Kʼaru nataqlank saʼ laayuʼam?
Wankebʼ nekeʼxpaabʼ naq ebʼ li naʼlebʼ li inkʼaʼ naʼilmank aʼan li nataqlank saʼ xyuʼamebʼ. Aʼin naxbʼaanu naq teʼxpaabʼ jalan jalanq li naʼlebʼ re naq tchaabʼiloʼq li xyuʼamebʼ. Qilaq wiibʼ oxibʼ rehebʼ li naʼlebʼ aʼin.
LI NEKEʼXPAABʼ
XTZʼILBʼAL RIX LI CHAHIM. Wankebʼ nekeʼxpaabʼ naq aʼ yaal chanru wank li chahim naq nayoʼlaak junaq, tixye chanruhaq li xyuʼam. Nekeʼril xyaalal li tkʼulmanq saʼebʼ li xyuʼam ut nekeʼxbʼaanu li naxye re naq us teʼelq.
EBʼ LAJ ILONEL. Wankebʼ nekeʼxpaabʼ naq, re naq chaabʼilaq ebʼ li xyuʼam nekeʼxik rikʼinebʼ laj ilonel re xnawbʼal kʼaru tento teʼxbʼaanu. Nekeʼxkʼoxla naq wi nekeʼxbʼaanu aʼin sahaqebʼ saʼ xchʼool. Joʼkan naq aʼ yaal kʼaru nayeheʼk rehebʼ xbʼaan ebʼ laj ilonel, aʼan li nekeʼxbʼaanu.
XLOQʼONINKIL RU EBʼ LI QAXEʼTOON. Junchʼol chik nekeʼxpaabʼ naq aajel ru xloqʼoninkil ru ebʼ li xxeʼtoon ut jalan chik yos re naq teʼtenqʼaaq ut teʼosobʼtesiiq. Li xVan * li wank Vietnam naxye: «Ninpaabʼ naq xloqʼoninkil ru ebʼ linxeʼtoon tixbʼaanu naq chaabʼilaq linyuʼam ut li xyuʼam ebʼ linkokʼal».
YOʼLAAK WIʼ CHIK. Wankebʼ nekeʼxpaabʼ naq nakamk junaq kristiʼaan, rajlal nayoʼlaak wiʼ chik. Joʼkan naq nekeʼxye naq li nekeʼxkʼul aʼ yaal ma us malaj inkʼaʼ us nachalk xbʼaan li xeʼxbʼaanu naq yoʼyokebʼ chaq.
Usta nekeʼxnaw naq chixjunil aʼin yal yoobʼanbʼil xbʼaan li winq toj nekeʼroksi li kaart, li chahim, li uqʼ ut li matkʼ re rilbʼal ma us teʼelq saʼ li xyuʼam.
LI NAKʼULMANK
Ma relik chi yaal us nekeʼelk li kristiʼaan li nekeʼxpaabʼ ebʼ li naʼlebʼ aʼin?
Qilaq li kixkʼul laj Hào li wank Vietnam. Aʼan kiroksi ebʼ li chahim, li xloqʼoninkil ru ebʼ li xxeʼtoon ut jalan chik li naʼlebʼ re naq us t-elq saʼ li xyuʼam. Abʼan, kʼaru kikʼulmank? Laj Hào naxye: «Xinsach naabʼal lintumin, xinkanaak saʼ kʼas, xchalk naabʼal li chʼaʼajkilal saʼ linjunkabʼal ut xnumtaak linkʼaʼuxl».
Laj Qiuming li wank Taiwán, naxpaabʼ chaq li chahim, li yoʼlaak wiʼ chik, li ak xaqabʼanbʼil li tkʼulmanq saʼ li qayuʼam, li xloqʼoninkil ru ebʼ li xxeʼtoon ut jalan chik li naʼlebʼ. Naq ak kixtzʼil rix kixye: «Xinkʼe reetal naq ebʼ li naʼlebʼ aʼin moko yaal ta ut naq inkʼaʼ nekeʼxchap ribʼ. Xintzol naq ebʼ li nekeʼxtzʼil rix li chahim moko junelik ta nekeʼxye li yaal. Ut chirix li yoʼlaak wiʼ chik..., wi inkʼaʼ jultik aawe li xaabʼaanu saʼ laayuʼam, chan put ru naq taajal ut taachaabʼilobʼresi laanaʼlebʼ saʼ li jun chik yuʼam?».
«Xinkʼe reetal naq ebʼ li naʼlebʼ aʼin moko yaal ta ut naq inkʼaʼ nekeʼxchap ribʼ» (QIUMING, TAIWÁN)
Laj Hào, laj Qiuming ut jalanebʼ chik, xeʼxkʼe reetal naq li nakʼulmank saʼebʼ li xyuʼam moko nachalk ta xbʼaan li kʼaru ak xaqabʼanbʼil, li chahim, ebʼ li xeʼtoon malaj li yoʼlaak wiʼ chik. Ma naraj xyeebʼal aʼin naq maakʼaʼ chik naru naqabʼaanu?
Wankebʼ nekeʼxye naq, re naq us tat-elq saʼ laayuʼam, aajel ru naq wanq aatzolbʼal ut aabʼihomal. Abʼan, chanru xeʼelk saʼ li xyuʼam li xeʼbʼaanunk re aʼin?
^ párr. 6 Xjalmank wiibʼ oxibʼ li kʼabʼaʼej.
^ párr. 16 Ebʼ li aatin aʼin natawmank saʼ Gálatas 6:7. Ebʼ li aatin aʼin naraj ajwiʼ xyeebʼal: «Li yibʼru aj naʼlebʼ li nakaabʼaanu re junaq li kristiʼaan, tsutqʼiiq wiʼ chik aawikʼin».
Maare twulaq ajwiʼ chaawu
LAJ KʼAAKʼALEHOM
Li nekeʼxtzʼil rix li chahim ut ebʼ laj qʼe: ma naru nekeʼxye li tkʼulmanq?
Ma paabʼajel ebʼ li naʼlebʼ aʼin?
