʼ chihabʼ, maare xeʼkamk 6.9 miyon chi qas qiitzʼin saʼ chixjunil li Ruuchichʼochʼ xbʼaan li COVID-19. Li Jesús kixye naq ebʼ li naʼlebʼ aʼin tixkʼutbʼesi naq nachʼ wanko rikʼin li rosoʼjik li Ruuchichʼochʼ.

Li Santil Hu naxye naq, naq toj maajiʼ nasacheʼk li Ruuchichʼochʼ wank jun li hoonal li nakʼabʼaʼiik li «rosoʼjikebʼ li kutan» (2 Pedro 3:3, 4). Joʼ naxye saʼ 2 Timoteo 3:1-5 saʼ rosoʼjikebʼ li kutan ebʼ li kristiʼaan kʼajoʼ xyibʼalaqebʼ ru xnaʼlebʼ (chaawil li kaaxukuut « Naq toj maajiʼ nawulak li rosoʼjik li Ruuchichʼochʼ»). Ma nakaakʼe reetal anaqwan naq ebʼ li kristiʼaan kaʼajwiʼ nekeʼxsikʼ li us choʼq rehebʼ, josqʼebʼ, nekeʼxra li tumin ut inkʼaʼ nekeʼrahok? Aʼin naxkʼutbʼesi naq nachʼ wank li rosoʼjik li Ruuchichʼochʼ.

Joʼ najtil tbʼayq li rosoʼjikebʼ li kutan? Li Santil Hu naxye naq moko tbʼayq ta. Tojaʼ naq li Yos tixsachebʼ «li nekeʼsachok re li ruuchichʼochʼ» (Apocalipsis 11:15-18; 12:12).

Li Yos ak kixxaqabʼ li kutan ut li hoonal re naq tixsach li Ruuchichʼochʼ (Mateo 24:36). Abʼanan wank chik xkomon: li Yos «inkʼaʼ naraj naq taasachq junaq» (2 Pedro 3:9). Naxkʼe bʼan li hoonal re naq tqanaw ru ut tooʼabʼinq chiru. Kʼaʼut? Xbʼaan naq aʼan naraj naq tookoleʼq ut toowanq saʼ li chʼinaʼusil Ruuchichʼochʼ li tixkʼam chaq moqon.

Li Yos toj yook xbʼaanunkil naq ebʼ li kristiʼaan teʼxtzol chanru teʼruuq wank rubʼel li Xʼawabʼejilal. Li Jesús kixye naq li chaabʼil esil chirix li Xʼawabʼejilal li Yos tpuktesimanq «saʼ chixjunil li ruuchichʼochʼ» (Mateo 24:14). Saʼ li chihabʼ 2019, ebʼ laj testiiw re li Jehobʼa saʼ chixjunil li Ruuchichʼochʼ keʼxkʼe naabʼal mil miyon chi hoor re puktesink ut xkʼutbʼal chiruhebʼ li kristiʼaan li oybʼenihom li naxkʼe li Santil Hu. Li Jesús kixye naq li nimla kʼanjel chirix xkʼebʼal chi naweʼk li chaabʼil esil tbʼaanumanq saʼ chixjunil li Ruuchichʼochʼ naq toj maajiʼ nachalk li rosoʼjik.

Aʼin naraj xyeebʼal naq chi seebʼ tsacheʼq li xʼawabʼejilal li winq. Abʼan li xchaabʼilal naq naru tookoleʼq saʼ li rosoʼjik li Ruuchichʼochʼ ut tooruuq chi wank saʼ li chʼinaʼusil naʼajej li naxyeechiʼi qe li Yos. Li jun chik tzolom tixchʼolobʼ kʼaru tento tqabʼaanu re naq tooruuq chi wank saʼ li akʼ Ruuchichʼochʼ.